Амоос 9
9
Үргэлэй шэрээ дээрэ зогсоһон Эзэн Бурхан үзэгдэлдэ харагдаба
1Эзэн Бурханиие хараа һэм. Үргэлэй шэрээ дээрэ зогсоод, Тэрэ айладаа:
Богоһын доһолтор баханын дээрэһээ сохи!
Зоной толгой дээрэ Һүмэ унаг лэ!
Амиды үлэгшэдые һэлмээр усадхахаб,
хэншье Намһаа зугадан тэрьедэжэ шадахагүй,
хэншье амиды үлэхэгүй!
2Үхэлэй орон руу хороошье һаань,
тэндэшье тэдэниие олохоб.
Огторгой руу дэгдээшье һаань,
тэндэшье мүн лэ хүрэхэб.
3Кармээл уулын орой дээр хороошье һаань,
оложо, тэдэниие барихаб.
Далайн оёорто Намһаа хоргодоошье һаань,
могой эльгэжэ хадхуулхаб.
4Дайсан тэдэниие баряанда абаашаба гэлэй,
сэрэг хойноһоонь эльгээхэдэм, һэлмээр тэдэ усадхагдаха,
жаргал бэшэ, гай тодхор тэдээндэ ушаруулхаяа
харасаа тэдээн руу шэглүүлхэб.
Бурханай һүр жабхалан
5Түмэн Сэрэгтэ Эзэн газарта халта хүрэбэл,
тэрэнь гуйбалзаха, ажаһуугшадынь бултадаа гашуудаха.
Нил мүрэн мэтэ газар дээшээ хэлбэлзээд,
Египедэй Нилдэл адли һөөргөө номгорхо.
6Огторгой руу гэшхүүр байгуулааша,
газар дэлхэйдэ Өөрын үргөө бата һуурижуулагша
далайн уһа дууһан суглуулжа,
газар дайдаар адхан тараагша Нэгэнэй нэрэ – Эзэн!
Израиль бусад арадуудһаа юугээрээ дээрэб?
7Эзэн иигэжэ айладана:
Израильшууд, таанар Намда Күүшэй зондол адлит.
Египедһээ израильшуудые, Каптоорһоо Пилиштын арадые,
Киирһээ араамшуудые асараа һэм.
8Би, Эзэн Бурхан, Өөрын харасаа
энэ нүгэлтэ хан түрэ руу шэглүүлбэб!
Газарай хүрьһэнһөө энэ хан түрые үгы хэхэб,
гэбэшье Яковай гэр бүлэ усадхахагүйб.
9Захиржа, Израилиие бүхы арадуудай дундуур сасахаб,
һагшуураар һагшаһандал, нэгэшье шулуу үлөөнгүй һагшахаб.
10«Гай тодхор болохогүй,
маанадта тэрэ хүрэхэгүй» гэжэ
арад түмэнэйм дундаһаа хэлээшэ нүгэлтэд
бултадаа һэлмээр сабшагдаха!
Израиль ерээдүй сагта һэргээн бодхоогдохо, һалбаран мандаха
11Тиихэдэнь Би Давидай унаһан майханиие дахин бодхоохоб,
ханын соорхойнуудые бүглэхэб,
һандарһые дахин бүрин бүтэн болгохоб,
урдандань адляар заһабарилхаб.
12Эдоомой үлдөөсэ зонһоо болон бусадһаа газар буляан абажа,
арад түмэндөө дамжуулхаб.
Бусад угсаатан бултадаа Минии хүнүүд болохоор дуудуулһан гээшэ!
Эдэ бүгэдые бултыень үйлэдэдэг Би, Эзэн, айладажа байнам!
13Эзэн айладана:
Газар элдүүрилжэ үрдеэгүйдэнь ургаса хуряаха саг ерэхэ,
уһан үзэмэй модо тарижа байхада,
жэмэс шахаха, үзэмэй дараһан архи үйлэдбэрилхэ саг мүндэлхэ.
Үзэмэй дараһан архи хадаһаа урдаха, гүбээнүүд зөөлэн жэмэс болохо!
Удахагүй иимэ саг ерэхэ.
14Өөрын арад түмэн Израильда урданайнь һалбарал бусаахаб:
хооһорһон хотонуудые тэдэ дахин шэнээр барижа, зониие байрлуулха;
уһан үзэмэй модо һуулгажа, үзэмэй дараһан архи ууха;
сэсэрлиг ургуулжа, жэмэс эдихэл!
15Түрэл дайдадань өөһэдыень батаар һуурижуулхаб,
тиихэдэм, тэдээндэ үршөөһэн газарһаам хэншье
тэдэниие һуга татан гаргажа шадахагүй!
Иигэжэ танай Эзэн Бурхан айладана гээшэ.
Currently Selected:
Амоос 9: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
