1 Timoteo 5
5
Diosrö esetätö ttö̧jö̧ huȩnȩ
1U̧mä̧tö̧ tä̧mö̧ böäcuächätörö ra̧huä̧rö̧nä̧nö̧mä̧ cucuocuä'. Ja̧'hua̧nö̧ ja̧'a̧ adiu ucuocu ji'ähuitö, ucuhuätä cuamönä cuä'o a̧'cua̧rö̧nä̧. Ja̧'hua̧ta̧nö̧ ucuocu ji'ähui u̧mä̧tö̧ möäyotörö, ucuhuätä cuamönä cu̧jä̧hua̧tö̧ a̧'cua̧rö̧nä̧. 2Nä̧tö̧ böäcuächätörö'inä ucuocu ji'ähui, ucuhuätä cuamönä cua̧ju̧ a̧'cua̧rö̧nä̧. Ja̧'hua̧ta̧nö̧ nä̧tö̧ möäyotörö ucuocu ji'ähui, ucuhuätä cuamönä cu̧jä̧hua̧tö̧ a̧'cua̧rö̧nä̧ suronä amöcuädäcuähuä juiyönä.
3Ja̧'hua̧ta̧nö̧ adiu ppä'ädi rȩcua̧mö̧rö̧, iso päi'önä recuä rö̧jä̧u̧ru̧. 4Yajute recua ki̧tti̧mö̧rö̧'i̧nä̧, kö̧nä̧mö̧rö̧'i̧nä̧ ku̧nä̧rä̧ju̧mä̧, ki̧tti̧mö̧, kö̧nä̧mö̧ tta̧ttä̧rä̧cua̧'a̧nö̧ yajuru. Jitötä ttamönä ttahuaruhuärö repe'ö ppättädö'a̧nö̧ ja̧'a̧ jitörötä ppättädinö'a̧nö̧. Ja̧'hua̧nö̧ jȩttö̧mä̧ adihua'a Dios ä'ca jo̧mȩttö̧. 5Ja̧'hua̧ta̧nö̧ yajute recua ki̧tti̧mö̧'i̧nä̧, kö̧nä̧mö̧'i̧nä̧ to'ajumä, Diosrötä adiu esetö tta̧'ä̧rä̧ju̧. Jahuäjumä mo̧ro̧'i̧nä̧, yodo'inä ucuocuäju Diosrö. 6Ja̧'hua̧nö̧ ja̧'a̧nä̧ yajute recua pi̧jä̧ jähuä amöcuädö kö̧jo̧mȩnä̧, 'corupä'i'ätö jä̧'i̧nö̧'a̧nö̧ kä̧ju̧. 7Pi̧yȩ huȩnȩ huo̧juȩti̧tö̧, korotömä jahuätörö suronä ttucuocu juiyäcua'a̧nö̧. 8Iso päi'önä ya̧tȩ ahuaruhuärö, chutä ojusodenä ka̧cuä̧tö̧rö̧, tta̧'ä̧ro̧cö̧mä̧, Diosrö ä̧ppö̧tä̧rö̧. Ja̧'hua̧nö̧ jȩpö̧mä̧, korotö Diosrö esetocotöttö'inä abonänö suronä jȩpö̧.
9Yajute rȩcua̧ iglesia ruhuä ppäcuhuädätucuäcuamä sesenta a̧'ȩ ku̧nä̧rä̧ju̧ru̧ kirecuo'inä ya̧tȩrö̧tä̧ ku̧nä̧ri̧nä̧ju̧ru̧tä̧, ppäcuhuädätucu'a̧nö̧ ja̧'a̧. 10Jahuäjuru o'ca toi'önä adiu ttucuocu'a̧nö̧ ja̧'a̧ adiunä kö̧ji̧na̧'a̧ttö̧. Ki̧tti̧mö̧rö̧'i̧nä̧ adiu tta̧'ä̧ri̧nä̧ju̧ru̧, kahuaruhuä kojusodenä rȩbȩhuä̧tö̧rö̧ adiu ppä'ädinäjuru, Diosrö esetätörö ttö̧jä̧pö̧ töquinäjuru, ubara ttu'ätörö adiu ppä'ädinäjuru, o'ca juiyönä adiu jȩpi̧nä̧ju̧ru̧ ppäcuhuädätucu'a̧nö̧ ja̧'a̧.
11Ja̧'hua̧nö̧ ja̧'a̧nä̧ rȩcua̧mö̧ möäyotörö ppäcuhuädätucuä'. Jahuätö jitöätä ttamöcuädö jȩtto̧mȩnä̧, Cristorö jaropi'ö, ttirecuorö ttȩma̧ pättäcuotö. 12Ja̧'hua̧nö̧ jȩtto̧mȩnä̧, äcuomenä ttamöcuädö jarotti'omenä, korotö suronä ucuocuätö jahuätörö. 13Ja̧'hua̧nö̧ jȩpö̧ korode korodenö cuettächomenä, ji̧nä̧ isocu ttötähuächäcuotö. Ja̧'hua̧nö̧ ötähuächö kä̧nö̧, amönä yapareu huȩnȩtä̧ ttucuocuäcuotö, ttucuocu juiyö'a̧nö̧ jö̧ juäi. 14Ja̧'hua̧nö̧ ja̧'a̧ttö̧ ttö pä'ösä rȩcua̧mö̧ möäyotörö, ttirecuorö ttȩmä̧cua̧'a̧nö̧. Tti̧tti̧mö̧rö̧ ttu̧ju̧nä̧rä̧cua̧'a̧nö̧. Ttojusodenä'inä adiu tta̧ttä̧rä̧cua̧'a̧nö̧. Ja̧'hua̧nö̧ adiu jȩtto̧mȩnä̧, ttaboiyotömä suronä ucuocuocotö jahuätörö. 15Täcö yotöte rȩcua̧mö̧ jaropi'inätö, ähuettäcu cuettächa pä'ö.
16Yotöte Diosrö esetätö ttahuaruhuä rȩcua̧mö̧rö̧ ku̧nä̧rä̧tö̧mä̧, jitötä ttahuaruhuä rȩcua̧mö̧rö̧ ppättädö'a̧nö̧ ja̧'a̧. Iglesia ruhuä ja̧'hua̧nö̧ huotörö, ttahuaruhuä ku̧nä̧rä̧tö̧rö̧, ppättädö juiyö'a̧nö̧ ja̧'a̧. Iglesia ruhuämä rȩcua̧mö̧ ttahuaruhuä to'ätörötä, iso päi'önä recuä rö̧jä̧u̧ru̧tä̧, ppättädö'a̧nö̧ ja̧'a̧.
Ancianos huotörö ttamöcuädö huȩnȩ
17Ancianos huotö adiu ji'äu huo̧juȩtä̧tö̧rö̧'i̧nä̧, iglesia ruhuärö adiu hue'ätörö'inä, ji̧nä̧ isocu adiu tucuotäcua'a̧nö̧. 18Huȩyu̧cuä̧ Huȩnȩ päa'a: “Päcäyä äbanä isobö cu̧'ca̧tä̧dä̧tu̧cuä̧' ya̧mö̧ ibi'ca'anä.” Ja̧'hua̧ta̧nö̧ päa'a: “Adicuä i̧sa̧ aditähuä micuä ȩmö̧.”
19Cuesetätucuä' ancianos huotörö suräjuä huȩnȩ ttucuocuomenä, korotö ta̧ju̧, huämetucuä iso päi'önä topätö jittähuoca'a jo̧mȩnä̧. 20Ja̧'hua̧nö̧ ja̧'a̧nä̧ korotö ancianos huotö suronä jȩpä̧tö̧rö̧ o'ca toi'önä ttä'ca jo̧mȩttö̧ tä̧bo̧ti̧, korotö'inä topö yettecuäcua'a̧nö̧. 21Dios ä'ca jo̧mȩttö̧, Tu̧ru̧hua̧ Jesucristo ä'ca jo̧mȩttö̧, chutä ȩmi̧nä̧u̧ ángeles ttä'ca jo̧mȩttö̧ pi̧yȩ huȩnȩ cu̧huo̧juȩta̧ pä'ö hue'ösä ucuru. Ka̧ra̧rö̧ ka̧ra̧ttö̧'i̧nä̧ abonänö adihuä i̧sa̧ pä'ö cuamöcuädä'. 22Ka̧ra̧rö̧ cuieruhuäcurumä, cu̧mö̧ mȩ'ö̧ huecuhuä' Dios i̧huȩnȩ jiähua pä'ö. Ka̧ra̧ suronä jȩpö̧cu̧mä̧ jȩcu̧'ä̧' ucumä. Ucutä adihuä juäitä jȩpö̧ kä̧hui̧.
23Ajiya päcuäoyatämä au cu̧jä̧'. Cuhuacuä barahuäcu na̧cu̧huä̧cha̧'a̧ttö̧, vino ji̧'qui̧cha̧nö̧ au kä̧hui̧.
24Korotö suronä jȩtto̧mȩnä̧, yotäcu ttu̧huo̧juä̧u̧. Ja̧u̧nu̧tä̧ suronä jȩttä̧ji̧ micuä mitähuätö. Ja̧'hua̧nö̧ ja̧'a̧nä̧ korotömä suronä jȩtto̧mȩnä̧, yotäcu ttu̧huo̧juo̧co̧u̧. Jahuätö koronötä suronä jȩttä̧ji̧ micuä ttimitähuäcuotö. 25Iso päi'önä adihuä juäimä adiu toäcuähuä. Ja̧'hua̧ta̧nö̧ adihuä juäi totö juiyöttömä, 'cuäopönä dajahuächoca'a. Koronötä totäcuotöjä.
Currently Selected:
1 Timoteo 5: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
