Амоос 7
7
Таршаа шумуул, гал бороо болон хүнгэн сагаан түмэртэй гурбан үзэгдэл
1Эзэн Бурхан намда иимэ үзэгдэл үзүүлбэ: үбһэ сабшалгын удаа, хожом тариһан ургасын эдеэшэхэдэ таршаа шумуулые Тэрэ бии болгоно хэбэртэй. 2Таршаа шумуул дэлхэйн бүхы ургамал эдижэ һалгаахадань, би иигэжэ зальбарааб: «Эзэн Бурхан, үршөөгыт! Яковай үри һадаһан амиды мэндэ үлэхэ гээшэ гү? Тэдэ угаа үсөөн шуу». 3Эзэн шиидхэбэреэ хубилгажа, «Иимэ юумэн болохогүй!» – гэжэ айладхаа.
4Эзэн Бурхан намда иимэ юумэ үзүүлээ: Тэрэ гал бороо дуудана хэбэртэй. Тэнгис далай дүрэлзэбэ, хубинь шатажа дууһаба. 5Би иигэжэ зальбарбаб: «Эзэн Бурхан, иимэ юумэ бү хыт. Яковай үри һадаһан амиды мэндэ үлэхэ юм аал?!» 6Эзэн шиидхэбэреэ хубилгаба. «Энэшье болохогүй» – гэжэ Эзэн Бурхан айладаа бэлэй.
7Тэрэ намда иимэ үзэгдэл үзүүлбэ: Эзэн Өөрөө хүнгэн сагаан түмэр ханын дэргэдэ байна, гартань хүнгэн сагаан түмэр. 8Эзэн намһаа:
– Юу хаража байнаш, Амоос? – гэжэ асууба.
– Хүнгэн сагаан түмэр, – гэбэб.
– Өөрын арад түмэн Израилиие удахагүй хүнгэн сагаан түмэр мэтэ болгохоб! Би тэдэниие дахин хүлисэхэеэ болёоб.
9Исаагай нангин зүйлнүүд үгырэн-хооһорон байха, Израилиин нангин юумэнүүд һандарал болохо. Еробоһаамай бүлын урдаһаа һэлмэеэ һугалан далайхаб! – гэбэ.
Амоос болон Бэт-Ээлэй санаартан Амацияа
10Бэт-Ээлэй санаартан Амацияа Израилиин хаан Еробоһаамда иигэжэ дамжуулба:
– Израильшуудай дунда буһалгаа шинии урдаһаа хэхэеэ Амоос бэлдэжэ байна. Орон нютаг тэрэнэй үгэ хүүр шагнаха дурагүй болонхой. 11«Еробоһаам һэлмээр сабшагдаха, Израиль хариин газар руу баряанда ошохо», – гэжэ Амоос хэлэжэ байна.
12Амацияа Амоосдо:
– Зүгнэгшэ, энэ дары Иуда руу яба! Тэндэ зүгнэжэ, хоолоо оложо бай! 13Бэт-Ээлдэ лүндэн бэшэ бү таби! Энэ болбол хаанай нангин газар, улас түрын нангин үргөө, – гэбэ.
14Амоос Амацияада:
– Лүндэншэ бэшэб, лүндэшын угайшье бэшэб. Мал харууһалжа, шикмаа модо ургуулжа байдаг хүмби. 15Теэд Эзэн намайе хонидһоомни таһалжа, «арад түмэн Израильдам лүндэн таби» гэжэ захираа. 16Мүнөө ши Эзэнэй айладхал шагна! «Израильда лүндэн бү таби, Исаагай гэр бүлэдэ бү тунхагла» гэнэш.
17Тиимэһээ Эзэн иимэ айладал дуулгана:
«Һамганшни янхан эхэнэр болохо,
үхи хүүгэдшни һэлмээр усадхагдаха,
газар хэмжэгшэ газарыеш бусадта хубаан тарааха,
өөрөө ши нангин бэшэ газарта хосорхош.
Израиль баряанда хариин дайда руу туугдаха!»
Currently Selected:
Амоос 7: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
