Иоаннил лъабабилеб кагъат 1
1
Саламалъул рагӀаби
1Иман лъуразул агьлуялъул бетӀерасдасан – хӀакълъунго дие вокьулев дир хирияв Гайиде.
2Дица Аллагьасда гьарулеб буго, дир хирияв, дур рухӀ лъикӀ бугеб гӀадин, сундулъго мун лъикӀ тагийилан ва дуе сахлъи кьегийилан. 3ХӀакъабщиналъе мун ритӀухъго чӀун вугилан ва хӀакъабщинабгун хьвадулевги вугилан гьанире рачӀарал вацаз бициндал, дун цӀакъ вохана. 4Дир лъимал хӀакъабщинабгун хьвадулел ругилан рагӀиялдаса кӀудияб рохел гьечӀо дие.
Гай веццулев вуго
5Вацазе ва хасго нухлулазе дуца квербакъулеб букӀиналъулъ буго, дир хирияв, дур ритӀухълъи. 6Иман лъуразул агьлуялъе гьез нугӀлъи гьабуна жалги дуе рокьулилан. Аллагь разилъулеб хӀалалда дуца гьел нухда регӀани, дур лъикӀаб иш букӀина гьеб. 7Иман лъечӀезухъа щибниги босичӀого, МасихӀил цӀаралъе гӀоло нухда рахъун ругелъулха гьел. 8Гьединлъидал гьединал гӀадамазда квер чӀвазе ккола нилъеца, гьелгун цадахъ лъугьун хӀакъабщиналъе гӀоло хӀалтӀизе.
Диотрефил квешал ишал
9Дица иман лъуразул агьлуялъухъе хъван букӀана гьелъул хӀакъалъулъ, амма гьениб цевехъанлъи бокьулев Диотрефица ниж рикӀкӀунел гьечӀо. 10Гьединлъидал, дун гьениве вачӀани, дица загьир гьабила нижеда гьес лъун букӀараб бугьтан. Ва гьеб гӀечӀелъубе, гьес жинцагоги инкар гьабулеб буго нухда ругел вацал къабул гьаризе, къабул гьаризе бокьараздаги биччалеб гьечӀо ва иман лъуразул агьлуялда гьоркьоса гьел нахъе гъолел руго.
11Дир хирияв, квешлъиялдаса гуреб, лъикӀлъиялдаса босе мисал. ЛъикӀлъи гьабулевав ккола Аллагьасдасан лъугьарав, квешлъи гьабурасдаги Аллагь вихьичӀо.
Деметрийил лъикӀал ишал
12Деметрийил хӀакъалъулъ киназго нугӀлъи гьабуна, хӀакъабщиналъгицин гьабуна гьесул хӀакъалъулъ нугӀлъи. Нижецаги гьабулеб буго гьеб нугӀлъи, дудаго лъалаха нижер нугӀлъи ритӀухъаб букӀунеблъи.
КватӀичӀого рихьила
13Духъе хъвазе жони гӀемер бугоан, амма щакъи-къаламалъ хъваралда гӀей гьабизе бокьун гьечӀо. 14Дир хьул буго кватӀичӀого мун вихьизе ва, цоцазул кӀал бихьун, кӀалъа-ралъазе.
15Вассалам. ЦӀар-цӀарккун рехсечӀониги, гьудулзабазулги буго дуде салам.
Currently Selected:
Иоаннил лъабабилеб кагъат 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023