ማቶሳ 5

ደረ ቦላ ታማርስዳ ትምርተ

1ዳሮ ደረይ ሺቅዳይሳ የሱሲ በእዳ ዎደ ዙማ ቦላ ከይድ ኡትስ። እያ ታማረት እያኮ ሺቅን፥ 2ሀይሳዳ ያግድ ታማርስስ፦

ቱማ ኡፋይስ

(ሉቃ 6:2-23)

3“ባንታ አያናን ማንቆት አንጀትዳይሳታ፥

ሳሎ ካዎተይ ኤንታሳ።

4ዬከይሳት አንጀትዳይሳታ፥

ኤንቲ ምን ደማና።#እሳ 61:2.

5ባንታ ዎዛናን አሽከት አንጀትዳይሳታ፥

ኤንቲ ሳኣ ላታና።#ማዝ 37:11.

6ፅሎባ ኦናዉ ኮሻተይሳትነ ሳሞተይሳት አንጀትዳይሳታ፥

ኤንቲ ካላና።#እሳ 55:1.

7ማረይሳት አንጀትዳይሳታ፥

ኤንቲ ማሮተ ደማና።

8ዎዛና ጌሻት አንጀትዳይሳታ፥

ኤንቲ ፆሳ በአና።#ማዝ 24:3.

9ስገይሳት አንጀትዳይሳታ፥

ኤንቲ ፆሳ ናይታ ጌተትድ ፄገታና።

10ፅሎባ ኦያ ግሾ ግድ፥

ጎደተይሳት አንጀትዳይሳታ፥

ሳሎ ካዎተይ ኤንታሳ።#1 ጰፅ 3:14.

11“አሳይ ህንተና ታ ግሾ ግድ ጫይያ ዎደ፥ ጎድያ ዎደነ ህንተ ቦላ ኢታባ ኡባ ዎርዶን ኦድስያ ዎደ ህንተ አንጀትዳይሳታ።#1 ጰፅ 4:14. 12ህንተ ዎይቶይ ሳሎን ግታ ግድያ ግሾ ኡፋይትተ፥ ሀሹ ጊተ። ህንተፈ ካሰ ደእያ ናበታ ሄሳዳ ጎድዶሶና።#2 ታር 36:16፤ ሀዋ 7:52.

ማፅነነ ፖኦ

13“ህንተ ቢታስ ማፅነ፤ ማፅነይ ባ ማፅነተ አግኮ፥ ባ ማልኦተ ዋት ዛር ደማኔ? ካረ ሆልን አሳን የታናፐ አትሽን፥ አይብስካ ማደና።#ማር 9:50፤ ሉቃ 14:34-35.

14“ህንተ ቢታስ ፖኦ፤ ዙማ ቦላ ደእያ ካታምያ ቆሰታናዉ ዳንዳኡኩ።#ዮሀ 8:12፤ 9:5. 15ፆምፐ ኦይድ ሶን ደእያ አሳ ኡባስ ፖአና መላ ቃ ሶን ዎስፐ አትሽን፥ ዳሎ ግዶን ዎይ ባዋ።#ማር 4:21፤ ሉቃ 8:16፤ 11:33. 16ሄሳ መላ አሳይ ህንተ ሎኦ ኦሱዋ በእድ፥ ሳሎን ደእያ ህንተ አዋ ቦንቻና መላ ህንተ ፖኦይ አሳ ስንን ፖኦ።#1 ጰፅ 2:12.

ሙሰ ህገ

17“ታኒ ሙሰ ህግያነ ናበታ ቃላ ሻራናዉ ይዳ ህንተዉ ዳኖፖ። ታኒ፥ ኤንቲ ኦድዳይስ ቱማ ግደይሳ ቆንጭሳናዉ ያስፐ አትሽን፥ ሻራናዉ ያቢከ። 18ታ ህንተዉ ቱማ ኦዳይስ፤ ሳሎይነ ሳእ አና ጋካናዉ ህገ ኡባይ ፖለታናፐ አትሽን፥ ህግያፈ እስ ቃላይ ዎይኮ ፕዳለይ አና።#ሉቃ 16:17. 19ሄሳ ግሾ፥ ሀ ኪታታፐ ጉፅያ እስ ኪታ መንያ ኦንካ ቃስ ሀራታ ሄሳ ኦና መላ ታማርሰይ ኦንካ ሳሎ ካዎተን ኡባፈ ጉ ግዳና። ሽን ሀ ኪታ ፖለይስነ ሀራታካ ፖላና መላ ታማርሰይ ሳሎ ካዎተን ግታ ግዳና። 20ታ ህንተዉ ኦዳይስ፤ ህንተ ፅሎተይ ፋርሳወታ ፅሎተፈነ ህገ አስታማረታ ፅሎተፈ አና እፅኮ፥ ሳሎ ካዎተ ገለከታ።

ዎባ

21“ህንተ ማይዛታስ፥ ‘ዎፕተ፤ ሸምፖ ዎዳ ኦንካ ፕርደታና’ ጌተቶይሳ ስእደታ።#ከሳ 20:13፤ ዛረ 5:17. 22ሽን ታ ህንተዉ ኦዳይስ፤ ባ እሻ ቦላ ሀንቀትያ ኡባይ ፕርደታና። ባ እሻ ጫይያ ኦንካ ዳይና ስን ፕርዳስ ሺቃና። ባ እሻኮ፥ ‘ኤያይ’ ግያ ኦንካ ቃስ ጋናመ ታማን ፕርደታና።

23“ሄሳ ግሾ፥ ኔኒ ነ ያርሹዋ ያርሽያ ዎደ፥ ነ እሻ ቆህዳባይ ነዉ አኬከትኮ፥ 24ነ ያርሹዋ ሄ በሳን አጋዳ ባ፤ ኮይሮታ ባዳ ነ እሻራ ጊጋ፤ ያታ ስማዳ፥ ነ ያርሹዋ ፆሳስ ያርሻ።

25“ነና ሞተይሳራ ፕርዳ ኬ ባሸ ኦገ ቦላ እያራ ጊጋ። ሄስ አቶ ጊኮ እ ነና ዳይና ስን ኤፋና። ዳይናይ ነና ቃቸይሳስ አድ እማና፤ እ ነና ዎይነን የጋና። 26ታ ቱማ ኦዳይስ፤ ነ ቦላ ፕርደትዳ አጩዋ እስ ሳንትመይ አቶና ጭጋ ኦንጋና ጋካናዉ ቃሾ ኬፈ ከያካ።

ላይማተባ

27“ሀይሳፈ ካሰ፥ ‘ላይማቶፕተ’ ጌተቶይሳ ስእደታ።#ከሳ 20:14፤ ዛረ 5:18. 28ሽን ታ ህንተዉ ኦዳይስ፥ ማጫስ ፄልድ፥ አሞትዳ ኡባይ ባ ዎዛናን ኢራ ላይማቴስ። 29ነ ኡሻቻ አይፈይ ነዉ ናጋራስ ጋሶ ግድኮ፥ ከሳ ሆላ። ነ አሳተይ ኩመ ጋናመ ታማን ዎናፐ ነ አሳተፈ እሶይ ይኮ ነዉ ሎኦ።#ማቶ 18:9፤ ማር 9:47. 30ነ ኡሻቻ ኩሸይ ነዉ ናጋራስ ጋሶ ግድኮ፥ እያ ቃንፃ ሆላ። ነ አሳተይ ኩመ ጋናመ ታማን ዎናፐ ነ አሳተፈ እሶይ ይኮ፥ ነዉ ሎኦ።#ማቶ 18:8፤ ማር 9:43.

ማቾ አንጆባ

(ማቶ 19:9፤ ማር 10:11-12፤ ሉቃ 16:18)

31“ ‘ባ ማቼስ አንጆ ዎርቃተ እሞ’ ጌተትስ።#ማቶ 19:7፤ ማር 10:4. 32ሽን ታ ህንተዉ ኦዳይስ፤ ባ ማቹያ ላይማቶና ደእሽን ብልያ ኦንካ እያ ላይማታና መላ ኦስ። ሄሳዳካ፥ አንጀትዳ ማጫስዉ ኤክያ ኡባይ ላይማቴስ።#ማቶ 19:9፤ ማር 10:11-12፤ ሉቃ 16:18፤ 2 ቆሮ 7:10-11.

ጫቆባ

33“ህንተ ማይዛታኮ፥ ‘ዎርዶን ጫቆፍተ፤ ህንተ ፆሳ ስንን ጫቅዳይሳ ፖልተ’ ጌተትዳይሳ ስእደታ።#ሌወ 19:12፤ ታይቦ 30:2፤ ዛረ 23:21. 34ሽን ታ ህንተዉ ኦዳይስ፤ ኡባራካ ጫቆፍተ። ፆሳይ ኡትያ አራታ ግድያ ግሾ፥ ሳሎን ጫቆፍተ።#ማቶ 23:22. 35እያ ቶሆይ የያ ሶ ግድያ ግሾ፥ ሳአንካ ጫቆፍተ። ግታ ካዋ ካታማ ግድያ ግሾ፥ የሩሳላመንካ ጫቆፍተ።#እሳ 66:1፤ ማዝ 48:2. 36ህንተ ብናናፐ እሱዋካ ቦ ዎይኮ ካሬ ኦናዉ ዳንዳኦና ግሾ፥ ህንተ፥ ህንተ ሁጰንካ ጫቆፍተ። 37ሄሳ ግሾ፥ ህንተ ቃላይ፥ ‘ኤ’ ዎይኮ ‘አካይ’ ግዶ። ሄሳፈ ካረ ከየይ ፃላሄፐ ዬስ።

ሀሎ ከዮፓ

38“ ‘አይፈ ግሾ አይፈ፤ አቻ ግሾ አቸ’ ጌተትዳይሳ ስእደታ።#ከሳ 21:24፤ ሌወ 24:20፤ ዛረ 19:19. 39ሽን ታ ህንተዉ ኦዳይስ፤ ህንተ ቦላ ኢታባ ኦያ ኡራራ ኤቀቶፍተ። ኦንካ ነ ኡሻቻ ሻካላ ባቅኮ ነ ሀድርሳ ሻካላ በሳ። 40እስ አስ ነ ሻምዝያ ኤካናዉ ነና ሞትኮ፥ ነ ኮትያ ጉጃዳ እማ። 41እስ አስ ነና ዎልቃን ባባ ቶስድ እስ ሳተ ኦገ ባራ ባና መላ ነና ኡንኤኮ፥ እያራ ናምኡ ሳተ ኦገ ባ። 42ዎስያ ኦደስካ እማ፤ ኔፐ ታልአናዉ ኮይያ ኦናካ ድጎፋ።

ነ ሞርከታ ዶሳ

(ሉቃ 6:27-36)

43“ ‘ነና ዶሰይሳ ዶሳ፤ ነና እፀይሳ እፃ’ ጌተቶይሳ ስእደታ። 44ሽን ታ ህንተዉ ኦዳይስ፤ ህንተ ሞርከታ ዶስተ፤ ህንተና ቆሄይሳታስ ዎስተ። 45ሄሳ ህንተ ኦኮ፥ ሳሎን ደእያ ህንተ አዋስ ህንተ ናይታ ግዳና። እ ኢታታስነ ሎኦታስ አዋ ከሴስ፤ ፅሎታስነ ናጋራንቾታስ ባ እራ ቡክሴስ። 46ህንተና ዶስያ አሳ ፃላላ ህንተ ዶስኮ፥ ህንተዉ አይ ዎይቶይ ደኢ? ሀር አቶሽን፥ ቃራፃ ቃንፅሰይሳትካ ሄሳ ኦሶና። 47ህንተ፥ ህንተ እሻታ ፃላላ ሳሮኮ፥ ሀራታፐ አይ ሀራ አያባ ኦደቲ? ሀር አቶሽን፥ ፆሳ አማኖና አሳይካ ሄሳ ኦሶና። 48ህዛ፥ ሳሎን ደእያ ህንተ አዋይ ፖሎ ግዶይሳዳ ህንተካ ፖሎ ግድተ።”#ሌወ 19:2፤ ዛረ 18:13.

Currently Selected:

ማቶሳ 5: GFBEVF

Highlight

Copy

Compare