Roma 13
13
Tuhit ma pomorintah
13:1-7
1Uras dulun sobulih nuhit pomorintah awi Mohotara co mihi kuasa indan doh ika momorintah. Mohotara natap kokon pomorintah co oko. 2Jadi, sika dulun co naleh pomorintah sobujur eh naleh ome co ocop tonatap Mohotara. Dulun co isan iyoh mositi tomajap. 3Tapi, dulun co umpi aang co pio aroko usah takut tomajap pian pomorintah. Baya dulun co umpi aang co jahat sobulih takut. Mainboh ikan nyau bolum aroko nyook tohimo pomorintah? Umpi aang co pio, paluh pomorintah angar nara ikan. 4Awi Mohotara hapo pomorintah ina kopiom me. Tapi, amun ikan umpi aang co jahat, ikan sobulih jarin takut ma pomorintah. Awi iroh oko kuasa ika majap ikan. Mohotara hapo pomorintah ika majap dulun co umpi aang co jahat. 5Iyoh tuluieh ikan sobulih nuhit pomorintah, aroh bewe tului ikan takut tomohukum pian Mohotara, tapi ka tului atoi me monau iyoh pio.
6Iyohboh alasan ikan sobulih nahur pajak. Awi, Mohotara hapo pomorintah ina mongurus kokon aang taiyoh. 7Nahurboh ma kokon dulun ome co sobulih tonahur me. Nahurboh kokon macam pajak hia dulun co bohak norima pajak, cukai ma dulun co bohak norima cukai. Moleka kokon dulun co sobulih tomoleka me. Hormatboh ma kokon dulun co sobulih tomohormat me.
Ma cara hopasi dongan to, ito angar molalus kokon Hukum Torat
13:8-10
8Arohboh ikan bohutang ome-bewe ma dulun comoh leh. Tapi ikan horoholuh sobulih hopasi dongam. Awi, dulun co hopasi dongai ocop molalus kokon Hukum Torat. 9Ponah Hukum Torat oko kawan porentah santuh: “Aroh hokoruh ma bakah atawa bawe co bokon ma bana atawa oruh, aroh ngompatoi, aroh nako, aroh jere tioh dongam” hintang kawan porentah bokon. Kokoieh samah ma ico porentah cotuh: “Ikan sobulih hopasi ma kokon dulun samah isan iko masi arop mu leh.”#13:9 Ingkan buku Koluaran 20:13-15,17; Imamat 19:18, hintang Ulangan 5:17-19,21. 10Amun dulun hopasi kawan dulun bokon, are aroko angar umpi jahat tohimo iroh. Jadi, ma hopasi samah arop eh, dulun ocop nuhit kokon Hukum Torat.
Bolum ma cara co ngonyorih Mohotara awi aroko tahi oni Yesus angar hopuli
13:11-14
11Ikan sobulih nguan kokon iyoh awi ikan monau jaman cotuh iyohco kawan ondo torahir. Ondo co punan to porocaya ocop ohut. Ondo ika to tonyolamat ocop meleh dokin. Jadi, ikan sobulih siap hintang umpi aang co pio samah isan dulun co monyun ingkan irui. 12Mamalom ocop jonyo ohut hintang sonyulu oni matan ondo angar nyomput. Jadi, ito sobulih umbot umpi aang co jahat hintang ito sobulih umpi aang co pio ika ngolawan kuasan kopindong. Samah isan ito polangkap arop to ma capa co hapan ika hokohojat indan kopandau. 13Ito sobulih bolum ma cara co patut isan dulun co bolum ponah kopandau. Arohboh ito bopesta pora hintang buso hokorih. Arohboh ito umpi dosa hokoruh hintang ngumba kojere beti co jahat. Arohboh atoi to bosingon hintang hojat hojawap. 14Tapi, ito sobulih jarin samah isan Tuhan Yesus Kristus hintang horoholuh tumun Are. Arohboh ito bopikir bat tintun caraeh ika nyumpu kojere kolunon.
Currently Selected:
Roma 13: TBSS
Highlight
Copy
Compare
Share
Want to have your highlights saved across all your devices? Sign up or sign in
