Маккавейёслэн 1-тӥ книгазы 16
16
16-тӥ ЛЮКЕТ
1Иоанн Газараысь берытскиз но атаезлы, Симонлы, вераз, мар кариз Кендевей. 2Соку Симон кык бадӟым пиоссэ – Иудаез но Иоаннэз – ӧтиз но соослы шуиз: «Мон но, мынам агай-вынъёсы но, атаелэн выжыез пинал дырысенымы та нуналозь Израильлэн тушмонъёсызлы пумит ожмаськимы, асьмелэн киосынымы лэсьтэм ужъёс азинлыко мынӥзы но, трос пол Израилез утьылӥмы. 3Но тани, мон пересьми ни, нош тӥляд али, Инмарлэн ӟечлыкеныз, кын корт куртчон дырды: мынам интыям, братэлэн интыяз султэ но асьме калык понна ожмаськыны мынэ, Инмысь юрттэт тӥ бордын мед улоз». 4Ас кунысьтыз кызь сюрс ожгарчиосты, вал вылын ожмаськисьёсты бырйиз но, соос Кендевейлы пумит оже мынӥзы, Модинын уйзэс потӥзы. 5Ӵукна султыса, ӵошалэ потӥзы, но тани, соослэн пумитазы туж трос ожгарчиос лыкто – пыдын но, валъёс вылын но – соослэн висказы ву ӧр вал. 6Соослы пумит ачиз но, солэн калыкез но вырӟизы. Калык ву ӧр вамен выжыны кышка шуыса адӟиз но со ачиз нырысь ик потӥз, тае ожгарчиос адӟизы но бӧрсяз потӥзы. 7Калыкез люкиз: вал вылын ожмаськисьёсты пыдын ожмаськисьёс пӧлы пуктӥз, тушмонлэн вал вылын ожмаськисьёсыз туж трос вал уго. 8Дуно-дано ожгар гумыосынызы пелляны кутскизы но, Кендевей бызьыса пегӟыны кутскиз, солэн ожгарчиосыз но; трос-трос сӧсырмемъёссы погразы, улэп кылемез изкаре ватӥськиз. 9Соку Иоаннлэн Иуда братэз яраё каремын вал; нош Иоанн Кедронэ вуытозяз, кудзэ Кендевей пуктӥз, соос сьӧры уйиськыса мынӥз. 10Азот улосвылэ интыяськем каланчаосы соос ватӥськизы, нош Иоанн Азотэз тылын сутӥз, ог кык сюрс воргоронъёс отчы быризы; собере каньылэн со Иудей музъеме берытскиз. 11Нош Авувлэн Птоломей пиез Иерихон ӵошалэ ожгарчиосын кивалтӥсе пуктэмын вал, трос азвесез, зарниез вал; 12уго со архиерейлэн эмеспиез вал. 13Сюлмаз вылтӥяськон мылкыд пыриз; кунэз ас киулаз басьтэмез потӥз, Симонлы, солэн пиосызлы, соосты быдтон вылысь, кескич ужъёс лэсьтыны малпаз. 14Со виын Симон, ас кунысьтыз городъёсы вуылыса, отын улӥсьёслэн ӟеч улонзы понна сюлмаськылӥз, со Иерихонэ вуиз, сьӧраз Маттафияен Иуда пиосыз лыктӥзы, со сю сизьымдон сизьыметӥ арын дас одӥгетӥ толэзе – Сават толэзе – вал. 15Кескич малпанэн, пальпотыса Авувлэн пиез соосты пичигес гинэ аслаз пуктэм Док нимо изкар пушказ пыртӥз, соослы сӥзьыса, бадӟым юондыр ортчытӥз, но изкар пушкы адямиоссэ ватӥськытӥз. 16Симон но солэн пиосыз кудӟем бере Птоломей ас адямиосыныз ӵош султӥз, ожмаськон тӥрлыкъёссэс кутӥзы но юыса пукон дыръязы Симон доры пыризы, сое но, солэсь кыксэ но пиоссэ, куд-ог ужась-тыршисьёссэ виизы. 17Тазьы со туж бадӟым сьӧсь уж лэсьтӥз, ӟеч ужъёс понна уродэн пунэмзэ берыктӥз. 18Та учыр сярысь Птоломей гожтэт пыр эксэйлы ивор лэзиз, юрттӥськыны ожгарчиоссэ мед лэзёз шуыса солэсь куриз, музъемез но, отысь городъёсты но со понна солэн киулаз сётоз шуыса гожтӥз. 19Куд-огзэ со Газарае Иоаннэз виыны ыстӥз, нош сюрс ожгарчиосын кивалтӥсьёслы гожтэт келяз, соос солэн дораз мед лыктозы шуыса куриз, соослы со азвесь, зарни, кузьымъёс сёто, шуиз, 20нош мукетъёссэ со Иерусалимез но храмлэсь гурезьзэ киултыны ыстӥз. 21Нош кин ке но Газарае Иоанн доры ворттыса вуиз но ивор сётӥз: атаед но агай-вынъёсыд виылэмын, Птоломей тонэ но виыны адямиоссэ келяз. 22Та иворез кылыса, Иоанн туж куалектӥз, сое виыны вуэм воргоронъёсты кутыса вииз, уго со тодӥз, соос сое виыны лыктӥзы шуыса.
23Иоаннлэн вань мукет ужъёсыз – ожмаськонъёсыз, кышкатэк лэсьтэм, данэн быдэстэм быдӟым ужъёс но, со дыръя ӝутэм борддоръёс, мукет ужъёсыз но, – 24атаез бере архиерей луэм дырысеныз, архиерейын пукон нуналъёсаз соос книгае гожъямын.
Currently Selected:
Маккавейёслэн 1-тӥ книгазы 16: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016