Roma 15
15
Borusaha dohop dongan ika meleh borohon porocaya ma Yesus
15:1-13
1-2Ito co borohon porocaya ma Yesus sobulih dohop dulun co kurang borohon. Ito sobulih momporhati ome co pio ika dohop dongan jarin meleh borohon porocaya. Ito sobulih bousaha ngonyorih ico ma co bokon. Arohboh ito baya ngonyorih arop to tarop. 3Awi, Kristus mahi aroko bousaha ngonyorih arop-Eh tarop. Nain co tonulih ponah Surat Borasih: “Antun co hapan doh mohina Iko, yoh Mohotara, iroh hapo ika mohina akuh.”#15:3 Ingkan buku Masmur 69:9. 4Kokon aranaang co tonulih batuh ponah Surat Borasih, tonulih ina majar mara ito. Kawan bara cioh ngonohon atoi to hintang umpi ito botahan noharep kosusah. Ma iyoh, ito tomara ika to boharap ma Mohotara. 5Are iyohco Mohotara co ngorohon atoi to hintang umpi ito botahan nohimo pondoritaan. Akuh bodoa ina Are umpi ikan bolum ponah kohico sosuai ma kojere Kristus Yesus. 6Paluh, ma ico atoi hintang ico suara, ikan samah-samah lian nara Mohotara hintang Tama ingkan Yesus Kristus, Tuhan co bokuasa ma ito.
7Awi kokon iyoh, ikan sobulih hotorima ico ma co bokon samah isan Kristus ocop norima ikan. Nguanbat iyoh ina Mohotara tonara. 8Maksut kuh santuh: Hiah waktu Kristus dombut, Are molayani bangsa Yahudi ika porahan bahawa Mohotara horoholuh molalus kawan janji-Eh ma tatu hiang doh. 9Kristus mahi umpi kawan bangsa co bokon nara Mohotara awi kopomasi-Eh. Nain co tonulih ponah Surat Borasih:
“Awi iyoh, hiah waktu akuh oko hokohalo bangsa bokon ma Yahudi, akuh angar nara Iko, yoh Mohotara.
Akuh angar monyanyi ika nara aram-Mu.”#15:9 Ingkan buku Masmur 18:50 hintang 2 Samuel 22:50.
10Oko ka co tonulih nain otuh:
“Has kawan bangsa bokon ma Yahudi, bogabungboh ma bangsa co tomili Mohotara nyan ponah kojorih jerah”.
11Hintang cotuh ka:
“Heei kawan bangsa bokon ma Yahudi! Naraboh Tuhan!
Kojereboh kokon bangsa nara Are.”#15:11 Ingkan buku Masmur 117:1.
12Bokon ma iyoh ka, hiah jaman sinan nabi Yesaya mantun:
“Oko Dulun ingkan koturunan Isai co angar dombut.
Are angar momorintah ma kawan bangsa bokon ma Yahudi.
Iroh angar boharap ma-Eh.”#15:12 Isai iyohco taman Laca Daud. Koturunan co tomaksut nyan intoi iyohco Kristus. Ayat cotuh ingkan buku Yesaya 11:10.
13 Kawan konduang! Mohotara co mihi horapan indan ito. Akuh bodoa awi ikan porocaya ma Kristus, maka Mohotara angar umpi ikan korinah jorih jerah hintang bolum ma kongolandah kongolami. Akuh bodoa indam me ina kuasan Roh Mohotara umpi ikan sasar boharap ma-Eh.
Paulus monjelas alasan are nulih surat cotuh
15:14-21
14Kawan konduang kuh, akuh tuu-tuu yakin bahawa ikan korinah pio hintang monau kokon co tomorulu. Jadi, ikan hegah hotosehat. 15Tapi, akuh tenden bohanyi nulih indam me ma kosak rak ika pokingat ikan tintun pira-pira aang. Akuh bohanyi nulih uras iyoh awi Mohotara ocop porahan koboraoi-Eh ma akuh, 16iyohonon Are nyoruhan akuh jarin dulun co molayani Kristus Yesus nyan halo kawan bangsa bokon ma Yahudi. Akuh samah isan imam co mihi porsembahan hia Mohotara. Awi, akuh momborita Tarung Pio ingkan Mohotara indan doh ina doh hegah tonorima Mohotara tului Roh Mohotara umpi iroh jarin borasih ingkan dosa.
17Jadi, poko tului akuh hokohico ma Kristus Yesus, akuh nongkomo banga. Awi, akuh molayan Mohotara. 18Akuh aroko bohanyi mantun nara arop kuh tintun ome bewe co bokon, baya tintun ome co Kristus hapo akuh ika nguan. Iyohonon, Are hapo akuh ika mombimbing kawan dulun bokon ma Yahudi ina doh jarin tuhit ma Mohotara. Are hapo antun dolang kuh hintang alogawing kuh ika nguan iyoh. 19Are mahi hapo kokon macam aang co mosotahir hintang kuasan Roh Mohotara. Saniohboh caraeh akuh momborita kokon Tarung Pio tintun Kristus ingkan kota Yerusalem dapot hia derah Ilirikum. 20Akuh horoholuh jere momborita nyan kawan ika co arinai piji nyono aran Kristus. Awi, akuh aroko kolu narus polayanan co ocop tomolai dulun bokon. 21Tapi, akuh nyau ina antun cotuh co tonulih ponah Surat Borasih jarin nyata:
“Kawan dulun co arinai piji ngoneh borita tintun Are,
Iroh angar monau omeboh Are.
Kawan dulun co arinai piji ngoneh tarung tintun Are,
Iroh angar paham.”#15:21 Ingkan buku Yesaya 52:15.
Roncana Paulus ika nyari iroh nyan kota Roma
15:22-33
22Tului polayanan kuh yoh, maka derek oko holangan dapot akuh aroko lian nyari ikan. 23Tapi, makitu gawingkuh nyan kawan derah cioh ocop umbot hintang ocop pira-pira toun kotahieh akuh jere nganda ikan. 24Awi iyoh, akuh boharap boraoi nyari ikan ponah solanang kuh hia derah Spanyol. Opah akuh lian nongkomo koponganda kuh halo ikan indan pira-pira kotahieh, akuh nyawot ikan angar dohop akuh ngoholuh solanang kuh hia idi.
25Tapi, makitu akuh dahat tulak hia Yerusalem ika nucu sumbangan co ihin ika dohop kawan dulun co porocaya nyan idi. 26Awi, kawan jomaat nyan derah Makedonia hintang Akaya ocop umpi koputusan ika mihi sumbangan taiyoh ika dohop dulun porocaya co mala nyan Yerusalem. 27Ma kosanang atoi, dulun bokon ma Yahudi yoh umpi koputusan ika dohop dulun Yahudi. Mula iroh sobulih nguan iyoh awi isaieh iroh tohutang ma dulun Yahudi. Maksut kuh, dulun Yahudi oko hubungan ma Mohotara hintang iroh magi aang co pio hinut yoh ma dulun bokon ma Yahudi. Tului iyoh, dulun bokon ma Yahudi sobulih magi aang co pio hinut ingkan dunia tuh ika dohop dulun Yahudi. 28Jadi, akuh angar ngomereh tugas taiyoh. Akuh angar mihi indan doh nyan Yerusalem sumbangan co ocop tongumpur yoh. Opah iyoh, akuh angar tulak hia Spanyol hintang tondo nyan kota me ponah solanang kuh hia idi. 29Koraong kuh hiah waktu akuh dombut nyari ikan, akuh angar mehen orong aang co pio hinut ingkan Kristus indam me.
30Kawan konduang, awi ito hokohico ponah Yesus Kristus, Tuhan to, hintang tului Roh Mohotara umpi ito hokopasi, akuh nyawot asi lau ma ikan ika bodoa hia Mohotara homboh-homboh ma akuh. Dohop bodoa indang kuh 31ina Tuhan nyolindung akuh ingkan kawan dulun co aroko porocaya nyan derah Yudea co nyau ngomporoh akuh. Dohop bodoa ka ina polayanan kuh indan Yerusalem tonorima pio pian kawan dulun co porocaya nyan idi. 32Ma sanioh, amun Mohotara kuhan, akuh angar dombut hia ikan ma kosanang atoi. Hiah waktu akuh halo ikan, beti hintang atoi kuh hegah tongorohon hopuli. 33Akuh bodoa ina Mohotara horoholuh oko umba kokom me, iyohonon Mohotara co mihi kongolandah kongolami. Amin.
Currently Selected:
Roma 15: TBSS
Highlight
Copy
Compare
Share
Want to have your highlights saved across all your devices? Sign up or sign in
