1 Timoteo 4
4
Dios i̧huȩnȩ jarotti'ä̧cuȩ huȩnȩ
1Ja̧'hua̧nö̧ ja̧'a̧nä̧ Espíritu Santo huäjunä ji'äu röji mo̧ro̧ päi'omenä, korotö pö̧nä̧ jarotti'äcuotö adihuä huȩnȩ. Jahuätömä espíritus yapareu ji'ähuätörö ttesetäcuotö. Ja̧'hua̧ta̧nö̧ espíritus suropätö huo̧juȩcuä̧tä̧ ttesetäcuotö. 2Korotörö, yapareu ji'ähuätö ttamöcuädömä cuo̧rä̧u̧jä̧ cuo'ö icua'a jä̧'i̧nö̧'a̧nö̧ huotörö, ttesetäcuotö. 3Jahuätömä ttirecuarö ttȩma̧ pä'ö hue'ocotö ttäcuotö. Ja̧'hua̧ta̧nö̧ koro juo̧'a̧ idepä'inä ttucu juiyönä pättäcuotö. Ja̧'hua̧nö̧ pätta'anä, Dios o'ca juiyönä aditinö churu esetätömä, iso päi'önä huȩnȩ esetätömä, Diosrö eseunu ucuocu ttucua pä'ö. 4O'ca juiyönä Dios aditinö adiu. Ujutumä koro juo̧'a̧rö̧ “Su̧ro̧pa̧rö̧mä̧ cuocösä” pätö juiyö'a̧nö̧ ja̧'a̧. Diosrö eseunu ucuocu ȩmö̧ tucu'a̧nö̧ ja̧'a̧. 5Iso päi'önä Diosrö eseunu ucuocu, i̧huȩnȩ päö ta'anö, o'ca juiyönä adihua'a cuäcuähuämä.
Jesucristorö esetö jȩä̧cuä̧huä̧ huȩnȩ
6Tö̧jä̧hua̧tö̧rö̧ pi̧yȩ huȩnȩ cu̧huo̧juȩto̧mȩnä̧, adiu jȩpö̧jä̧ Jesucristo hueähuä. Ja̧'hua̧ta̧nö̧ cuesetinö'inä, ucuru ttu̧huo̧juȩti̧nö̧'i̧nä̧ jȩcu̧'i̧nö̧ ta'anö jȩcu̧'o̧mȩnä̧, juhua'a yabonö cu̧ju̧ru̧huä̧cua̧jä̧. 7Ja̧'hua̧nö̧ ja̧'a̧nä̧ täbo huȩnȩ, amönä ttucuocu huȩnȩ, cuamöcuädä'. Dios i̧huȩnȩtä̧ amöcuädö kä̧hui̧. 8Jättäpäyotö jähuä jȩto̧mȩnä̧, ji̧'qui̧cha̧nö̧tä̧ micuähua'a. Ja̧'hua̧nö̧ ja̧'a̧nä̧ Dios i̧huȩnȩtä̧ amöcuädö kä̧cuä̧huä̧nä̧, o'ca juiyönä adiu micuähua'a, jitä tö̧jö̧'i̧nä̧, yodoji tö̧jä̧cuȩ'i̧nä̧ ppäda'attö. 9Pi̧yȩmä̧ iso päi'önä huȩnȩ. O'ca toi'önä ttesetö'a̧nö̧ ja̧'a̧. 10Ja̧'hua̧nö̧ ja̧'a̧ttö̧ pi̧yȩ amöcuädö, aditätöjä Dios i̧huȩnȩ. Ja̧'hua̧ta̧nö̧ ubara ttu'ätöjä. Ujutumä Dios kö̧rö̧, o'ca toi'önä ja̧u̧ru̧ esetätö Tu̧ru̧hua̧rö̧, esetö tta̧'ä̧rä̧tö̧jä̧.
11Pi̧yȩ huȩnȩ hue'ö huo̧juȩti̧. 12Ucumä mö̧ä̧ya̧jä̧. Adiu kä̧hui̧ korotö suronä ttucuocu juiyäcua'a̧nö̧. Diosrö esetätö ttä'ca jo̧mȩ adiu kä̧hui̧, adiu cu̧ja̧'a̧ totta pä'ö. Adiu ucuocu jȩpi̧ o'ca juiyönä. O'ca toi'önärö repe'i. Diosrö esetö cua̧'cua̧ pö̧nö̧ kä̧hui̧. 13Ttö chichome jubö päi'önä Dios i̧huȩnȩ ttä̧ju̧cu̧nä̧ ucuocui. Ja̧'hua̧ta̧nö̧ tö̧jä̧hua̧tö̧rö̧ ji'äu huo̧juȩti̧. 14Ancianos huotö Diosrö pä̧huä̧ rö̧jo̧mȩnä̧ ucuru mȩ'ö̧ huettina'amä, Dios i̧huȩnȩ jicuhuähua pä'ö, Dios adiu iyinömä cunichi'ä'.
15Pi̧yȩ huȩnȩtä̧ amöcuädö kä̧hui̧, yabocu adiu esetö cu̧ja̧'a̧ tottäcua'a̧nö̧. 16Ucuhuätä cuamönä cu̧ju̧'i̧nä̧, cu̧huo̧juȩtö̧'i̧nä̧ ttu̧'ȩpä̧rö̧nö̧ kä̧hui̧. O'ca juiyönä adiunätä jȩpi̧. Ja̧'hua̧nö̧ jȩcu̧'o̧mȩnä̧, ucu suronä jȩcu̧'u̧'i̧nä̧, ucu cu̧huo̧juȩto̧mȩnä̧ ä̧ju̧cuä̧tö̧ suronä jȩttö̧'i̧nä̧ jȩpö̧ i̧cuä̧cua̧ Dios.
Currently Selected:
1 Timoteo 4: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
