2 कुरन्थियों 11
11
पौलुस और ढौंगी भेजे भए चेला
1अगर तुम मेरी थोड़ी सी बेबकूफी सैह लो तौबी कुछ अच्छो तौ होतो, पर तुम पैलेई सै सैह बी रए हौ। 2कैसेकै मैं तुमरे ताँई बैसेई फिकर करौ हौं जैसी परमेसर करै है। तुम एक पबित्तर कुँआरी के हाँई हौ, जिसकी सगाई मैंनै एकई आदमी संग करर खाई है, और बौ आदमी मसी है। 3पर मैं इसताँई डरौ हौं कै जैसे साँप नै हब्बा कै चालाँकी सै बैहकाओ हो, बैसेई कहीं तुमरे सच्चे मन और जो पियार तुम मसी सै करौ हौ बासै तुमकै भटका ना दै। 4कैसेकै अगर कोई आदमी आकै तुमकै ईसु मसी के परचार के अलाबा किसी और ईसु के बारे मै सिकाऐ या तुमकै कोई और आत्मा मिलै है, जो पैले ना मिली ही, तुमरे दुआरा अपनाई गई अच्छी खबर सै बी अगल अच्छी खबर सुनाऐ, तौ तुम बड़े अच्छे सै बा आदमी को सुआगत करौ हौ।
5तुम जिनकै बड़ो भेजो भओ चेला समजौ हौ, उनसै मैं खुद कै कम ना समजौ हौं। 6मानौ हौं कै मैं बोलनै मै अनाड़ी हौं पर मेरो गियान कम ना है। हर तरै सै सिगरी बातौं मै हमनै जौ साप-साप बता दओ है।
7का मैंनै जौ गलत करो कै परमेसर की अच्छी खबर कै तुमकै सच्चाई सै सुनाओ, और तुमकै अग्गे बढ़ाओ और खुद पिच्छे रैहओ? 8कुछ लोग कैबै हैं कै, मैंनै दूसरे बिसवासिऔ की मंडली के लोगौ सै अपनी मजदूरी माँगी, जौ मेरे ताँई एक लूटनै के काम के हाँई हो, जिस्सै कै तुमरी सेवा करौं। 9#फिलि 4:15–18पर जब मैं तुमरे संग हो और जब्बी मैंकै किसी चीज की जरूरत पड़ी तौ बाके ताँई मैं किसी के ऊपर बोज ना बनो। कैसेकै जो भईया लोग मकिदुनिया मुलक सै आए हे उन्नै मेरी जरूरत कै पूरो करो। मैंनै हर एक बात मै खुद कै तुमरे ऊपर बोज ना बनन दओ और ना बन्नै दंगो। 10कैसेकै मैं मै मसी की सच्चाई रैहबै है, इसताँई मैंकै अखाया मुलक के इलाकेऔ मै बोलनै से कोई बी ना रोक सकै है। 11मैंनै जौ बात काए बोली? का इसताँई कै मैं तुमसै पियार ना करौ हौं? पर परमेसर जानै है कै मैं तुमसै कितनो पियार करौ हौं।
12मैं जो कुछ कर रओ हौं, बौई करतो जांगो जिस्सै कै उन लोगौ कै जिन बातौं मै घमंड कन्नै को मौको मिलै है खतम कर सकौं, जिनकै बे हमरे बराबर समजै हैं। 13इसताँई ऐंसे भेजे भए चेला ढौंगी हैं और धोको दैनै बारे हैं। जो मसी की अच्छी खबर कै सुनानै को ढौंग करै हैं। 14और जा बात मै कोई सक ना है कै सैतान बी परमेसर के सुरगदूत के हाँई रूप धरनै की कोसिस करै है। 15इसताँई अगर सैतान के सेवक बी, परमेसर के सेवकौ के हाँई रूप धर लैं तौ जामै का बड़ी बात है? पर आखरी मै उनको नास उनके कामौ के हिसाब सै होगो।
मसी के ताँई दुख उठानो
16मैं तुमसै फिर कैबौ हौं कै, तुम मैंकै मूरख ना समजिओ। पर अगर तुम ऐंसो समजौ हौ तौ मैंकै मूरख समज कैई बरदास कर लो कै मैंकै बी घमंड कन्नै को मौको मिलै। 17मैं जो कुछ अब बोल रओ हौं बौ परभु के हिसाब सै ना बोलौ हौं, पर एक घमंडी आदमी के हिसाब सै बोलौ हौं। 18कैसेकै भौस्से लोग अपनी जा दुनिया की जिन्दगी के ऊपर घमंड करै हैं, तौ फिर मैं बी घमंड करंगो। 19पर तुम तौ इत्ते समजदार हौ कै मूरख की बातौं कै खुसी सै सैह लेबौ हौ। 20कैसेकै जब तुमकै कोई अपनो दास बनाऐ, या तुमरो फाएदा उठाऐ, या तुमकै कुछ बात मै फसा देवै, या खुद कै तुमसै बड़ो समजै, या तुमरे मौह मै चाँट मारै तौबी तुम बाकै सैह लो। 21मैं सरम के संग बोल रओ हौं कै हम इन बातौं कै कन्नै के ताँई बेसानी कमजोर हैं।
मैं बेबकूफी सै बोल रओ हौं कै अगर कोई आदमी किसी चीज के ऊपर गर्ब कन्नै की हिम्मत करै है, तौ बैसेई हिम्मत मैं बी करौ हौं। 22इबरानी सिरप बेई ना हैं, मैं बी हौं। ईसराइली बेई ना हैं, मैं बी हौं। और इब्राहिम के खानदान के बेई ना हैं, पर मैं बी हौं। 23#चेलौ 16:23का बेई मसी के सेवक हैं? पर एक पागल आदमी के हाँई मैं जौ कैबौ हौं कै मैं तौ उनसै बी बड़ो मसी को सेवक हौं। मैंनै भौत मैहनत करी, और बेरमबेरा जेल मै बी गओ, और मैंकै बेरमबेरा बेसानी पीटो, और मेरो कई दफै मौत सै सामनो बी भओ है।
24पाँच दफै मैंनै यहूदी लोगौ के हात सै उनतालीस कोड़ा खाए। 25#चेलौ 16:22; चेलौ 14:19और तीन दफै मैंकै बैंत सै मारो गओ, और मैंकै मारनै के ताँई एक दफै पत्थर मारे, और तीन दफै मेरी किसती पानी मै डूबी, और एक दिन और एक रात मैंनै समन्दर मै काटी। 26#चेलौ 9:23; चेलौ 14:5मैंनै बेरमबेरा आनै जानै मै भौत खतरा उठाओ, कबी नद्दिऔं मै खतरा, कबी डाँकुऔं को खतरा, कबी यहूदी लोगौ सै खतरा, कबी गैर यहूदी लोगौ सै खतरा और कबी सैहरौं मै खतरा, कबी बियाबान मै खतरा, कबी समन्दर मै खतरा और कबी झूँटे बिसवासी लोगौ सै खतरा और मैंनै बेसानी मैहनत करकै भौस्सी रात जग-जग कै जिन्दगी जीई है। 27मैं कई मौके मै सो तक ना पाओ हो, मैं भूँको और पियासो रैहओ और कई दफै मैंकै रोटी तक ना मिल पाई ही, और जाड़े मै कम लत्ता की बजै सै मैं ठिटरतो रैहओ हौं। 28अब मैं, और का कैंऔ? मैंकै हरदम बिसवासिऔ की मंडलिऔ की फिकर लगी रैहबै है। 29अगर कोई कमजोर है, तौ मैं बी कमजोर हौं। जब कोई पाप मै पड़ै है, तौ मैंकै बेसानी दुख होवै है।
30अगर घमंड मैंकै कन्नोई है, तौ मैं अपनी कमजोरिऔं को घमंड करंगो। 31परभु ईसु को परम पिता परमेसर युगौं-युगौं तक धन्न है, बौ जानै है कै मैं झूँट ना बोल रओ हौं। 32#चेलौ 9:23–25जब मैं दमिसक मै हो तौ राजा अरितास के राजपाल नै मैंकै पकड़नै के ताँई दमिसकी लोगौ के सैहर मै पैहरो लगबा दओ हो। 33पर मैंकै सैहर की दिबाल की खिड़की सै पल्ला मै बिठा कै नीचे उतारो और तबई मैं उनसै बच सको।
Currently Selected:
2 कुरन्थियों 11: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
