Галатияын оліссезлӧ 3
3
1Галатияись отир, ылӧстӧммез! Кин тіянӧс ылӧтіс, медбы эдӧ кывзісьӧ быльсӧ? Кристос Исусыс йылісь висьтасьӧмӧ коста тійӧ кывзіт сідз, жыв Сія тіян син одзын вӧлі дорӧм крест вылас.
2Меным ӧтікӧ колӧ тӧдны тіянсянь: мый понда тіянлӧ вӧлі сетӧм Вежа Лолыс? Туйдӧт сьӧрті керӧмныт понда али кылӧм Бур Юӧрас веритӧмныт понда? 3Сэтшӧмӧсь я тійӧ вежӧртӧмӧсь? Пондӧтіт тай Лолыс вынӧн, а медбӧрӧдз мунны мӧдат асланыт вынӧн? 4Сэтшӧм уна тіян вылӧ усис сьӧкытыс, сія эз разь тіянӧс немӧ велӧт? Сідз оз вермы лоны, сія эд тіянӧс мыйӧкӧ велӧтіс жӧ! 5Туйдӧт сьӧрті керӧмныт понда али Бур Юӧрсӧ кылӧмсянь веритӧмныт понда Еныс сетӧ тіянлӧ Вежа Ловсӧ да керӧ тіян дынын адззывлытӧммесӧ#3:5 адззывлытӧм ─ чудо?
6Босьтам Авраамсӧ: Сія веритӧм Еныслӧ, сійӧн Еныс шуӧм сійӧ веськыта олісьӧн. 7Тӧдӧ: веритіссес ─ Авраамлӧн челядь. 8Вежа Гижӧтас вӧлі одзлань висьталӧм: быд отирсӧ Еныс шуас веськыта оліссезӧн веритӧмныс понда. Сійӧн Авраамыслӧ Еныс висьталӧм одзланьсясӧ: «Тэсянь бласлӧвитӧмыс вуджас быдкодь кыв вылын баитісь отирлӧ». 9Сідзкӧ, ӧтлаын веритісь Авраамыскӧт Еныс бласлӧвитӧм веритіссесӧ быдӧннысӧ.
10Туйдӧт сьӧрті быд олісь морт вылын ӧшалӧ ёрдан кыв. Гижӧм тай сідз: «Ёрдӧм быдыс, кин оз ов быд тшӧктӧм сьӧрті, кӧда сетӧм Туйдӧтас». 11Вежӧртам эд, Туйдӧтыс сьӧрті олӧмнас некин оз вермы лоны Ен сьӧрті веськыта олісьӧн. Сійӧ висьталӧны этна кыввес: «Веськыта олісьыс веритӧмнас пондас овны». 12Туйдӧт сьӧрті олӧмыс абу веритӧмсянь. Сэтӧн тай висьталӧм: «Пондас овны сія, кин керас Туйдӧтісь быд тшӧктӧм сьӧрті».
13Туйдӧтлӧн ёрдӧмись Кристосыс миянӧс небис#3:13 небны ─ искупить да мездіс. Миян туйӧ ёрдӧмсӧ Сія босьтіс Ас вылас. Вежа Гижӧтас тай висьталӧм: «Ёрдӧм быдыс, кӧда ӧшалӧ пу вылас». 14Сідз вӧлі керӧм, медбы Авраамыслӧ сетӧм бласлӧвитӧмыс Кристос Исусыс пыр паськаліс быд отирлӧ. Ӧні мийӧ веритӧмнаным вермам босьтны кӧсйӧм Вежа Ловсӧ.
Кӧсйӧм да Туйдӧт
15Воннэзӧ! Висьтала отир коласын керсьӧм йылісь. Морт гижӧ тшӧктӧм, кыдз да мый керны сы кулӧм бӧрын. Тшӧктӧмсӧ некин оз веж, и сы гижӧмӧ нем озӧ содтӧ. 16Авраамыслӧ да сы увтырись шогмӧмлӧ Еныс вӧлі кӧсйӧм. Кӧсйӧмас эз вӧв висьталӧм уна отир йылісь: «тэнат увтырись шогмӧммезлӧ». Висьталӧм ӧтік йылісь: «тэнат увтырись шогмӧмлӧ». Сія висьталӧ Кристосыс йылісь. 17Этӧн ме висьтала: Кристосыс йылісь кӧсйӧмыс вӧлі сетӧм нёльсё куимдас воӧн#3:17 нёльсё куимдас во ─ 430 лет Туйдӧтысся одзжык. Туйдӧтыс оз вермы вежны Еныслісь кӧсйӧмсӧ. Сійӧн кӧсйӧмыслӧн выныс оз ӧш. 18Авраамыслӧ Енлӧн лӧсьӧтӧм пайыс#3:18 лӧсьӧтӧм пай ─ наследная часть, наследство вӧлі сетӧм кӧсйӧм сьӧрті. Вӧлі бы сія сетӧм Туйдӧт сьӧрті олӧм понда, сэк сія эз бы вӧв кӧсйӧм сьӧрті.
Кытшӧм могӧн вӧлі сетӧм Туйдӧтыс?
19Мыйлӧ нӧ сэк колӧ Туйдӧтыс? Сія вӧлі сетӧм сёрӧнжык, отирлӧн умӧльсӧ керӧммезныс кузя. Туйдӧтыс вӧлі сетӧм Сы локтытӧдз, Кӧда Авраамыс увтырись шогмис Енлӧн кӧсйӧм сьӧрті. Туйдӧтыс сетӧм ангеллэз пыр, гижӧм Ен да отир коласын сулалісь Моисей киӧн. 20Коласаныс сулалісьыс колӧ кыклӧн баитчӧм коста. Ӧтік дырни сія оз ков, а Еныс эд ӧтік.
21Туйдӧт да Енлӧн кӧсйӧм коласын разь мыйкӧ оз лӧсяв? Абу сэтшӧмыс! Туйдӧтыс эд оз вермы сетны олансӧ. Сія кӧбы сетіс олансӧ, сэк мортыс вӧлі бы шуӧм Ен сьӧрті веськыта олісьӧн Туйдӧт сьӧрті олӧм понда. 22Вежа Гижӧтас тай висьталӧм: быдӧс отирсӧ умӧль керӧмныс видзӧ домӧттэзын. Сійӧн кӧсйӧмсӧ сетасӧ дзир нылӧ, кӧдна веритӧны Кристос Исуслӧ.
23Веритан кад локтӧмӧдз мийӧ вӧлім домалӧмӧсь Туйдӧтнас. Сія миянӧс видзис аслас кипод увтын веритӧм оссьӧмӧдз. 24Сідзкӧ, Туйдӧтыс миянӧс видзис да быдтіс Кристослӧн локтӧмӧдз, медбы веритӧмнымсянь мийӧ лоим Ен сьӧрті веськыта оліссезӧн. 25Веритан кадыс локтӧмсянь Туйдӧтыс кипод увтісь мийӧ петім.
26Кристос Исуслӧ веритӧмныт понда тійӧ быдӧнныт лоитӧ Енлӧн челядьӧн. 27Тійӧ быдӧнныт, Кристос нимӧн пыртӧммес, Кристосыскӧт ӧтлаасит. Ӧні тіян паськӧмныт ─ Кристос. 28Кристос Исускӧт ӧтлаасьӧммеслӧн абу иудей да мӧдік отир, абу раб да не раб, абу инь да ай морт. Ӧні тійӧ быдӧнныт ─ ӧтік вывтыр! 29Тійӧ кӧ Кристослӧн, сэк тійӧ Авраамлӧн челядь и Еныслӧн кӧсйӧмыс вуджӧ тіянлӧ.
Currently Selected:
Галатияын оліссезлӧ 3: БЮ19
Highlight
Share
Copy
Want to have your highlights saved across all your devices? Sign up or sign in
