1 TIMOTEO 5
5
1KUKAMI mwamukulu dikamu, kate umubondibondi bea tete ; mapulwa bea bena kwebe ; 2babakaxi badi babakulu bea bamama, babakaxi badi babaki bea bangasanebe, yi babala mwoso. 3Nemeka bakaxi ba bafu badi bakaxi ba bafu sôsôlwo. 4Mo ndo mukaxi mwoso a mufu udi yi ndo bana ndo bakilo, bobo beyi buxi kwebesa bena kidi kiabo bowa bwa Ncembi mikyeabo, yi kusayila bateteabo yi bamamabo ; bwalo budi noku yi nonu ku meso a Ncembi. 5You lolo udi mukaxi a mufu sôsôwo yi amakyenga, udi yi mudingidilu ănci ămadingidilayi Ncembi, yi amaxina xina yi milombelelu yi ndombu, yi ku butuku yi ku munyinya. 6Mo mwamukaxi you amakwekyela ekyela yi kiango kia paxi udi mufu isanga udi yi moyo. 7Langa bintu bebi iolo, bixeakalabo kutena bwalo kubakaminibwa dikamu. 8Mo ndo muntu mwoso kasolungika bidya bwaio bwa bantu banci, yi bwalo pako bwa bena nkumbu anci, amanyañana kwetabusa, yi amadika muntu bubi utena mwetabuxi. 9Mukasa a mufu, ndo kunamibwa ku mukanda, uxeakala kumoni muxi mwa mbula masangi asambomo, akadi mukaxi a mwamulumi umoumwe, 10amatôbôlelebwa ntôbô bwalo bwa makisa anengela ; ndo amalundisa bana, ndo amakwekyela yi kwangata kwa bena ngendo, ndo amakusula makasa a bena babala, ndo amakwapola maxitu a bena maxitu, ndo amalukutila mudimo mwoso unengela.
11Mo nyañana bakaxi ba bafu badi babaki, bwalo panakalabo yi budibi ku bwalo bwa Kalistu, bamakyeba kuya mabakwa ; 12badi yi lopelo bwalo bwamanyañanabo kwetabusa kwabo kwa buxi. 13Yi beyeya kabidi kwakala bena bixituxitu, bamakwendañana ku ncibo ku ncibo ; yi kumoni bena bixituxitu batupu, kate bena ximandwandwa kabidi yi bena kisoka, badi mu kutôya malo ataxetôyabo.
14Mbwôso ngwananga ku bwalo bwa bakaxi ba bafu badi babaki, ene, bayi mabakwa, baleli bana, banami ncibo, kabaxiyidi mutandanani kipoma kia kutangola mwotangu ; 15bwalo kwamapengowa banga bantu isanga nkyekyu kuya landa Satana. 16Aka mwamulumi mwoso ndo mwamukaxi mwoso amakwetabusa udi yi bakaxi ba bafu ku bulungu bwanci, ubadisi ; yi kikokye kakitekyebwi buxitu ; bixedisakio bantu badi bakaxi ba bafu sôsôlwo.
17Babakulu bamanama kikokye loko belekyexebwi ene, bamalelekyela yi kunemekyebwa yi diedya dingi, yi bobo pako bamakamba mu diyi yi mu bweyexi. 18Bwalo bwamatôya mukanda ă Ncembi ene, Kusuki musuku ă ñombi panyata nyatayi miebele. Yi ene, Muna mudimo amalelekyela yi difuto dienci. 19Ku bwalo bwa mwamukulu, kwombwi bwalo bwoso butena bena ntôbô badiko ndo babidi ndo basatu. 20Bobo bonona, ubakami makamu ku mpala a banlu boso, bixeakala banga bantu kabidi yi bowa.
21Nkwalanga ku mpala a Ncembi yi a Kalistu Yisu yi a bangele basungudibwi, ene, unami bintu bebi kutena kutebela mimbidi ya bantu, kumoni kwenca kintu kioso bwalo bwa kikanda. 22Kubaki makaci ebe kulu kwa muntu mangwoso, kwabanyi lolo yi mabi a banga bantu ; udinami mikyebe yi babala. 23Kunwi mai kanana kabidi, kate enca yi finyo mubende ku bwalo bwa difu diebe, yi ku bwalo bwa masama ebe a matuku mangi. 24Mabi a banga bantu adi ku meso, ayeya buxi ku lopelo ; mabi a banga bantu kabidi amabalanda. 25Mo nako makisa anengela kabidi adi ololwo ; yi aa atena ololwo kabiyi kusokokyebwa.
Currently Selected:
1 TIMOTEO 5: Luna_NT
Highlight
Copy
Compare
Share
Want to have your highlights saved across all your devices? Sign up or sign in
© La Société biblique de Genève
