Roma 12
12
Cara bolum co ngonyorih Mohotara
12:1-21
1Tului kokon iyoh, Kawan konduang, akuh nyawot asi lau ma ikan: Awi Mohotara porahan kopomasi ma ikan, maka ikan sobulih nyarah arop me ma Mohotara soolah-olah kobolum me kurban indai-Eh. Ikan sobulih bolum ma cara co borasih ingkan dosa hintang ngonyorih Are. Iyohboh cara co buah ika nyembah Are. 2Arohboh ikan ngumba cara bolum kawan dulun bokon nyan dunia tuh. Tapi olu Mohotara mongubah cara pikiran me jarin baa. Ma sanioh, ikan hegah monau ome co tongonyere Mohotara, iyohonon ome co pio, ome co ngonyorih Are, hintang ome co somporaka.
3 Akuh jarin rasul awi Mohotara porahan koboraoi-Eh ma akuh. Jadi, akuh mantun otuh ma kokom me: Arohboh ikan mangap arop me meleh penting hangki co sopantas eh. Tapi, ikan sobulih monilai arop me ma korandah atoi. Mohotara mihi komampuan husus indam me hopomasing awi ikan porocaya ma Yesus. 4Ito samah isan ico beti co orong anggota. Aroko kokon anggota taiyoh empun tugas co samah. 5Sanioh ka ma ito. Ito mula orong, tapi ito samah isan ico beti ponah Kristus. Hopomasing ito oko hubungan ma anggota co bokon. 6Mohotara porahan koboraoi-Eh, mihi komampuan husus co bobeda ma ito hopomasing. Amun oko dulun co ihin komampuan husus ika porapot tungon ingkan Mohotara, are sobulih nguan iyoh sosuai ma koporocayaan eh. 7Amun Mohotara mihi ma ico beti dulun komampuan ika dohop kawan dulun porocaya, maka dulun cioh sobulih dohop ma ko tuu. Amun Are mihi ito komampuan ika majar mara, ito sobulih majar mara. 8Amun oko dulun co ihin komampuan husus ika mihi somangat indan dongai, are sobulih mihi somangat. Dulun co ihin komampuan husus ika mihi aang co are empui ma dongai, are sobulih umpi iyoh ma komohian atoi. Dulun co ihin komampuan husus ika momimpin, are sobulih tukoi nguan eh. Dulun co ihin komampuan husus ika poleha kopomasi ma dongai, are sobulih umpieh ma kojorih.
9Kokon ikan sobulih bujur-bujur hopasi dongam. Arohboh bopura-pura leh. Ikan sobulih ngodolee co jahat hintang nguanleh co pio. 10Ikan sobulih hopomasi sobagai ico koluarga hintang hotosoun ponah mihi hormat. 11Arohboh mongkan tapi oluboh roh mu bosomangat bogawi molayani Tuhan. 12Jorih jerah boh awi ikan yakin boharap ma Tuhan. Ikan sobulih botahan nohimo kosusah hintang horoholuh bodoa. 13Dohopboh mondakan koporuluan kawan dulun porocaya ma Kristus. Atoi me sobulih horoholuh sanang norima dulun porocaya ponah lopo. 14Amun oko kawan dulun co nyiksa ikan, nyawotleh hia Mohotara ina Are mihi aang co pio hinut indan doh. Yoh, nyawotleh ina Mohotara mihi aang co pio hinut indan doh. Aroh nyawot ina Mohotara majap iroh! 15Umba boh jorih ma kawan dulun kotika iroh jorih, hintang umbaboh jorung ma kawan dulun sowaktu iroh jorung. 16Bolumboh ponah kohokohico. Aroh bolecak tapi hojolahan boh ma kawan dulun co tomangap aroko penting. Arohboh bopikir ikan ocop monau kokon aranaang.
17Amun oko kawan dulun co umpi kojahat ma ikan, arohboh ikan maleh umpi kojahat ma iroh. Tapi, umpi kopio tohimo uras dulun. 18Soboraoi mungkin, amun iyoh bogantung ma iko, bolum akur boh ma kokon dulun. 19Kawan konduang co tongasih kuh! Aroh ikan leh maleh dendam. Tapi olu Mohotara co mohukum kawan dulun bokon. Awi, oko co tonulih ponah Surat Borasih: “Tuhan mantun, ‘Baya Akuh leh co bohak maleh. Akuh angar mohukum iroh!’ ”#12:19 Ingkan buku Ulangan 32:35. 20Jadi, hangki ikan maleh, amun musuh me dou, mihi are kanoi. Amun are haus, mihieh korih. Ma sanioh, ikan nujuk bahon apui nyan tungkui kuhung eh.#12:20 Kiasan cotuh boraoi borati: ‘Iko umpi ina are siap ika tomohukum Mohotara daai’ ATAWA ‘Iko umpi are jarin mohaan tarop’. Ingkan buku Amsal 25:21-22. 21Amun ikan umpi aang co jahat tului dulun umpi kojahat ma ikan, borati kuasa jahat ngalah ikan. Aroh sanioh, kawan konduang! Ikan sobulih umpi aang co pio ika ngalah kuasa jahat.
Currently Selected:
Roma 12: TBSS
Highlight
Copy
Compare
Share
Want to have your highlights saved across all your devices? Sign up or sign in
