प्रेरित 22
22
1“या मेरा दाजु भाइहरु र बाबाहरु हौ, तुमिहरुको अगाडि मोइले भुन्नै पड्न्या कुडा भुन्न्याछु स्हुन।” 2पावलले हिब्रु भासामै बोल्या स्हुन्यार तिनुहरु झुन चुप्प लाग्या।
3पावलले भुन्या, “मु किलिकिया इलाका टार्सस सहरमै जुन्मिया एक यहुदि हुँ, तर यइ सहरमै गमलिएलको चेला भयर हुर्किया हुँ। हाम्मा बाउ बाज्याले सिकाया धर्मसास्तरको अइनका कुडाहरु मोइले सप्पा गरि सिक्याछु। आज तुमिहरु जतिपुनि परमेसोरको कुडामै जोसिला भया छौ, मु पुनि तेइथै जोसिलो छिया। 4मोइले प्रभुले दिन्या मुक्तिको बाटोमै हँड्न्या मान्ठहरुकन मरुन्जैस्हुम्म दुख दिया, अनि स्हैनि र लोग्न्या दुबैकन पक्डेर झ्यालखानमै थुन्दिया। 5मोइले गर्या काम स्हाँचो हो भुनि ठुला पुजारि र ठुलो सबाका स्हबै मान्ठहरुले मेरो स्हाँचि दिन्छुन्। तिनुहरुकै तर्फबाट यहुदि दाजुभाइहरुका नाउँमै पक्डुन्या पत्तर पाइ मु ताँइका बिसासिहरुकन पक्डेर यरुसलेममै ल्याइकन सजाय दिन दमस्कसमै गयाछियाँ।
आम्नो जिबन फेरिया बार्यामै पावलको बयान
(प्रेरित ९:१-१९; २६:१२-१८)
6“मु दमस्कसति पुग्न लाग्दा मद्दि दिउस भयाछियो, तेइबेला एक्कासि सरगबाट ठुल्लै उज्यालो मेरो ओरिपोरि चुम्क्यो। 7मु भुइयौनि ढल्याँ, अनि मोइले यइथो भुन्या डाको स्हुन्या, ‘साउल, याइ साउल, तो मोकन क्यान दुख दिन्छै?’ 8अनि मोइले स्होद्या, ‘हे प्रभु तुमि को हौ?’ अनि उनुले भुन्या, ‘मु नासरतको इसु हुँ, जैकन तोइले दुख दिइरयाछै।’ 9मुस्हात जति जुना छिया, तिनुहरुले उज्यालो त देख्या तर मुस्हात बोल्न्याको कुडा बुज्यानुन्। 10मोइले भुन्या, ‘हे प्रभु अब क्या गरुँ?’ अनि प्रभुले मुकन भुन्या, ‘उठ, र दमस्कसमै जा, र तोइले गन्नु पड्न्या कामको बार्यामै तोकन भुनिन्याछ।’ 11तेइ उज्यालोले गद्दा मोइले केइ पुनि देख्न स्हकिन, तब मुस्हात हुन्या स्हात्याहरुले मेरो हात स्हुमाति डोर्यायर मोकन दमस्कस सहरमै ल्हिया।
12“तेइ सहरमै एकजुना हननिया नाउँ भया मान्ठ छिया। तिँ मोसाले दिया अइन उन्सार चल्न्या धर्मि मान्ठ छिया। अनि दमस्कसमै बैन्या स्हबै यहुदिहरुले उनुको मान गद्दाछिया। 13तेइ मान्ठले मेरा काखति ढुकेर मुकन भुन्यो, ‘भाइ साउल, फेरि देख्न्या होइजाउ।’ तिनुले यइ भुन्ना बित्तिकै मु आँखा देख्न्या भयाँ र तिनुकन देख्याँ। 14अनि हननियाले भुन्या, ‘तुमिले हाम्मा जिजुबाज्याका परमेसोरको इछ्या बुइन र ति धार्मिक मान्ठ इसुकन देख्न र उनुको बोलि स्हुन्न तुमिकन छान्या छुन्। 15क्यानकि स्हबै मान्ठहरुका अगाडि उनुका निम्ति तुमिले ज्या देख्यौ र ज्या स्हुन्यौं तेइ कुडाको स्हाँचि भैइ भुन्नु पड्न्याछ। 16तेइबिअ अब क्यान बार गन्न्या? उठ र बप्तिस्मा ल्हेउ, अनि इसुको नाउँमै पुकारा गरि आम्ना पापबाट स्हुद्दा होउ।’
पावलले अरु जातिकन घोइरायार सिकाया
17“अनि ताँइबाट मु यरुसलेममै फर्क्यापछि परमेसोरको मुन्दिरमै प्रार्थना गरिरयाबेला मोइले दर्सन देख्या। 18मोइले प्रभुकन देख्याँ र तिनुले मुकन यइथो भुनिरया स्हुन्याँ, ‘स्हाँटा यरुसलेमबाट जा पुडो, क्यानकि तोइले मेरा बार्यामै भुन्या कुडाहरु नेइका मान्ठहरुले स्हुन्दैनुन्।’ 19अनि मोइले भुन्या, ‘या प्रभु, मोइले स्हबै सबाघरमै गैइ तुमिकन बिसास गन्न्याहरुकन झ्यालखानामै थुन्या र कुट्या यिनुहरु स्हबैकन थाँ छ। 20तुम्मो स्हाँचि दिन्या स्तिफनसकन रक्त मुसल गरि माद्दा मु सहमत छिया। अनि स्तिफनसकन मार्न्याहरुका टाला हेन्न बस्या छिया।’ 21तब प्रभुले मुकन भुन्या, ‘जा, क्यानकि मु तोकन अरु जातिहरुति टाडा टाडास्हम्म पठाउन्याछु।’”
22मान्ठहरुले पावलका कुडा यति मात्तै स्हुन्या। तेइपछि तिनुहरु यइथो भुन्दै ठुलो डाकाले कोक्काउन लाग्या, “यइ मान्ठकन मार्नै पड्छ! यइकन ज्युँदै छोड्नु हुनैन।” 23अनि तिनुहरु झोकले आम्ना आम्ना ओड्न्या टाला चिर्दै र सरगतिर धुलेउटो छड्डै कोक्काउन लाग्या। 24यइ देख्यार रोमि सिपाइका ठुला मान्ठले भुन्या, “पावलकन सिपाइ बैन्या ठौर भित्त ल्हिइ कोर्रा लाइदेउ। कैले कोर्रा लाउँदा तेइले यहुदिहरु क्यान झोकाया हुन भुन्नोछ कि?” 25अनि सिपाइहरुले पावलकन कोर्रा लाउना बिअ बान्दा पावलले काखति ढुक्या कप्तानकन स्होद्या, “क्या रोमि मान्ठहरुकन दोसि नठराइ कोर्रा लाउन पाइन्छ? क्या रोमि अइनमै यइथै गन्नु भुनि भुन्याछ?”
26कप्तानले यइ स्हुन्यापछि सेनापतिति गैइ यइथो भुन्यो, “तुमिले यइकन क्या गन्न आँट्याछौ? यइ मान्ठ त रोमि रैछ।”
27यइ कुडा स्हुनेर सेनापतिले भित्त पस्योर पावलकन स्होद्यो, “मुकन भुन् क्या तो स्हाँच्चै रोमि मान्ठ होइ?”
पावलले भुन्या, “अँ मु रोमि हुँ।”
28सेनापतिले भुन्यो, “तर मु त रुपिँया तिरेर रोमि मान्ठ भया हुँ।”
पावलले भुन्या, “मु त जुन्मैदेखिको रोमि मान्ठ हुँ।”
29यइ स्हुन्ना बित्तिकै पावलकन कोर्राले हान्न र स्होद्न स्हतिया मान्ठहरुले छोड्या। अनि पावल रोमि मान्ठ रैछुन भुनि थाँ पायार सेनापतिले भेइ मान्या, क्यानकि तिनुले पावलकन स्हाङ्लाले बाँन्न लाया छिया।
पावल यहुदिहरुको ठुलो सबामै
30यहुदिहरुले पावलकन क्यान दोस लाया हुन भुन्न्या कुडा सेनापतिले थाँ पाउन्या इछ्या गर्या र छोडिदिया। अनि भोलिपल्ट तिनुले मुख्य पुजारिहरु र ठुलो सबाका स्हबै मान्ठहरुकन जुम्मा हुन्या आदेस दिया। पावलकन ल्हिइ स्हबैका अगाडि ढुकाया।
Currently Selected:
प्रेरित 22: JUML
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
