Roma 10
10
1Kawan konduang, atoi kuh bolingu lau ina bangsakuh dulun Yahudi tonyolamat. Iyohboh doakuh hia Mohotara. 2Awi, koraong kuh iroh tuu-tuu bousaha nuhit Mohotara, tapi iroh aroko bujur-bujur paham. 3Iroh aroko paham caraeh Mohotara umpi dulun jarin bujur nyan tohimo-Eh, hintang iroh nyuwah ngumba cara doh leh. Jadi, iroh aroko kolu norima cara co tonantu Mohotara yoh. 4Tapi Kristus molalus tujuan ingkan Hukum Torat. Jadi, kokon dulun co porocaya ma-Eh jarin bujur nyan toharep Mohotara.
Ome bewe co porocaya ma Yesus lian tonyolamat
10:5-13
5Musa nulih tintun jarin bujur ma cara nuhit Hukum Torat. Hieeh, “Kawan dulun co nontumun Hukum Torat angar bolum sosuai ma Hukum cioh.”#10:5 Ingkan buku Imamat 18:5. 6Tuhboh ayat Surat Borasih co oko tonulih tintun cara Mohotara umpi dulun hokompio hopuli ma arop-Eh bodasar porocaya ma-Eh: “Aroh ngisok ponah atoimu, ‘Omeboh co angar nukat hia sorga?’ ” (Ika mehen Yesus nosuloh hia dunia.) 7“Atawa, ‘Omeboh co angar nosuloh hia lowu liou?’ ” (Ika mehen Yesus bolum hopuli ingkan pompatoi.) 8Tapi santuhboh tonulih nyan Surat Borasih, “Tungon co tomantun Mohotara yoh dokin lau ma ikan, hintang ikan ocop mantun tungon cioh kawun norimaeh ponah atoi me.” Ciohboh tungon co tomomborita kaih, iyohonon tungon co mantun bahawa ikan sobulih porocaya ma Mohotara.#10:8 Ingkan buku Ulangan 30:12-14. Musa bopander tintun Antun Mohotara co dokin ma iroh. Paulus hapo ayat cioh indan maksut bahawa iroh ocop tomara tintun cara jarin bujur nyan tohimo Mohotara, iyohonon ma porocaya ma Kristus. 9Awi, amun ikan mongaku ma baum me bahawa Yesus iyohco Tuhan co bokuasa hintang porocaya ponah atoime bahawa Mohotara umpi Are bolum hopuli ingkan pompatoi, maka ikan tonyolamat. 10Awi amun ito porocaya ma Kristus ma atoi sohingga Mohotara ngompio hubungan to ma Are, hintang ma baun to mongaku bahawa Kristus iyohco Tuhan sohinga Mohotara nyolamat ito. 11Nain antun cotuh co tonulih nyan ponah Surat Borasih: “Kokon dulun co porocaya ma-Eh, aroko piji angar jarin mohaan bahawa iroh porocaya.”#10:11 Ingkan buku Yesaya 28:16. 12Iyoh bolaku indan kokon dulun, awi dulun Yahudi hintang dulun bangsa bokon tonyolamat ma cara co samah. Awi, baya oko ico Tuhan indan kokon dulun. Are korinah boraoi ma kokon dulun co nyawot dohop ma-Eh. 13Nain antun cotuh co tonulih nyan Surat Borasih: “Ome bewe co nyawot dohop ma Tuhan angar tongawat.”#10:13 Ingkan buku Yoel 2:32.
Orong dulun Yahudi ngoneh Tarung Pio tintun Yesus tapi aroko kolu porocaya
10:14-21
14Tapi aroko bodai dulun boraoi nyawot dohop ma Are amun iroh arinai porocaya ma-Eh. Aroko bodai iroh porocaya ma-Eh amun iroh arinai piji ngoneh tintun Are. Aroko bodai iroh ngoneh tintun Are amun arelu oko dulun co momborita tintun Are? 15Aroko bodai dulun lian momborita tintun Are amun dulun cioh aroko tonyoruhan ika momboritaeh. Nain antun cotuh co tonulih nyan Surat Borasih: “Korinah ngonyorih amun oko dulun co dombut mehen tarung pio!”#10:15 Ingkan buku Yesaya 52:7.
16Tapi, aroko kokon dulun norima Tarung Pio yoh. Nain antun nabi Yesaya: “Tuhan, omeboh co porocaya ma co tomomborita kaih?”#10:16 Ingkan buku Yesaya 53:1. 17Iyoh tuluieh kawan dulun jarin porocaya awi iroh ngoneh borita, hintang borita tongoneh awi oko dulun momborita tintun Kristus.
18Tapi maindeoi ma dulun Yahudi? Mainboh iroh arinai piji ngoneh Tarung Pio yoh? Mositi iroh ocop ngoneh iyoh! Nain antun cotuh co tonulih nyan Surat Borasih: “Kawan dulun ocop momborita hia ngolauh dunia. Antun doh ocop tosebar nyan ngolauh dunia.”#10:18 Ingkan buku Masmur 19:5. 19Tapi, mainboh dulun Israel aroko boraoi paham tarung cioh? Mositi iroh lian paham! Portama-tama oko antun Mohotara cotuh co tongorapot pian Musa ma bangsa Israel: “Akuh angar umpi atoi me jarin bosingon tohimo kawan bangsa bokon co sinan aroko nyono Akuh. Hintang Akuh angar umpi ikan jarin bosopo ma bangsa co aroko paham ome-ome.”#10:19 Ingkan buku Ulangan 32:21. 20Bokon ma iyoh ka, nabi Yesaya bohanyi ngorapot antun Mohotara cotuh: “Akuh umpi ina kawan dulun co aroko nganyap Akuh ocop boraoi nyono Akuh. Kawan dulun co aroko ngisok tintun omeboh Akuh, Akuh ocop poleha arop-Kuh ma iroh.”#10:20 Ingkan buku Yesaya 65:1. 21Tapi tintun bangsa Israel, nabi Yesaya ngorapot antun Mohotara cotuh: “Hondo homalom Akuh ocop nyompakat bangsa cioh ika hopuli ngonyorih atoi-Kuh. Tapi iroh aroko tuhit hintang horoholuh naleh Akuh.”#10:21 Ingkan buku Yesaya 65:2.
Currently Selected:
Roma 10: TBSS
Highlight
Copy
Compare
Share
Want to have your highlights saved across all your devices? Sign up or sign in
