ГӀакъилал рагӀаби 24
24
БЕТӀЕР 24
Кици 19
1Квешал гӀадамазда бахиллъуге,
гьезулгун гьудуллъиги гьабуге.
2Гьезул рекӀелъ зулму гурони гьечӀебин,
гьезул кӀалалъги чияе квешлъи гьабиялъул гурони бицунаребин.
Кици 20
3ГӀакъиллъиялъ рукъ бала,
цӀодорлъиялъги гьелъие кьучӀ лъола.
4ГӀелму-лъаялъ гьеб батӀи-батӀияб къиматабщиналъулги
къанагӀатабщиналъулги цӀезабула.
Кици 21
5ГӀакъилав чи къуватав вукӀуна,
гӀелму-лъай бугесул гуч цӀикӀкӀуна.
6Рагъде вахъине ккани, гӀакъилазухъ гӀенеккизе ккола,
гӀакълучагӀи цӀикӀкӀанагӀан бергьенлъиги хӀакълъула.
Кици 22
7ГӀакъиллъиялде гӀабдаласул квер гӀунтӀуларо,
годекӀаниб бицине хабарги гьесул букӀунаро.
Кици 23
8Квешлъи гьабизе ракӀалде ккарав чиясда
питна бекьулев чийилан абула.
9ГӀантлъиялъ бижизабураб пикруялъ мунагьалде цӀала,
яхӀ-намус гьечӀев чи гӀадамазе сурула.
Кици 24
10КӀудияб къварилъи-балагь бачӀараб къоялъ чучулев вугони,
цӀакъ мукъсанаб гурони къуват букӀун гьечӀо дулъ.
Кици 25
11ЧӀвазе рачун унел гӀадамал хвасар гьаре,
чӀвазе къотӀаралги хвалдаса рорчӀизаре.
12Гьеб нижеда лъалеб букӀинчӀилан дуца абуниги,
дур РекӀел хӀал бихьулесда лъаларебищ гьеб,
дур РухӀ цӀунулесда бихьуларебищ?
Щивасул ишазда рекъон гурищ
Гьес диван къотӀизе бугеб?
Кици 26
13Дуца, дир вас, гьоцӀо кванай, –
найил гьацӀуца щекъер-мукъулукъ гьуинлъизабула.
14Гьелдаго релълъуна дур напсалъе гӀакъиллъи.
Дуе гьеб щвани, метерисеб къоялде хьул насиблъила дуе,
гьеб дур хьулги гӀадада хвеларо.
Кици 27
15Хъачагъ гӀадин, муъминчиясул къавулъе цӀогьохъего унге мун,
рахӀаталда гьев вугеб бакӀги дуца щущазабуге.
16Анкьго нухалъ гӀодов кканиги, муъминчи тӀаде вахъуна,
пасикъазде балагь бачӀуна.
Кици 28
17Дурго тушман гӀодов ккани, мун вохуге,
гьесул хӀетӀе хъущтӀани, гьелдасаги дур ракӀ разилъуге.
18Цинги БетӀергьанасда гьеб бихьула, Гьесие рекӀее гӀоларо
ва дур тушманасде Гьесул букӀараб ццинги гӀодобе буссуна.
Кици 29
19Квешлъи гьабулезухъ балагьун ццин бахъунге,
хӀакъирлъи рекӀелъ бугездаги бахиллъуге.
20Квешасе метерисеб къоялде хьул насиблъуларо,
пасикъазул чирахъ сун уна.
Кици 30
21БетӀергьанасукьа хӀинкъа, дир вас,
парччахӀасукьаги хӀинкъа,
питначагӀазулгун хурхенги гьабуге.
22РакӀалдаго гьечӀогойин питначагӀазде паналъи щолеб,
тохлъукьегойин гьезде БетӀергьанасги парччахӀасги балагь рещтӀинабулеб.
ГӀакъилазул цогиги гӀакълаби
23Гьале гӀакъилазул цогиги гӀакълаби:
диван къотӀулеб мехалъ гьурмахъ балагьун
хӀукму гьаби лъикӀаб жо гуро.
24ГӀайиб бугесда мун витӀарав вугилан абулесе
халкъаз нагӀана кьола,
къавмазги абула гьесие нагӀана батагийилан.
25ГӀайиб ккарасе битӀун хӀукму къотӀулесул иш лъикӀ букӀуна,
лъикӀго баркатги лъола гьесда.
26БитӀараб бицун кьолеб жаваб – кӀалалда гьабулеб убач.
27КъватӀиб хӀалтӀиги лъугӀизабун,
хурги бекьун хадуб тӀаме минаялъе кьучӀ.
28Мадугьаласе гьересиго нугӀлъи гьабуге,
дурго рагӀабаз гӀадамал гуккуге.
29Гъос дие гьабураб дица гъосиеги гьабилилан,
гъос гьабуралъухъ къисас босилилан абуге.
30Дун унев вукӀана кӀвахӀалав чиясул хурда аскӀосан
ва гӀакълу гьечӀев чиясул цӀолбол ахида аскӀосан.
31Гьале гьениб мичӀчӀил рохь лъугьун буго,
киса-кибего чӀахӀица бацун буго,
сверун къараб ганчӀил къедги биххун буго.
32Гьезухъ валагьун – рекӀее асар лъугьана,
хал гьабидал – дие гьеб дарслъун лъугьана.
33Цодагьалъги кьижила, цодагьалъги бер данде бачина,
тӀатӀала квералги лъун цодагьалъги вегун чӀела мун.
34Гьебмехалъ, хъачагъ гӀадин, бачӀина духъе мискинлъи,
талавурчи гӀадин, бачӀина духъе ресукълъиги.
Currently Selected:
ГӀакъилал рагӀаби 24: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
