Zaburu 107
107
BOKU I LIMA ANGUNA:
Zaburu 107--150
Kasukuru Minaaka i Manga Mia Ipasalaamatina Kawasana Opu
107:1-43
1 #
Zab. 100:4-5; 106:1; 118:1; 136:1; Yer. 33:11. Sukurumo i KAWASANA OPU roonamo Incia amalape,
tee kaasina abakaa saʼumurua.
2Taroakamo o giu incia sumai abhoasakea manga mia mopadhana itolosina KAWASANA OPU,
siitumo manga incia mopadhana itolosina minaaka i kanarakaa,
3tee mopadhana iromusakana minaaka i manga lipu mosagaanana,
minaaka i timbu tee minaaka i bhara,
minaaka i napa tee minaaka i salata.
4Dhaangia uka manga mia mopekalingka-lingkana i tana matuu,
tee inda amatau dhala moporopena i kampo imbooresina mia.
5Manga incia amaara tee amatuu bhorokona,
tee ailamo bhari-bharia iharapuna.
6Manga incia agora tee aemani tulungi i KAWASANA OPU i wakutuuna kaseke,
kasiimpo Incia arambasakea manga minaaka i kanarakaana,
7tee atondaia alaloi dhala momakate,
sabutuna manga incia akawa i kampo imbooresina mia.
8Taroakamo manga incia asukuru i KAWASANA OPU roonamo kaasina molagina,
tee roonamo manga giu inda momentela ipewauna to maanusia,
9sababuna Incia apatumpu incana mia momatuuna bhorokona,
tee apekambosu mia momaara tee giu momalape.
10Sagaa minaaka i manga incia auncura i nuncana kalalanda tee kagalapu,
manga mia itaangi i katorongku amaporo incana tee atobhoke tee rante ase,
11roonamo manga incia adorohaka tee firimanina Aulataʼala,
tee amendeu atarima kaadharina Kawasana Opu Momalanga.
12Siitumo sababuna Incia apisaki ngangarandana manga incia tee karajaa matamo,
manga incia amandawu tee inda dhaangia motulungia.
13Kasiimpo manga incia agora i KAWASANA OPU i wakutuuna kaseke,
tee Incia apasalaamatia manga minaaka i kanarakaana;
14Manga incia apalimbaia minaaka i kalalanda tee kagalapu,
tee abhotukimea o kabhokena rantena manga incia.
15Taroakamo manga incia asukuru i KAWASANA OPU to kaasina molagina,
tee manga giu inda momentela ipewauna to maanusia,
16roonamo Incia apasaki manga bhamba tambaga,
tee atumpo manga kapasona bhamba motokarajaana minaaka i ase.
17Dhaangia uka momembalina mokabhongo-bhongo roonamo feʼelina manga incia modorohaka,
tee roonamo kasalahana karona, manga incia atosikisaa.
18Manga incia amendeu akande opea uka,
tee o ajalana manga incia amakasumo.
19Kasiimpo, manga incia agora aemani tulungi i KAWASANA OPU i wakutuuna kaseke,
tee Incia apasalaamatia manga minaaka i kanarakaa.
20KAWASANA OPU afirimani, tee o firimanina sumai amembali apaunto kapiina manga incia,
tee apasalaamatia manga minaaka i bhalona koburu.
21Taroakamo manga incia asukuru i KAWASANA OPU roonamo kaasina molagina,
tee roonamo manga giu inda momentela ipewauna to maanusia.
22Taroakamo manga incia abhawa pasombaa kasukuru,
tee apokoleleakea bhari-bharia ipewauna apoose asambo-sambo!
23Dhaangia uka mosapona mokarajaana i kapala i tawo,
siitumo manga mia mopodhagana i andalaoge.
24Manga incia akamatea bhari-bharia ipewauna KAWASANA OPU,
tee manga giu inda momentela ipewauna i andalaoge.
25Incia afirimani, sabutuna akawamo ngalu tee garura
moangkana manga ewona tawo pekalanga-langa.
26Manga incia atoangka sakawana i antara, kasiimpo atotudhaaka i andalaoge.
Manga incia akailanga kabaranina roonamo apoaro tee balaa.
27Manga incia alingka kabhele-bhele tee adida mboomo mia malango,
tee ailamo o akalana.
28Kasiimpo manga incia agora aemani tulungi i KAWASANA OPU i wakutuuna kaseke,
tee manga incia arambasakea minaaka i kanarakaa,
29tee apaunto garura,
sabutuna manga ewo i tawo amembali amalino.
30Kasiimpo manga incia akaunde-unde roonamo amalinomo,
tee Incia abhawea manga i labusa iporopeana.
31Taroakamo manga incia asukuru i KAWASANA OPU roonamo kaasina molagina,
tee roonamo manga giu inda momentela ipewauna to maanusia!
32Taroakamo manga incia amuliangia i tanga-tangana poromusakaana uumatina,
tee apujia i nuncana majilisina manga mancuanana lipu.
33Incia abhalii manga umala amembali tana matuu,
tee manga matana uwe amembali tana inda mokouwe.
34Tana mosuburu apamembalia tana mokogara inda momembalina ipombulaaka penembula
roonamo kadhakina manga mia mombooresia.
35Incia uka abhalii tana matuu amembali kolam,
tee o tana inda mokouwe apamembalia manga matana uwe.
36KAWASANA OPU ataroaka manga mia momaara amboore iwe sumai,
kasiimpo manga incia abhangu kota to tampana mbooresana.
37Manga incia ahewi manga inawu tee apombulaakea puuna angguru,
tee apotibhaaka timpua mobhari.
38Minaaka i kabarakatina Kawasana Opu, manga incia ajulu o kabharina,
tee Incia inda ataroaka binata kadhambaakana akura o kabharina.
39Maka sapadhana sumai, manga incia atalomea musuna, sabutuna o kabharina akuramo tee atungku i aroana bhalina,
roonamo o musu apisaki tee apacilaka manga incia tee apekaporoa incana.
40KAWASANA OPU apasapoakea kahina to manga kaogesana lipuna,
manga incia apewaua apekalingka-lingka i tana matuu tee inda apotibhaaka dhala.
41Maka o mia misikini aangkea minaaka i kanarakaana,
tee manga incia apamembalia ajulu o kabharina mboomo gulumana dumba.
42Manga mia mobanara akamatea o giu incia sumai tee akaunde-unde,
maka o ngangana mia madhaki atosoncongi.
43Taroakamo manga mia moʼaarifu akamata bhari-bharia o giu incia sii,
tee afahamua o kaasina KAWASANA OPU molagina.
Currently Selected:
Zaburu 107: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
