Захария 12
12
12-тӥ ЛЮКЕТ
1Израиль сярысь Кузё-Инмарлэн азьпалзэ тодытыса веранэз. Инбамез возъясь, музъемез инъет вылэ пуктӥсь, адямилэн пушказ дух кылдытӥсь Кузё-Инмар шуэ: 2«Тани, Мон Иерусалимез котырысь вань калыкъёс понна, Иерусалимез котыртыса возьыкузы, Иуда выжы понна но кудӟытӥсь чаша каро. 3Со нуналэ тазьы луоз: вань выжыос понна Иерусалимез секыт излы пӧрмыто; ваньзы сое ӝутыны вырисьёс гогызэс вырӟытозы, нош солы пумит дунне вылысь вань калыкъёс огазе люкаськозы. 4Со нуналэ, – шуэ Кузё-Инмар, – вань валъёсты куалекъято-тэтчато, вал вылын пукисьёсты укылтэмесь каро, нош Иуда выжы вылэ синме берыкто; калыкъёслэсь вань валъёссэс синтэм каро. 5Иудалэн кивалтӥсьёсыз сюлмазы шуозы: ”Мынам кужыме – Иерусалимын улӥсьёс бордын, кудъёсыз Инмарзы Саваоф Кузё-Инмар бордын уло”. 6Со нуналэ Мон Иудалэсь кивалтӥсьёссэ нюлэс пушкы пуктэм тылын ӝуась таба кадесь каро, культоос вискы пуктылэм ӝуась сюсьтылъёс кадесь каро, соку котырысьтызы бурпалась но, паллян палась но вань калыкъёсты соос быдтозы, соку нош ик Иерусалимын, Иерусалим интыын ик, калык улыны кутскоз. 7Нырысь ик Кузё-Инмар Иудалэсь юртъёссэ утёз: Давид выжылэн данлыкез, Иерусалимын улӥсьёслэн данлыксы Иудалэн сярысь вылэгес медаз ӝутӥськы. 8Со нуналэ Иерусалимын улӥсьёсты Кузё-Инмар утьыса возёз, со нуналэ соос пушкысь самой лябез Давид кадь луоз, нош Давидлэн выжыез Инмар кадь луоз, Кузё-Инмарлэн Кылчинэз кадь соос азьын луоз. 9Со нуналэ тазьы луоз: Иерусалим вылэ урдскись вань калыкъёсты Мон быдто. 10Нош Давидлэн выжыез вылэ, Иерусалимын улӥсьёс вылэ Духлэсь дэлетсэ, гажан-жалянзэ кисьто, соку соос Кинэ бышкалтӥзы, Со шоры учкозы, Со пумысен соос викышъяса бӧрдозы, кызьы викышъяса бӧрдо огназ вордӥськем пи понна, кызьы куректо-кайгыро нырысь вордӥськем нуны понна. 11Со нуналэ Иерусалимын Мегиддон нёжалын Гададриммонлэн бӧрдэмез кадь кужмо бӧрдон кылӥськоз. 12Со нуналэ музъем викышъяса бӧрдоз, котькуд выжы ас понназ викышъяса бӧрдоз: Давид юртлэн выжыез нимаз кариськыса, соослэн кышнооссы но нимаз кариськыса бӧрдозы; Нафан юртлэн выжыез нимаз, соослэн кышнооссы но, нимаз кариськыса, викышъяса бӧрдозы; 13Левий юртлэн выжыез нимаз, соослэн кышнооссы но нимаз викышъяса бӧрдозы; Симеон выжы нимаз, соослэн кышнооссы но, нимаз кариськыса, викышъяса бӧрдозы. 14Вань мукет выжыос – котькудӥз выжы нимаз, соослэн кышнооссы но, нимаз кариськыса, викышъяса бӧрдозы».
Currently Selected:
Захария 12: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
