Roma 11
11
Incah oko tonga dulun Israel co percaya
11:1-10
1Akuh ngisok: Mainboh Mohotara ocop kuloi umat-Eh dulun Israel? Samah sindo aroh! Awi, akuh dulun Israel hintang Mohotara aroko kuloi akuh. Akuh ingkan koturunan Abraham, ingkan suku Benyamin. 2Mohotara aroko kuloi umat-Eh co ocop tomili-Eh ingkan sinan. Mositi ikan mingkat antun nabi Elia co tonulih ponah Surat Borasih. Hiah waktu are ngadu ma Mohotara tintun dulun Israel. Hieeh, 3“Tuhan, iroh ocop ngompatoi kawan nabi-Mu hintang mohancur kawan ika mapang komolum kurban porsembahan indam-Mu. Baya akuh leh co incah bolum. Makitu, iroh rahat nganyap akuh ika doh ngompatoi akuh!” 4Tapi ome useh Mohotara ma Elia? Mohotara mantun, “Incah oko pitu ribu beti dulun co tomili Kuh jarin husus ta-Kuh. Iroh aroko piji bosujut nyembah dewa Baal.”#11:2-4 Kesah cotuh oko nyan buku 1 Raja-raja 19:1-18.
5Isanioh ka nyan jaman makitu. Oko pira-pira kuhat dulun co tomili Mohotara awi tului Are pio songai ma iroh, 6aroh tului iroh umpi aang co pio. Sompamaeh, Mohotara mili dulun tului iroh umpi aang co pio, maka iyoh borati Mohotara aroko bujur-bujur porahan koboraoi atoi-Eh. 7Jadi kosimpulan eh santuh: Dulun Israel nganyap cara ika jarin buah nyan tohimo Mohotara. Tapi pokongorong ingkan iroh aroko ngohabaeh. Baya isut co ngohabaeh, iyohonon kawan dulun co tomili Mohotara. Kokon dulun co bokon, Mohotara umpi atoi doh makeng. 8Nain co tonulih ponah Surat Borasih:
“Mohotara umpi ina doh aroko kolu paham tintun cara bolum co buah.
Dapot ma ondo tuh ka, matan doh aroko bujur-bujur noto.
Tolingan doh aroko bujur-bujur ngoneh.”#11:8 Ingkan buku Ulangan 29:4 hintang Yesaya 29:10.
9Laca Daud mahi mantun,
“Tuhan, maleh hintang majap alogawin doh co jahat.
Olueh kokon aang co pio hinut indan doh jarin isan jeret indan doh dapot iroh colaka.
10Umpiboh iroh bobuto ika doh aroko boraoi noto ome co angar tojadi ma iroh.
Umpiboh iroh mondorita dapot likut doh sokotahieh bungkuk awi nangung beban co korinah bahat.”#11:9-10 Ingkan buku Masmur 69:23-24.
Dulun bokon ma Yahudi haba kosempatan jarin umat Mohotara tului dulun Yahudi aroko porocaya
11:11-15
11Jadi, orong dulun Yahudi jarin ocu ingkan Mohotara. Tapi akuh ngisok: Mainboh iyoh tojadi ina doh aroko bodai hopuli ma Mohotara? Samah sindo aroh! Awi iroh bodosa kuloi Yesus, maka kawan bangsa co bokon ihin kosempatan ika norima Yesus hintang jarin solamat. Iyoh tojadi ina atoi dulun Yahudi jarin bosingon, jere ihin aang co pio hinut ka samah isan kawan bangsa co bokon yoh. 12Kawan bangsa bokon nyan dunia ihin aang co pio hinut tului dulun Yahudi bodosa, gagal nontumun kojere Mohotara. Amun sanioh, mositi aang co pio hinut eh angar meleh orong kole amun dulun Yahudi hopuli kole ma Mohotara.
13Makitu, co opah otuh akuh mantun ma ikan co ingkan kawan bangsa bokon ma Yahudi. Awi akuh iyohco rasul co molayani kawan dulun bokon ma Yahudi, maka akuh nara polayanan kuh yoh. 14Ma isanioh akuh mungkin lian umpi bangsa takuh leh ngomohu, ina molalui akuh Mohotara angar nyolamat pira-pira dulun ingkan iroh. 15Hiah waktu Mohotara kuloi bangsa Yahudi, kawan dulun bokon nyan dunia haba kosempatan ika jarin ngolandah ma Mohotara. Jadi, nyan waktu Are norima bangsa Yahudi hopuli kole, mositi iyoh angar samah isan iroh matoi tapi jarin bolum hopuli.
Dulun bokon ma Yahudi aroko boraoi bolecak
11:16-24
16Amun bagian portama ingkan koponampa rute jarin husus tioh Mohotara, maka kokon rute cioh jarin husus tioh Mohotara. Sanioh ka ma bangsa Yahudi. Kawan dulun Yahudi co portama samah isan akat nyan puun jaitun co tomolohara. Awi iroh jarin akat co husus tioh Mohotara, maka kawan paka batang taiyoh mahi jarin husus tioh Mohotara. 17Tapi oko pira-pira dulun Yahudi co aroko porocaya ma Yesus. Iroh samah isan kawan pakaeh co ocop tomolok ingkan batang cioh. Tapi ikan dulun bokon ma Yahudi co porocaya samah isan tondut ingkan batang jaitun co horayap co nganti kawan paka taiyoh. Samah isan tondut tomoncangkok hintang lian bolum ingkan kitan akat batang jaitun cioh, sanioh ka ikan jarin umat Mohotara hintang ngohaba aang co pio hinut ingkan kokon co tomonjanji indan kawan dulun Yahudi co portama. 18Awi iyoh, aroh ikan jarin bolecak hintang moremeh kawan paka co tomolok taiyoh. Aroh solingo! Ikan baya paka leh. Paka aroko mihi kobolum indan akat, tapi akat co mihi kobolum indan paka.
19Tapi mungkin ikan dulun bokon Yahudi angar mantun, “Kawan paka cioh tomolok ina kaih lian nganti iroh!” 20Mula iyoh bujur. Tapi mingkat bahawa iroh tomolok tului iroh aroko porocaya ma Yesus. Mohotara norima ikan tului ikan porocaya. Jadi, arohboh bolecak bahawa ikan nganti iroh. Tapi nyongkoboh ma Mohotara! 21Awi, iroh iyohco kawan paka asli, tapi Mohotara tatap molok iroh. Aroh bopikir Mohotara aroko piji angar umpi iyoh ma ikan. 22Jadi, ito lian kito bahawa Mohotara pio atoi tapi Are mahi tegas amun dulun sobulih tongohukum. Are botindak tegas tohimo kawan dulun Yahudi yoh co aroko porocaya. Tapi Are pio atoi tohimo ikan, asal ikan tenden bolum ponah koboraoi Mohotara yoh, amun aroh, ikan mahi angar tomolok. 23Tapi amun iroh jarin porocaya ma Yesus, maka iroh mahi angar tomoncangkok hopuli. Awi, Mohotara bokuasa ika nguan iyoh. 24Ikan iyohco kawan paka ingkan batang jaitun horayap. Tapi ikan tomoncangkok nyan batang jaitun co asli. Oluco aang cioh aneh, Mohotara tenden nguan iyoh. Jadi, mositi meleh sutir bat, amun kawan paka asli yoh tomoncangkok hopuli nyan batang jaitun doh leh.
Kojekaieh orong dulun Yahudi angar tonyolamat
11:25-32
25Kawan konduang! Ina me aroko bopikir ikan ocop monau kokon aranaang, maka akuh nyau mara ma ikan tintun roncana Mohotara cotuh co sinan aroko tomonau kolunon: Tonga bangsa Israel ocop jarin makeng atoi, aroko kolu porocaya ma Yesus. Tapi, koadaan cotuh baya dapot kuhat dulun ingkan bangsa bokon ocop dombut hia Mohotara, iyohonon kuhat eh co ocop tonantu-Eh. Opah iyoh, kokon bangsa Israel angar dombut hopuli hia Are. 26Ma sanioh, ngolauh bangsa Israel angar tonyolamat. Nain antun Mohotara cotuh co tonulih ponah Surat Borasih:
“Oko Ponyolamat co angar dombut ingkan lungkuh Sion.
Are angar mohapus kokon kojahatan ingkan koturunan Yakup.”#11:26 Ingkan buku Yesaya 59:10.
27“Ononboh pojanjian-Kuh ma iroh:
‘Akuh angar molalus pojanjian cioh ma iroh, hiah waktu Aku mongampun dosan doh’.”#11:27 Ingkan buku Yeremia 31:33-34.
28Makitu, orong dulun Yahudi jarin musuh Mohotara tului iroh aroko kolu porocaya Tarung Pio. Ma sanioh, ikan dulun bokon ma Yahudi lian ihin aang co pio hinut. Tapi, Mohotara incah masi kawan dulun Yahudi yoh awi iroh ingkan bangsa co tomili-Eh. Iyoh sosuai ma pojanjian co tongompiai-Eh ma taman loluhur doh. 29Awi, amun Mohotara bojanji ina mili hintang mihi aang co pio hinut ma dulun, Are aroko ngomalang janji cioh. 30Batuh, ikan bokon ma Yahudi aroko tuhit ma Mohotara. Tapi tului dulun Yahudi aroko tuhit, maka Mohotara porahan kopomasi ma ikan dulun bokon ma Yahudi. 31Sanioh ka angar tojadi ma kawan dulun Yahudi. Makitu iroh aroko tuhit. Tapi ma iroh kito Mohotara porahan kopomasi ma ikan, maka iroh angar kolu borubah ina Mohotara porahan kopomasi ma iroh ka. 32Oko waktueh Mohotara umpi ina sika bangsa aroko tuhit ma-Eh. Are nguan iyoh ina Are boraoi porahan kopomasi ma kokon doh.
Koponara indan Mohotara awi roncana-Eh bohimat lau
11:33-36
33O, korinah bohimat lau aang co pio hinut ingkan Mohotara! Akar pikir-Eh jalom lau! Tomonau-Eh soanteru aranaang! Arelu oko dulun co lian nyolidik kawan koputusan-Eh! Arelu oko dulun co hegah paham kawan roncana-Eh!
34“Arelu oko dulun co hegah monau pikiran Tuhan!
Arelu oko dulun co hegah mihi nosehat indai-Eh!”#11:34 Ingkan buku Yesaya 40:13.
35“Arelu oko dulun co piji mihi aranaang indai-Eh,
dapot Are sobulih nahur kantieh!”#11:35 Ingkan buku Ayub 41:11.
36Mohotara co moncipta kokon aranaang. Kokoieh ingkan Mohotara hintang indan Mohotara. Tonaraboh Mohotara indan sumong kototahieh! Amin.
Currently Selected:
Roma 11: TBSS
Highlight
Copy
Compare
Share
Want to have your highlights saved across all your devices? Sign up or sign in
