Галатияын оліссезлӧ 5

1Кристосыс миянӧс мездӧтіс. Сідзкӧ, бура видзсьӧ мездӧтчӧмас. Бӧр эдӧ пырӧ Туйдӧтлӧн домӧттэзӧ.

2Кывзӧ, мый ме, Павел, висьтала тіянлӧ: тійӧ асьнытӧ вундыштыштат кӧ, сэк Кристосыссянь тійӧ нем одӧ босьтӧ. 3Эшӧ висьтала: быд мортлӧ, кӧда асьсӧ вундыштыштӧ, быдӧс колӧ керны Туйдӧтісь тшӧктӧммез сьӧрті. 4Тійӧ Туйдӧт сьӧрті керӧмнаныт мӧдіт лоны Ен сьӧрті веськыта оліссезӧн. Но тійӧ янсаліт Кристосыс дынісь да ӧштіт бурсетӧмсӧ. 5А мийӧ Ен Лов отсӧтӧн надейтчам да видзчисям: веритӧмным понда миянӧс шуасӧ Ен сьӧрті веськыта оліссезӧн. 6Вундыштыштӧм тэ, абу я, Кристос Исускӧт ӧтлаасьӧммеслӧ сія нем оз сет. Эстӧн медколанаыс веритӧм, кӧда тыдалӧ радейтӧм пыр.

7Тійӧ бура ни муніт. Кин тіянӧс падмӧтіс быльсӧ кывзісьны? 8Тіянӧс эз падмӧт Сія, Кӧда корис тіянӧс. 9Майӧвсӧ пуктӧны етша, а сія шӧмӧссис кӧтассӧ быдсӧн тай шӧммӧтӧ. 10Дӧсвидзисьлӧ веритӧмсянь ме тӧда: тійӧ мӧдіксӧ юраныт одӧ пыртӧ. А тіянӧс падмӧтісьыс, кин бы сія эз вӧв, лоас мыжйӧм.

11Воннэзӧ, ме бы вундыштыштӧмыс дор вӧлі кӧ, менӧ бы сэк эзӧ вашӧтлӧ? Ме кӧбы эг висьтась крестыс йылісь, сэк некин бы эз лӧгасьлы. 12Тіянӧс вундыштыштны ызйӧтіссес ась бы эшӧ и нимтісӧ#5:12 нимтны ─ кастрировать асьнысӧ!

13Воннэзӧ, Еныс тіянӧс корис мездӧтчӧмас. Ӧні тіянӧс нем оз видз. Мездӧтчӧмас олӧмнытсянь эд лэдзчисьӧ быдӧс керны вывтырлӧ колӧм сьӧрті, но радейтӧмӧн кысъялӧ ӧтамӧднытлӧ. 14Туйдӧтсис быдӧс тшӧктӧммес ӧтік тшӧктӧмись петӧны: «Матісьтӧ радейт асьтӧ моз». 15Видзӧтӧ, тійӧ ӧтамӧднытӧ вермат кувтӧдз воштыны, пондат кӧ пурсян поннэз моз ӧтамӧднытӧ сёйны.

Лов сьӧрті олӧм

16Ме тіянлӧ висьтала: олӧ Енлӧн Лов сьӧрті. Сэк тійӧ одӧ пондӧ керны вывтырныт ӧзйӧтчӧм#5:16 ӧзйӧтчӧм ─ похоть сьӧрті. 17Вывтырыслӧ колӧ, мый Лолыслӧ оз ков. Лолыслӧ колӧ, мый вывтырлӧ оз ков. Нія ӧтамӧдныскӧт озӧ лӧсялӧ. Сійӧн тійӧ одӧ керӧ сійӧ, мый мӧдіт керны. 18Тіянӧс туйдӧтӧ кӧ Лолыс, сэк Туйдӧтыс тіянӧс оз видз.

19Вывтырыслӧн уджыс тӧдса: гозйӧн олӧм коста ӧтамӧд сайсянь ветлӧтӧм, кыскасьӧм, сэрпӧсьсӧ керӧм, лэдзчисьӧм, 20ас керӧм еннэзлӧ копрасьӧм, тшыкӧтчӧм, лӧгалӧм, видчӧм, вежӧктӧм, лёксялӧм, асьӧс вылына лэбтӧм, лӧсявтӧг олӧм, ылӧтлӧм, ылӧтан велӧтӧммез бӧрсянь мунӧм, 21завид кутӧм, вийӧм, кодалӧм, умӧль мывкыдӧн ыждалӧм да уна мый мӧдік умӧльсӧ керӧм. Одзжык ме тіянлӧ висьтавлі ни, да и ӧні мӧдпӧв висьтала, тӧдӧ: сідз кериссес Енлӧн Юраланінӧ озӧ сюрӧ.

22А Ловлӧн воӧмыс#5:22 воӧм ─ плод ─ радейтӧм, гаж, лӧнь, уна мылаӧн#5:22 мыла ─ терпение видзсьӧм, бурсӧ керӧм, отсасьӧм, веритӧм, 23рам сьӧлӧм, видзсьыны кужӧм#5:23 видзсьыны кужӧм ─ умение владеть собой, воздержание. Сідз оліссесӧ Туйдӧтыс оз сет мыжйыны. 24Кӧдна Кристослӧн, нія ассиныс вывтырныс сьӧрті керӧмсӧ да ӧзйӧтчӧммесӧ дорисӧ крест вылас. 25Енлӧн Лолыс сетіс миянлӧ олан. Сідзкӧ, Лолыс сьӧрті и пондам керны. 26Огӧ пондӧ асьнымӧс лэбтыны, ӧтамӧднымӧс дозыляйтны да ӧтамӧднымлӧ завидуйтны.

Ӧтамӧдлӧ отсасьӧм

Currently Selected:

Галатияын оліссезлӧ 5: БЮ19

Highlight

Copy