Иона 2
2
Иона абарга загаһанай хото сооһоо Эзэндэ зальбарна
1Эзэн абарга загаһанда хандажа, Ионые залгихыень захирба. Иона энэ загаһанай хото соо гурбан үдэр, гурбан һүни байба. 2Иона абарга загаһанай досооһоо Эзэндээ зальбарба:
3Гашуудалайнгаа хэмгүй ехэдэ Эзэнээ дуудабаб,
Тэрэ намайе анхарбал;
үхэлэй оронһоо би хашхархаб,
Та минии гуйлтые дуулабат.
4Та намайе гүн руу, далайн оёор руу оруулбат,
урасхалта долгид намайе хүреэлөөл,
Танай уһан, Танай долгид нам дээгүүр үнгэрнэл.
5Удаань би иигэжэ хэлэбэб:
Би Танай үмэгшэлгэһөө зайсуулагдааб,
гэбэшье би Танай нангин Ордон дахинаа харахалби!
6Сэдьхэлыем уһан эзэмдээл, гүн уһан баринал намайе;
далайн замаг толгойем боонол.
7Далай соохи уулын хормой хүрэтэр буубалби,
газар бата хаалтаараа намайе хэтэдээ хаагаа;
Та, Эзэн Бурхамни, ами наһыем үргэн гаргыт нүхэнһөө!
8Үхэхэ туйлдаа хүрэжэ байхадаа,
Таниие – Эзэнээ дурсааб,
Танда, нангин Ордондотнай минии гуйлта хүрөөл.
9Хооһон шэнжэтэй, хуурмаг бурхадта шүтэгшэд
өөрынгөө Энэрилтые орхёол.
10Харин би Танда магтаалай дээжые хүргэн мүргэнэлби,
найдуулһанаа би заатагүй дүүргэхэб:
абарални Эзэнһээ ерэхэл!
11Эзэн абарга загаһанда захирба, тиихэдэнь тэрэ Ионые газар дээрэ гарган гулдижархиба.
Currently Selected:
Иона 2: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
