2 Timoteo 2
2
Dios i̧huȩnȩ päö ta'anö jȩä̧cuä̧huä̧ huȩnȩ
1Ucu ttö chi̧tti̧, Cristo Jesús ppädomenä, juruhui. 2Ttö chu̧huo̧juȩto̧mȩnä̧ cuä̧ju̧cui̧nö̧mä̧ recuätö ttä'ca jo̧mȩttö̧ huo̧juȩti̧ adiu jȩpö̧ cue'ächätörö juhua'a yabo korotörö ttu̧huo̧juȩtö̧'a̧nö̧ huotörö.
3Ya̧tȩ su̧ro̧da̧u̧ i̧sa̧ jä̧'i̧nö̧'a̧nö̧, Jesucristocu cue'ächö ubara ttu'i. 4Ya̧tȩ su̧ro̧da̧u̧ i̧sa̧ u̧ru̧hua̧ esehuarö pä'ömä, pi̧jä̧ jähuä amöcuädocö. 5Ja̧'hua̧ta̧nö̧ ja̧'a̧nä̧ ya̧tȩ järeäcuähuä i̧sa̧ huettö ta'anö järehuocömä, ppöttähuä ȩmo̧cö̧. 6Ja̧'hua̧ta̧nö̧ ya̧tȩ cuähuä ku̧nu̧mä̧ ä'canä u̧ju̧ni̧nö̧ttö̧ cu. 7Ttö jidäumä, adiu amöcuädi. Ja̧'hua̧nö̧ cuamöcuädomenä, Tu̧ru̧hua̧ cu̧huo̧jui̧pö̧nä̧ ppä̧dä̧cua̧jä̧.
8Ru̧hua̧ David a̧hua̧ru̧hua̧ pi̧nö̧, Jesucristo 'corupä'i'äji'ca̧ tto'ächinörö amöcuädi. Ja̧u̧tä̧ ttö̧ja̧ suronä jȩttö̧ jȩpö̧ icu huȩnȩ ji'äusä ttömä. 9Ja̧u̧ huȩnȩ jidähua'attö, suronä jȩpä̧tö̧ ubara ttutta'a jä̧'i̧nö̧'a̧nö̧, ubara ttu'usä cärenä pä̧nö̧. Ja̧'hua̧nö̧ ja̧'a̧nä̧ Dios i̧huȩnȩ be'epäjipö icuocotö. 10Ja̧'hua̧nö̧ ja̧'a̧ttö̧ Dios ȩmi̧nä̧u̧ru̧ amöcuädö, o'ca juiyönä ubara ttu'usä. Ja̧'hua̧nö̧ ubara ttu'usä jahuätö'inä Cristo Jesúsru esetö adihuä kä̧cuä̧huä̧ huȩnȩ ttö̧ja̧ suronä jȩttö̧ jȩpö̧ icu huȩnȩ, ttu̧ju̧nä̧ra̧ pä'ö.
11Pi̧yȩmä̧ iso päi'önä huȩnȩ:
Chutäcu 'corupäti'öttömä, chutäcu tö̧ja̧cuä̧cuo̧tö̧jä̧.
12Chutäcu ubara ttututtumä, chutäcu huetäcuotöjä.
Churu tä̧ppö̧tä̧rö̧ttö̧mä̧, chutä ujuturu ä̧ppö̧tä̧rä̧cua̧.
13Churutä jaroti'a'anä, chutä ujuturu jaropi'ocö.
Chutä Dios amönätämä ä̧ppö̧tä̧rä̧cuä̧huo̧cö̧.
Diosrö esetö jȩä̧cuä̧huä̧ huȩnȩ
14Tu̧ru̧hua̧ ä'ca jo̧mȩttö̧ adiu ji'äu huo̧juȩti̧ pi̧yȩ huȩnȩ. Amönä ttucuocu huȩnȩ jarotti'a huo̧juȩti̧. Ja̧'hua̧nö̧ ucuocuäcuähuä yoröiso micuähuocö. Ja̧u̧ amönä ttucuocu huȩnȩ ä̧ju̧cuä̧tö̧mä̧, Diosrö amöcuädocotö. 15Ucu Dios ä'ca jo̧mȩttö̧ ya̧tȩ adicuä i̧sa̧ adiu aditö jä̧'i̧nö̧'a̧nö̧, adiu jȩpi̧ cudäpecuoca'a, o'ca juiyönä iso päi'önä huȩnȩ päö ta'anö jȩpö̧'i̧nä̧, huo̧juȩtö̧'i̧nä̧. 16Amönä huȩnȩ, micuähuocö huȩnȩ, ttucuocuomenä, 'quȩ'i̧pä̧chi̧. Ja̧'hua̧nö̧ ucuocuätömä, juhua'a yabocu suronä jȩpä̧tö̧. 17Ja̧u̧ huȩnȩ ucuocuätömä sittähuächö märichei na̧'ä̧chä̧tö̧, sittähuächa'a jä̧'i̧nö̧'a̧nö̧ huotö. Himeneocu, Filetocu ja̧'hua̧nö̧ jö̧ huȩnȩ ucuocuätö. 18Jahuätö iso päi'önä huȩnȩ ucuocuocotö. Jahuätö pä'ätö Diosrö esetätö ttoächäcuähuä mo̧ro̧ täcö 'cuäopina'a. Ja̧'hua̧nö̧ pättomenä, korotömä Diosrö jaropi'ätö. 19Ja̧'hua̧nö̧ ja̧'a̧nä̧ Diosrö teseta pä'ö äcuomenä aditinömä, 'quiyö ka̧'a̧. Dios aditinömä pa̧'a̧nö̧ päa'a: “Tu̧ru̧hua̧ chutä umöhuäyotörö huo̧jua̧.” Ja̧'hua̧ta̧nö̧ päa'a: “O'ca toi'önä Cristo i̧mi̧nä̧ ucuocuätömä, surojöttö 'quȩtti̧pä̧chö̧'a̧nö̧ ja̧'a̧.”
20Yodete isode rö̧odenä ka̧'a̧ orottö adicuo̧'ta̧'i̧nä̧, pärätättö adicuo̧'ta̧'i̧nä̧. Ja̧'hua̧ta̧nö̧ ka̧'a̧ dauttu adicuo̧'ta̧'i̧nä̧, redä'cattö adicuo̧'ta̧'i̧nä̧. Ko̧ro̧'ta̧mä̧ fiesta jȩpö̧ ahuähuo̧'ta̧. Ja̧'hua̧ta̧nö̧ ko̧ro̧'ta̧mä̧ fiesta juiyomenä ahuähuo̧'ta̧. 21Ja̧'hua̧nö̧ ja̧'a̧ttö̧ ya̧tȩ pi̧jä̧ jähuä jaropi'ö adiu jȩo̧mȩnä̧, Tu̧ru̧hua̧ ä'ca jo̧mȩttö̧ adihuä i̧sa̧ ö̧jä̧cua̧. Tu̧ru̧hua̧ hueömä jȩä̧cua̧. Ja̧'hua̧ta̧nö̧ o'ca juiyönä adihuä juäi jȩö̧'a̧nö̧ hua̧ jä̧cua̧.
22Ucu, möäyotö ttamöcuädömä jaropi'i. Adiutä jȩpö̧ kä̧hui̧. Adiu esetö cuahuaruhuärö repe'i. Korotöcu adiu kä̧hui̧. Ja̧'hua̧nö̧ jȩpö̧ kä̧hui̧ o'ca toi'önä ttami iso'quinä adiu amöcuädö, Tu̧ru̧hua̧ i̧mi̧nä̧ esetö ucuocuätöcu. 23Ja̧'hua̧ta̧nö̧ amönä huȩnȩ ttucuocuomenä, cucuocuä'. Täcö huo̧jua̧jä̧, ja̧'hua̧nö̧ ttucuocuomenä, ttahuaruhuärö ra̧huä̧rä̧tö̧. 24Tu̧ru̧hua̧cu̧ adiu aditömä, ahuaruhuärö ra̧huä̧ro̧cö̧. Pärocua'acu o'ca toi'önärö adiu jȩpö̧. Korotörö adiu huo̧juȩtö̧. Korotörö ami 'qui'ächi'ö kö̧. 25Jarode'ätörö ami iso'quinä adiu amöcuädö ucuocu. Diosrö pä̧huä̧ rö̧jo̧mȩnä̧, pärocuäcutä amöcuädö, iso päi'önä huȩnȩ tteseta pä'ö tta̧'ä̧rö̧. 26Ja̧'hua̧ta̧nö̧ ähuettärö jaropi'ö ttö̧ji̧pa̧ pä'ö tta̧'ä̧rö̧. Jahuätömä ähuettäcu cuettächa'attö, ähuettä hueö jȩpä̧tö̧.
Currently Selected:
2 Timoteo 2: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
