Pilimone 1
1
Na Popodalaina Na Leta
1Ara Paula na tinoni tapiuna tana Karisito i Jisu beto i Timote na tasida.
Na leta api sa lao tao Pilimone, na baere jongamu beto qu mekarai roiti tavitigei agei, 2tao Apia na lulumei beto tao Akipasi isa sa somana varene tavitigei agei, beto tana ekelesia pa ruma tamu.
3Na roroqu jongana beto na bule tana Tamasa na Tamada beto tana Bangara i Jisu Karisito mi somana tamugou.
Na Vairoqu Beto Na Rarange Ti Pilimone
4Ara qa paranga jongana lao tana qua Tamasa doru totoso qa gigalia na isongomu ao pana qua vavara, 5ura qa nongoronia ara sa na vairoqu tamu sa lao tadira na tinoni tana Tamasa beto na rarange tamu sa lao tana Bangara i Jisu. 6Na vavara taqu sa na miu mekarai somana pana rarange sa mi ngangalinia na gigalai vataledi doru sakasava jongadi taqe isongoria pana oda kole kame tana Karisito. 7Tasiqu, sa vaqera vivitigisiu beto sa vamanotosiu ara sa na vairoqu tamu, ura na bulodi ira na tinoni tana Tamasa sa qu vakopeleria ao.
I Paula Sa Tepa Vania I Onesimasi
8Ko sa vei sa pana qua kole kame tana Karisito qa varene vatale sara ko mana boka pojanigo gu ara sisa sa pada ko muna roitinia ao, 9ba pana soana vairoqu sa isa tugu ara Paula na babaragosoqu beto na tinoni tapiuna tana na Karisito i Jisu sa qa tepa vivitigigo gu sao. 10Qa tepa vivitinigo gu ara ao sa na veveina na qua koburu, i Onesimasi, isa sa vei na tuqu tonai qa korapa tapiu ara.#1.10 Na ginuana na isongo <<Onesimasi>> sa <<Sa poreveveina, sa vavagua, babi sa vaitokai vatale>>. 11Isa sa na tinoni na totoso qai jola pori sa kepore kai vaitokai jongana bi vapodo vanigo ao, ba kopira sa koleona vaitokai jongana tamu beto taqu sisa.
12Isa sa qa garunu mule laonia tamu inana, isa na buloqu sosoto ara. 13Isa tugu qa kole nyorogua aru tamania lani ko bi vanisiu sa na vaitokai quke boka valamea ao tonai qa korapa tapiu talenia ara sa na nongoro jongana qau. 14Ba tonai qa oqoro tekua mai sa na roqumu ao poni sa qake nyorogua roiti vei inara sara, ko na mua roiti jongana sa mike vei ara gu qa jujukunigo ao goto mi koko lame vei tu pa mua nyorogua malumuna sosoto. 15Ura palu na ginuana sa tavarijo iapeki totoso tamu sisa sa vei ko ao mu teku isongia kamua na kamua sisa. 16Ko kopira nake pinausu sisa goto sa poreveveina jolania tu na pinausu, na tasida jojonga. Ko taqu sa poreveveina sisa ko tamu ai mina koi vei poreveveina jola sisa pa toa tini beto pa toa tutina na Bangara.
17Ko vei muna isongo veinisiu na kalemu pa roiti tana Bangara sara, sa mu vakamu veinia bi ara sosoto sisa. 18Vei bi roitinia kaki sela tamu babi koleona kaki ona lilipu tamu sisa, poni sa mu vagorenisiu ara. 19Ara Paula qa kutinia na limaqu mekaqu sa api: Ara mana lipua. Nake savana manake kilu pojanigo ara sa ao na toa koregana qu isongia kopira sa qu oqoro lipunia taqu. 20E, tasiqu, ara qa nyoroguanigo ao ko mu vaqerasiu pana oda toa tutina na Bangara. Mu vakopelia na buloqu pana oda toa tutina na Karisito.
21Qa vasosotoa ara sa ao kode muna vatabesiu ko sa vei sa qa kuti lao vanigo, ko qa gigila vatalea ara sa ao isa muna roitinia sa kode mina jolania sisa vei qa korapa tepai ara. 22Ego ko kai qua tepa mule sa api: mu vatana vanisiu kai lose vavatogani tinoni kamudi. Ura qa gigila vatalea ara sa na vavara tamugou mai taoe ko ara kode mana lao kamugou sagou.
Na Paranga Vinaokotona
23Na dia roroqu lavata tamu qarigu ira Epaparasi, isa agei karu qe mekarai tapiu talenia na roiti ti Jisu Karisito, 24beto vei tugu ira Maka i Arisitakosi i Demasi beto i Luke, ira qai mekarai roiti tavitisiu ara.
25Na vairoqu varialona tana Bangara i Jisu Karisito mi vavaburogou agou.
Currently Selected:
Pilimone 1: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
