Roma 14
14
Aroh posala konduang soiman
14:1-12
1Nyambutboh ma koramah dulun co incah kurang koyakin eh. Arohboh hokohojat ma are tintun kawan pondapat eh. 2Cuntueh: Oko dulun co bopikir are boraoi kuman ome bewe. Tapi oko dulun co kurang borohon porocaya baya kuman kawan sayur leh. 3Dulun co kuman ome bewe, arohboh are mohina dulun co kuman kanon co totentu yoh. Dulun co kuman kanon co totentu yoh, aroh are nyala dulun co kuman ome bewe, awi Mohotara ocop norima dulun cioh. 4Dulun cioh iyohco polayan tioh Tuhan, bokon tikan. Jadi, ikan arelu oko hak ika mutus sala atawa buah. Amun are tahak atawa tonjok, iyoh urusan Tuhan co bokuasa ma are. Tapi mositi are angar tenden buah awi Tuhan bokuasa umpi are tonjok tongkorong.
5Oko dulun co bopikir oko ondo totentu co meleh penting hangki ondo co bokon. Tapi, oko ka dulun co bopikir kokon ondo samah leh. Sika dulun sobulih yakin ponah atoieh leh bahawa are nguan ome co buah nyan tohimo Tuhan. 6Dulun co bopikir oko ondo totentu co meleh penting, are nguan iyoh ika mohormat Tuhan. Dulun co kuman ome bewe, are nguan iyoh ika mohormat Tuhan awi are bosukur ma Mohotara. Dulun co aroko kuman kanon co totentu, are nguan iyoh ika mohormat Tuhan. Are mahi bosukur ma Mohotara. 7Arelu oko dulun nyan halo ito co bolum ika ngonyorih arop eh tarop. Arelu oko dulun co matoi indan arop eh tarop. 8Tapi, amun ito bolum, ito bolum ika ngonyorih Tuhan. Amun ito matoi, ito matoi ika ngonyorih Tuhan. Jadi, amun ito bolum atawa matoi, ito iyohco tioh Tuhan. 9Iyohboh tuluieh Kristus ocop matoi hintang bolum hopuli, iyohonon ina Are jarin Tuhan co bokuasa ma dulun co ocop matoi hintang dulun co incah bolum.
10Jadi, arohboh ikan momutus sala konduang me soiman! Arohboh ikan mohina konduang me yoh! Awi, daai ito uras sobulih nohimo korusi korojaan Mohotara. Are angar nantu ome co buah hintang ome co sala. 11Oko tonulih ponah Surat Borasih:
“Tuhan mantun, ‘Ma arop-Kuh tarop sobagai Mohotara co bolum, Akuh mantun,
Uras dulun angar nukup bolutut nyan tohimo-Kuh.
Uras dulun angar mongaku bahawa Akuhboh Mohotara.’ ”#14:11 Ingkan buku Yesaya 45:23.
12Jadi ito hopomasing sobulih botangung jawab ma kokon kuan gawin to ma Mohotara
Aroh nguan aranaang co boraoi umpi konduang soiman bodosa
14:13-23
13Tului iyoh, arohboh ito hosala bat! Tapi, ito sobulih bousaha ina to aroko nguan aranaang co boraoi umpi konduang soiman nahak ponah dosa. 14Awi akuh hokohico ma Tuhan Yesus, maka koraong kuh bahawa arelu oko aranaang co pali. Akuh yakin tintun iyoh. Tapi, amun oko dulun co bopikir bahawa oko aranaang co pali, mula bagi are aang cioh pali. 15Amun ikan kuman sosuatu co konduang me bopikir pali, maka ikan ngomporoh atoieh. Artieh, ikan aroko bolum ma cara co mongasihi dongam. Kristus ocop matoi ika nyolamat konduang me yoh. Jadi, arohboh ikan umpi are lumat tului mosalah ome co kanom me. 16Aroh umpi aranaang co pio bagi ikan jarin aranaang co tomohina dongam me. 17Awi, Korojaan Mohotara aroh soal poraturan ongkun ponguman, tapi soal bolum ma kobujur, bolum ma kolandah, hintang bolum ma kojorih jerah. Kokon taiyoh ingkan Roh Mohotara. 18Dulun co molayani Kristus ma cara kobolum isan iyoh, are ngonyorih songan Mohotara hintang tomohormat kolunon.
19Awi iyoh, ito sobulih bousaha ina alogawin to umpi kokon to bolum landah. Ito sobulih bousaha dohop dongan to ika meleh borohon porocaya ma Yesus. 20Arohboh ikan morusak ome co tongompian Mohotara baya tului mosalah kanon. Arelu oko kanon co pali. Tapi, amun ikan kuman aranaang co konduang me bopikir pali, paluh aang cioh umpi are nahak ponah dosa, artieh ikan sala. 21Amun kuman daging atawa ngorih angur atawa alogawi ome bewe umpi konduang me nahak ponah dosa, meleh pio ikan aroh nguan iyoh. 22Koporocayaan me tintun poraturan isan iyoh iyohco urusan me tarop ma Mohotara. Ihin aang co pio hinut dulun co nguan ome co tomikir eh buah, hintang aroko nyala arop eh tarop. 23Tapi, amun oko dulun co ragu hintang are tenden kuman ome co tomikir eh pali, maka are sala nyan tohimo Mohotara. Awi, alogawieh bolawanan ma koporocayaan eh. Kokon aranaang co tonguan dulun, amun are aroko porocaya bahawa iyoh bujur, maka aang cioh iyohco dosa.
Currently Selected:
Roma 14: TBSS
Highlight
Copy
Compare
Share
Want to have your highlights saved across all your devices? Sign up or sign in
