2 कुरन्थियों 8
8
हमरो दान
1 #
रोमी 15:26
हे भईयौ और बहनौ, हम अब जौ चाँहै हैं कै तुम परमेसर की बा किरपा के बारे मै जानौ जो बानै मकिदुनिया मुलक के बिसवासिऔ की मंडलिऔ के ऊपर करी ही। 2कैसेकै बे बेसानी दरद मै पड़े हे पर फिर बी उनकै खुसी होवै ही और बे कंगाल हो गए हे, तौबी बड़ी इच्छा सै दान देवै हे। 3मैं उनके बारे मै गभाई देवै हौं कै, जितनो उनके बस मै हो उत्तोई ना पर बासै बी जादा दिल खोलकै दओ। 4बे ऐरूसलेम मै रैहनै बारे परमेसर के लोगौ की सायता कन्नै के ताँई हम सै बेरमबेरा बिनती करै हैं। 5हमकै जैसी आस उनसै ही, उस्सै बी बढ़कै उनौनै करो। उनौनै पैले खुद कै परभु कै दओ फिर परमेसर की इच्छा के हिसाब सै हमकै दओ।
6इसताँई हमनै तीतुस सै बिनती करी ही कै, जैसे बानै दान की सेवा के काम कै सुरू कन्नै मै तुमरी सायता करी ही, बैसेई बौ तुमरे बीच मै बा सेवा के काम कै पूरो कन्नै मै सायता करै। 7पर तुम सिगरी बातौं मै अच्छे हौ, जैसे कै बिसवास मै, बचन मै, गियान मै, और हर तरै की हिम्मत मै, और जो पियार तुम हम सै करौ हौ बामै बढ़ते जाबौ हौ, बैसेई तुम बी जा दान की सेवा के काम मै बी बढ़ते जाऔ।
8मैं तुमकै हुकम ना देरओ हौं, पर जैसे दूसरे लोग खुसी सै दान देवै हैं बाके बारे मै बता कै तुमरे पियार की सच्चाई कै परखनो चाँहौ हौं। 9कैसेकै तुम हमरे परभु ईसु मसी की किरपा कै जानौ हौ और जौ बी जानौ हौ कै सेट होते भए बी बौ तुमरे ताँई गरीब बनो जिस्सै कै बाके गरीब होनै सै तुम सेट हो जाऔ।
10और तुम परके साल बी दान दैनै मै सबसै अग्गे हे और दान दैनै की इच्छा मै बी अग्गे हे, और इसताँई मेरी जौ सला है कै, 11अब तुम जा सेवा के काम कै अच्छे सै पूरो करौ; और जैसी खुसी तुमनै सुरू मै दिखाई ही बैसेई तुम दैनै मै बी दिखाऔ और जितनो तुमरे धौंरे है, बाईके हिसाब सै तुम दान कै पूरो बी करौ। 12कैसेकै जो तुमरी दैनै की इच्छा है, तौ बौ बाई मै सै दे, जो कुछ बाके धौंरे है, ऐंसोई दान परमेसर कै अच्छो लगै है। पर ना कै बौ बाके हिसाब सै देए, जो बाके धौंरे ना है।
13हम जौ ना चाँहै हैं कै, दूसरौं कै सुक मिलै और तुमकै दुख, पर हम बराबरी चाँहै हैं। 14हमरी इच्छा जौ है कै, अगर तुमरे धौंरे भौस्सो है, तौ बौ उनकी कमी कै पूरी कन्नै के ताँई काम मै आय, जिस्सै कै आनै बारे बखत मै उनके धौंरे बी जादा हो जाय और बे बी तुमरे काम मै आँए कै सबई बराबर हो जाँय। 15जैसो पबित्तर सास्तर मै लिखो है कै,
“जिसनै भौस्सो इखट्टो करो, बाके धौंरे जादा ना बचो;
और जिसनै कम इखट्टो करो बाके धौंरे कमी ना पड़ी।”
तीतुस और बाके साती
16परमेसर को धन्नबाद होए, जिसनै तीतुस के दिल मै तुम लोगौ के ताँई हमरे जैसो पियार भरो। 17हमरे कैनै सैई ना पर अपनी इच्छा सै और खुसी सै बौ तुमरे धौंरे गओ। 18और तीतुस के संग हमनै एक भईया कै बी भेजो है जिसको नाम अच्छी खबर के संग सिगरे बिसवासिऔ की मंडलिऔ मै फैलो है। 19और इतनोई ना, पर बाकै बिसवासिऔ की मंडली के लोगौ नै चुनो कै बौ जा दान के काम मै हमरे संग जाय, और जौ सेवा हम इसताँई करै हैं कै परभु की महिमा और हमरी सायता कन्नै की इच्छा परकट हो जाय।
20हम इन बातौं मै चौकस रैहबैं हैं कै जिस बड़े दान कै हम इखट्टो कर रए हैं, बा दान की सेवा के बारे मै कोई हमकै बुरो ना कैए। 21कैसेकै हम अपने भले कामौ कै परभु के संगई ना बलकन आदमिऔ के संग बी रखनो चाँहै हैं।
22और हम तुमरे संग अपने एक भईया कै बी भेज रए हैं, जिसकै हमनै बेरमबेरा परखो है, और बौ तुमरी सायता कन्नै के ताँई भौत बेचैन है। पर अब बाकै तुमरे ऊपर बड़ो भरोसो है, इस बजै सै बौ तुमरी सायता कन्नै के ताँई भौत खुस है। 23जो कोई तीतुस के बारे मै पूँछै, तौ बौ मेरो साती और तुमरे ताँई सायता कन्नै बारो है, और अगर कोई तुमरे संग जानै बारे हमरे भईयौ के बारे मै पूँछै, तौ बे बिसवासिऔ की मंडलिऔ के भेजे भए और मसी की बड़ाई कन्नै बारे हैं। 24और जो उनके ताँई तुमरे दिल मै पियार है बाकै दिखाऔ, और जो घमंड हम तुमरे ऊपर करै हैं, बाकै बिसवासिऔ की मंडलिऔ के सामने साबित करकै दिखाऔ।
Currently Selected:
2 कुरन्थियों 8: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
