3 Иоан 1
1
1Ме, вичкоса юрнуӧдысь, гижа муса Гайлы. Сійӧ меным збыльысь муса.
2Муса вокӧй, ме тӧда, мый ловнад тэ ён. Кевмыся, мед вир-яйнад тшӧтш вӧлін ён, да ставыс тэнад вӧлі бур. 3Меным лои зэв нимкодь, кор вокъяс локтісны да висьталісны, мый кутчысян збыляс да олан сы серти. 4Меным вывті нимкодь кывны, мый менам челядь ветлӧны збыляс.
Бур Юӧр вайысьяс вӧсна тӧждысьӧм
5Муса вокӧй, вокъяс да локтысьяс вӧсна тэнад тӧждысьӧмыд петкӧдлӧ, мый тэ эскана морт. 6Вичко водзын вокъяс висьталісны тэнад муслуныд йылысь. Бур лоӧ, тэ кӧ Енмыслы колана ногӧн дасьтан да мӧдӧдан найӧс. 7Найӧ Кристос ним вӧсна петісны туйӧ, нинӧм эз босьтны ентӧдтӧмъяслысь. 8Миянлы колӧ сибӧдны татшӧмъяссӧ, ӧд тадзи вӧчигӧн ми накӧд ӧтвыв кесъялам збыльыслы.
Диотреф да Димитрий
9Ме гижлі вичкоас, но сэні асьсӧ ыджыдӧ пуктысь Диотреф оз кывзы миянӧс. 10Та вӧсна, кор ме локта, казьтышта сылы уджъясыс йылысь: сійӧ ӧд паськӧдӧ миян йылысь лёк сёрни. Но тайӧ этша на, сійӧ вокъясӧс оз сибӧд, тшӧтш мукӧдыслы оз лэдз тайӧс вӧчны. А сибӧдны кӧсйысьясӧс весиг вӧтлӧ вичкосьыс.
11Муса вокӧй, видзӧд бурсӧ вӧчысь вылӧ, а эн лёксӧ вӧчысь вылӧ. Бурсӧ вӧчысь – Енсянь, а лёксӧ вӧчысь эз аддзыв Енсӧ. 12Димитрий йылысь ставныс бура сёрнитӧны. Сы йылысь ачыс збыльыс висьталӧ, ми тшӧтш тадзи висьталам. Тэ ӧд тӧдан: миян висьталӧмыс збыль.
Бӧръя кыв
13Унатор на эм гижнысӧ тэныд, но чернилаа перӧӧн ӧні ог кут тайӧс вӧчнысӧ. 14Чайта, регыд аддзысям тэкӧд да воча пуксьӧмӧн сёрнитам.
15Лӧнь олӧм тэныд. Чолӧм ыстӧны ёртъясыд. Висьтав чолӧм ёртъяслы, быдӧнлы торйӧн. Аминь.
Currently Selected:
3 Иоан 1: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023