प्रेरित 19
19
पावल एफिसस सहरमै
1अपोल्लोस कोरिन्थ सहरमै भया बेला पावल एसिया ठौरबाट भित्त भित्तै एफिससमै आया। ताँइ तिनुले कोइ कोइ चेलाहरुकन भेट्या। 2तेइपछि पावलले तिनुहरुकन भुन्या, “क्या तुमिहरुले प्रभुमै बिसास गरेर पबित्त आत्मा पायौं?”
तिनुहरुले भुन्या, “हामिहरुले त पबित्त आत्मा छुन् भुन्न्या त हामिले स्हुन्या पुनि नाइ।”
3अनि पावलले तिनुहरुकन भुन्या, “तेइथो भया तुमिहरुले कैथो बप्तिस्मा ल्हियौं त?”
तिनुहरुले भुन्या, “युहन्नाले दिया बप्तिस्मा।”
4तब पावलले भुन्या, “युहन्नाले दिया बप्तिस्मा त पछ्तापको बप्तिस्मा छियो। युहन्नापछि आउन्या इसुमाथि बिसास गन्नु भुनि तिनुले मान्ठहरुकन भुन्ना छिया।”
5यइ कुडा स्हुन्यार तिनुहरुले प्रभु इसुको नाउँमै बप्तिस्मा ल्हिया। 6जब पावलले तिनुहरुमाथि हात राख्या, तब पबित्त आत्मा तिनुहरुमाथि आया, र तिनुहरुले नबुइन्या भासामै बोल्या र भबिस्यबानि गर्या। 7ताँइ जुम्मा बार जुना जति मान्ठहरु छिया।
8पावल सबाघरमै जाँदै तिन मुइनास्हम्म भेइ नमानि परमेसोरको राज्याको बार्यामै राम्मरि बुजुन भुनि मान्ठहरुकन सिकाया। 9तर कोइ कोइले मुन कठोर बुनाइ प्रभुमै बिसास गर्यानुन्। तिनुहरुले प्रभुले दिया मुक्ति पाउन्या बाटोकन स्हबैका अगाडि बिरोद गर्या। तेइबिअ पावल तिनुहरुको सबाघरमै जानै छोडिदिया र प्रभुमै बिसास गन्न्या चेलाहरुकन आपुस्हात ल्हिइ टुरान्नसको पाठसालामै मान्ठहरुस्हात खल गन्न लाग्या। 10पावलले ताँइ दुइ बस्र्हस्हम्म सिकाया अनि एसियाका स्हबै यहुदि र अरु मान्ठहरुले प्रभुको बचन स्हुन्या।
एफिससमै अचुम्मका काम
11परमेसोरले पावलबाट पत्याउनै नस्हकिन्या अचुम्मका कामहरु गर्या। 12पावलले छुइया रुमाल र पछ्यौडा ल्हिइ मुदौरुहरुमाथि राखिदिँदा तिनुहरुको हडा रोग भलो हुन्छियो र नराम्मो आत्मा पुनि निक्लि जान्छियो। 13यहुदि झारफुक गन्न्याहरु ओडापुडा डुल्लै नराम्मो आत्मा लाग्याहरुकन प्रभु इसुको नाउँ गाड्दै यइथो भुन्या, “पावलले प्रचार गर्या इसुका नाउँमै मु तोकन निक्लि जान्या आग्या गद्दोछु।” 14ताँइ एक जुना स्केबास नाउँ गर्या यहुदि ठुला पुजारिका सात जुना छोराहरुले पुनि यइथै गद्दाछिया।
15तब नराम्मो आत्माले तिनुहरुकन भुन्यो, “इसुकन मु रौन्छु, र पावलकन पुनि रौन्छु, तर तुमिहरु को हौ?”
16तेइ नराम्मो आत्मा लाग्या मान्ठ तिनुहरुति उम्लिनै आयो, र पस्हि लागेर तिनुहरु स्हबैकन लछारपछार गरि चोटै चोट पाड्यो र तिनुहरु घाइत्या भैइ नागै घरबाट भाग्या। 17यि कुडा एफिससमै बैन्या यहुदि र अरु मान्ठहरुमै फिजियो। र तिनुहरु स्हबै जुनाले भेइ मान्या, र प्रभु इसुको नाउँमै गुनगान गर्या। 18तेइपछि बिसास गन्न्या मथ्थै मान्ठहरु आया, र आपुले गर्या नराम्मा कामहरु अब देखि गद्दैनौ भुन्या। 19तिनुहरुमद्दि मथ्थै जुनाले टुनामुना गन्न्याले आम्ना आम्ना किताबहरु खेडि ल्याया, र स्हबैका अगाडि पोल्या। ति पोल्या किताबको हिसाब गद्दा पचास हजार चाँदिका रुडा भयो। 20यइथै गरि प्रभुको बचन फिँजिदै र सक्तिसालि हुँदै गयो।
एफिसस सहरमै खैलाबैला
21यिँ स्हबै कुडाहरु भैइस्हक्यापछि, पावलले माकेडोनिया र अखैयाको बाटो भैकन यरुसलेममै जान्या मुन गर्या। तिनुले भुन्या, “ताँइ पुग्यापछि मु रोम सहरमै जानै पड्छ।” 22तिनुकन सेबा गन्न्या दुइजुना तिमोथि र इरास्तसकन पावलले माकेडोनियामै पठाया, तर आपु मात्तै नाप्नापा दिनस्हम्म एसियामै बस्या।
23तेइबेला एफिससमै प्रभुले दिया मुक्ति पाउन्या बाटा बार्यामै माइमरि हल्ला खल्ला फिजियो। 24एकजुना डेमेत्रियस नाँउ भया मान्ठ आर्तेमिस देबिको नान्नाना मुन्दिरहरु बुनाइ कामदारहरुकन मथ्थै काम गन्न दिन्छियो। 25अनि डेमेत्रियसले आम्ना काम गन्न्याहरुकन र अरु तेइथै काम गन्न्याहरुकन एक्कै ठौर जुम्मा गरेर भुन्यो, “भाइहरु हौ, तुमिहरुले थाँइ त छ, क्या यइ कामबाटै हामिकन मथ्थै कुमाइ हुन्छ। 26तर यइ पावलले क्या भुन्दैछ तुमिहरुले देख्या र स्हुन्या पुनि छौ। मान्ठहरुको हातले स्हज्या देउताको मुत्तिहरु त देउता नै होइनुन् भुन्दैछ। तेइले एफिसस र एसियाको ठौरमै बैन्या प्रया जैथो मान्ठहरुकन आम्नो कुडा सिकायर उस्काउँदैछ। 27यइबिअ हाम्मो खेलो ब्यापारको काम नास हुन्या मात्तै हैन तर ठुल्लै देउता आर्तेमिसको मुन्दिर पुनि काम नलाग्न्या हुन्याछ, र स्हबै एसिया र सुन्सारका मान्ठहरुले पुजा गर्या ठुल्लै देउताकन पुज्न छोड्न्याछुन।”
28यइ कुडा स्हुन्यार तिनुहरु माइमरि झोकायार, “एफिसिहरुको आर्तेमिस देउता नै स्हबै भुन्दा ठुलो हो।” भुनि कोक्काउन लाग्या। 29यइ कुडा स्हबै सहरभरि हल्ला फिजियो र तिनुहरु स्हबै एक जुट भैकन पावल र तेइका स्हात्या माकेडोनिया ठौरका गायास र अरिस्तार्खसकन स्हमात्यार लछार पछार गद्दै ठुलो सबा गन्न्या ठौरमै ल्हिया। 30पावलले मान्ठहरु भया ठौर जान खोज्या, तर बिसासिहरुले तिनुकन जान दियानुन्। 31एसियाका कोइ हाकिमहरु पावलका स्हात्या छिया। तिनुहरुले पावलकन सबा गन्न्या ठुलो ठौरमै नजानु है भुन्या। 32तब तिनुहरु अक्कै अक्कै कुडा गद्दै कोक्काउन लाग्या। क्यानकि तेइ सबाका मान्ठहरु अलमलिया छिया, र मथ्थै मान्ठहरुले त तिनुहरु क्यान जुम्मा भयाछुन् भुनि थाँ पाया छियानुन्। 33तेइपछि यहुदिहरुले भिडबाट अलेक्जेन्डर नाउँ भया मान्ठकन अगाडि ल्याया, र भैरया घटनाको बार्यामै भुन्न लाया। अलेक्जेन्डरले हातको स्हान गरि मान्ठहरुबाट आपु जोगिना बिअ केइ बोल्न खोज्या। 34तर तिनुहरुले तेइ यहुदि रैछ भुनि थाँ पायार स्हबै जुनाले एक्कै डाकोले लगबग दुइ घुन्टा जति कोक्काउँदै भुन्या, “एफिसिहरुको स्हबै भुन्दा ठुलो देउता आर्तेमिस हो।”
35तेइपछि सहरका हाकिमले मान्ठहरुकन सान्त पाडिस्हक्यापछि भुन्या, “एफिससका मान्ठौ, ठुलो आर्तेमिसको मुन्दिर र सरगबाट छत्तिया यइखो मुत्तिको हेरालो एफिसस सहर हो भुन्न्या कुडा स्हबैकन थाँ छ। 36यइ कुडा स्हाँचो हो र कोइले पुनि हैन भुन्न स्हक्तैन। यइबिअ तुमिहरु चुप्प लाग्नु पड्छ, र केइ उत्ताउलो काम गन्नु हुदैन। 37क्यानभुन्या तुमिहरुले ल्याया यिँ मान्ठहरुले मुन्दिरबाट केइपुनि चोर्या नाइ। र हाम्मो देउतान हेला पुनि गर्यानाइ। 38यइबिअ डेमेत्रियस र तेइका काम गन्न्याहरुले कोइको बिरोदमै उजुरि गन्नु पड्छ भुन्या अदालतहरु खुल्ला छुनैछुन, र न्यायदिसहरु पुनि छुनैछुन, यइबिअ एकाले अक्काको बिरोद गन्न्या हो भुन्या मुद्दा हाल्नु। 39तर यइ कुडा नभइ अरुयै कुडाको बार्यामै हो भुन्या तेइको फैसलाका निम्ति छलफल गरिदिन स्हक्न्याछौं। 40तेइबिअ आज भैरया यइ खैलाबैलाको दोस हामिकन आउन स्हक्छ भुन्न्या भेइ छ। क्यानभुन्या यइ नचाइदो खैलाबैलाको बार्यामै हामि केइ पुनि भुन्न स्हक्तैनौं।” 41यति भुनि स्हक्यापछि ताँइ खेडिया मान्ठहरुकन हाकिमले बिदा गर्या।
Currently Selected:
प्रेरित 19: JUML
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
