Псалтыр «Псалтыр» небӧг дынӧ одзкыв
«Псалтыр» небӧг дынӧ одзкыв
Еврей кыв вылын этӧ небӧгсӧ шуӧны «Техиллим» («Ошка́н сьыланкы́ввез»). Грек кыв вылын шуӧны «Псалтерион», сідз шуӧм сиа орса́н сьӧрті. Сэтісь нимыс локтіс и роч кылӧ ─ «Псалтирь», миян кыв вылын ─ «Псалтыр». Псалтырыс ─ сьыла́н да кеймися́н небӧг, сідзкӧ, мортлӧ бур сійӧ быд лун лыддьӧтны.
Еврей кыв вылын Псалтырын 150 псалом, а грек кыв вылын ─ 151 псалом. Псалтырас вит тор. Медодзза торас пырӧны 1-40 псаломмез, мӧдік торас ─ 41-78 псаломмез, куимӧтас ─ 72-88 псаломмез, нёльӧтас ─ 89-105 псаломмез, витӧтас ─ 106-151 псаломмез. Израиль отирлӧн Вавилонскӧй пленісь бертӧ́м бӧрын вит небӧгыс вӧлісӧ ӧтлаӧ́тӧмӧсь ӧтік небӧгӧ.
Псаломмес быдкодьӧсь: эмӧсь Енлӧ ӧддьӧн кеймисьӧ́ммез, медбы отсаліс да мездіс йӧз отир киӧ сюрӧ́мись. Эмӧсь Енсӧ буркывта́н псаломмез сьӧкыт кадӧ отсалӧ́м понда, Сылӧн небыт сьӧлӧм понда. Мукӧд псаломмес ошкӧны Израились ӧксуӧс, кӧдӧ Еныс видзӧ да сылӧ отсалӧ. Мукӧд псаломмес касьтылӧны, мый вӧлӧм одзза каддэзӧ Израиль отирлӧн ола́нын. Енлӧ веритісь морт сэтісь адззас кеймӧ́ммез, кӧдна сылӧ ӧні колӧны, кӧдна вынсьӧтасӧ, сьӧлӧм бурмӧтасӧ. Медбурӧсь, натьтӧ, нія псаломмес, кӧдна ошкӧны-сьылӧтӧны Аркмӧтісь Енсӧ. Кывбур гижиссес эта небӧгись уна мый босьтісӧ, медбы асланыс кыв вылын гижны Енсӧ ошка́н сьыланкы́ввесӧ.
Кынымкӧ псалом пондӧтчӧны кытшӧмкӧ нимӧн али вӧлӧ́м йылісь гижӧ́мӧн. Сэтісь мукӧд кывсӧ огӧ тӧдӧ, кыдз вуджӧтны. Нійӧ колим сідз, кыдз нійӧ кӧркӧ гижӧмась еврей кыв вылын. Медунаись пантасьлӧ Давид ӧксулӧн нимыс. Уна псалом пондӧтчӧ проглаз да орса́ннэз йылісь гижӧ́мӧн.
Медбы буржык вӧлі лыддьӧтны вичкуын и гортын, Псалтырыс янсӧтӧм кыкдас тор вылӧ. Торресӧ шуӧны кафизмаэзӧн. Кылыс босьтӧм грек кылісь. Эта Псалтырын кафизмаэз гижӧмӧсь дженыта ─ «Каф».
Currently Selected:
Псалтыр «Псалтыр» небӧг дынӧ одзкыв: КПБЮ
Highlight
Copy
Compare
Share
Want to have your highlights saved across all your devices? Sign up or sign in
Institute for Bible Translation, Finland