Левит 22
22
Къурбангун садакъаялъул хиралъи
1БЕТӀЕРГЬАНАС Мусада абуна:
2«Гьарунидаги гьесул васаздаги лъазабе, гӀизраилаз Дие рачӀарал хириял садакъаби кӀудияб адаб-хъатиралда къабул гьареян ва, кашишзабазул гӀайибалдалъун, Дир хирияб цӀаралъул адаб рехулеб жо ккезе биччагеян. Дун вуго БЕТӀЕРГЬАН. 3Гьезда гьадин абе: „Нужер наслуялдаса ва гьеб наслуялъул тӀолалго гӀелаздаса щивниги чи, жив хъублъун вукӀинги лъалаго, гӀизраилаз Дие рачӀарал Дир хириял жалазда аскӀове вачӀани, гьев нахъе къотӀизе вуго ва тӀокӀалъ Дида цеве вачӀине гьечӀо. Дун вуго БЕТӀЕРГЬАН.
4Гьарунил наслуялдаса барас унти бугев, яги черхалдаса лъамалъи бачӀунев щивниги чияс кваназе бегьуларо къурбан-бакӀалде бачӀараб хирияб садакъа, живго вацӀцӀалъизегӀан. Гьединго хварав чиясда хъварав, мани бачӀарав, 5хъубаб рухӀчӀаголъиялда хъварав, хъублъарав чиясда хъварав чи, щиб сабаблъун гьев хъублъун ватаниги – 6гьединав чи бакъ тӀерхьинегӀан хъублъун вукӀина. Гьев чиясул ихтияр гьечӀо хирияб садакъа кваназе; цин гьес черхалда рацӀцӀалъиялъул лъим бахъизе ккола, 7ва бакъ тӀерхьун хадуб гьев вацӀцӀадавлъун вукӀина. Гьелдаса хадуб гьес хирияб садакъа кваназе бегьула, гьеб бугелъул гьесие кколеб напакъа. 8Хвараб ялъуни жанавараз чӀвараб хӀайваналъул гьан гьес кваназе бегьуларо, живго хъублъичӀого вукӀине. Дун вуго БЕТӀЕРГЬАН.
9Биччанте гьез дир амраби тӀуразаризе, жалго мунагьалъукье ккечӀого рукӀине. Гурони гьел хвезе руго Аллагьасул хирияблъун гьабураб жо хъублъизабуралъухъ. Дун вуго БЕТӀЕРГЬАН – гьезул рацӀцӀалъиялъул ицц.
10Щивниги батӀияв чияс хириял садакъабазул квен кваназе бегьуларо; кашишасул хӀалтӀухъанасги гьеб кваназе бегьуларо. 11Амма жиндирго гӀарацги кьун вичун восарав кашишасул лагъас гьеб кваназе бегьула. Гьединго кашишасул рокъов гьавурав бокьарав чиясги кваназе бегьула гьеб квен. 12Кашишасул яс кашишзабазул гурев чиясда йигони, гьелъ кваназе бегьуларо къурбан-бакӀалде бачӀараб кинаб батаниги хирияб садакъа. 13Амма кашишасул яс къороллъани, яги ятӀалъани, гьелъул лъималги гьечӀони, гьей гьитӀинаб мехалъго гӀадин нахъеги инсул рокъой гӀумру гьабунги йигони, – гьебмехалъ гьелъ кваназе бегьула инсуца кваналеб хирияб квен. Амма цониги чияр чияс гьеб кваназе бегьуларо.
14ЛъачӀого хирияб квен кванарав батӀияв чияс гьеб квеналъул багьаяб гӀарац кьезе ккола кашишасе, гьеб багьаялъул щуйил бутӀаги тӀаде жубан. 15Кашишзабаз биччаге БЕТӀЕРГЬАНАСУЛ Рокъоре рачӀунел гӀизраилазул хириял садакъабазул къимат хвезабизе. 16БатӀиял чагӀаз хирияб квен кваназе биччаге, гьеб сабаблъун мунагьги тӀаде ккун, Аллагьасда цебе гьелъул жаваб кьезе ккечӀого букӀине. Дун вуго БЕТӀЕРГЬАН – гьезул рацӀцӀалъиялъул ицц“».
Къабуллъуларел къурбанал
17БЕТӀЕРГЬАНАС Мусада абуна:
18«Гьарунидаги, гьесул васаздаги, тӀолабго ГӀизраилил халкъалдаги абе: „ГӀизраилазул цояс, ялъуни чияр халкъалъул чияс суннатаб яги назруялъул къурбан хӀисабалда тӀубан бухӀулеб къурбан хъолеб бугони, 19гьелъие бачине ккола щибгӀаги жагъаллъи гьечӀеб оц, куй яги дегӀен. 20Щибниги жагъаллъи бугеб хӀайван къурбаналъе хъоге, щайгурелъул гьеб къабуллъуларо. 21БоцӀул рохьдолъа ялъуни гӀи-цӀаназул рехъалъа бачун лъица букӀаниги суннатаб ялъуни назруялъул ракълил къурбан хъолеб бугони, къурбан къабуллъизе ккани, хӀайван щибниги жагъаллъи гьечӀеб букӀине ккола. 22БЕТӀЕРГЬАНАСЕ къурбан гьаруге беццал, рекъал, лъукъарал, ракьа бекарал, тӀомол унтаби ругел хӀайванал; БЕТӀЕРГЬАНАСЕ цӀадул къурбан хӀисабалда гьединал хӀайванал къурбан-бакӀалда тӀаде росуге. 23ЦӀакъго халатал, яги цӀакъго къокъал бохдул ругеб оц яги гӀиялъожо хъвезе бегьула суннатаб къурбаналъе, амма назруялъул къурбаналъе гьединаб хӀайван ярагьунаро. 24ХӀанал къараб, ялъуни гьел нахъе рахъараб, яги гьел лъукъараб хӀайван БЕТӀЕРГЬАНАСЕ къурбан гьабизе бегьуларо. Нужер ракьалда киданиги гьединаб жо гьабуге. 25Чияр халкъалъул чиясухъаги къабул гьабуге гьединаб хӀайван ва БЕТӀЕРГЬАНАСУЛ хирияб нигӀмат хӀисабалда гьединаб къурбан къурбан-бакӀалде тӀаде босуге. Гьеб гӀажизаб ва жагъалаб бугелъул, гьединаб нужер къурбан къабуллъизе гьечӀо“».
26Ва БЕТӀЕРГЬАНАС Мусада абуна:
27«ГӀакдал, чахъдал яги цӀцӀел тӀинчӀ анкьго къоялъ эбелалда аскӀоб тезе ккола, микьабилеб къоялдаса нахъе гьеб БЕТӀЕРГЬАНАСЕ цӀадул къурбанлъун хъвезе бегьула. 28Амма гьеб гьелъул эбелгун цадахъ цого къоялъ хъвезе бегьуларо. Гьеб къанун букӀине буго боцӀуеги гӀи-цӀаназеги.
29БЕТӀЕРГЬАНАСЕ баркалаялъул къурбан хъвезе бокьараб мехалда, гьеб къабуллъулеб къагӀидаялда гьабе кинабго. 30Гьеб кваназе ккола гьебго къоялъ, радалалде щибго нахъе тезе бегьуларо. Дун вуго БЕТӀЕРГЬАН.
31Дир амраби цӀуне ва гьел тӀуразаре. Дун вуго БЕТӀЕРГЬАН. 32БЕТӀЕРГЬАНАСУЛ цӀар хӀакъир гьабуге, цинги Дицаги гӀизраилазда гьоркьоб Дирго къудрат загьир гьабизе буго. Дун вуго БЕТӀЕРГЬАН – нужер рацӀцӀалъиялъул ицц. 33Дун вуго нуж Мисриялдаса нахъе рачарав ва Дирго халкълъун нуж ратӀа гьарурав Аллагь. Дун вуго БЕТӀЕРГЬАН».
Currently Selected:
Левит 22: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
