2 Timote 1

Na Popodalaina Na Leta

1Ara Paula na tinoni tagarunuqu tana Karisito i Jisu, qa tagarunu isa vei sa nyoroguania na Tamasa ko mana ule votunia sa na taringungutina na toa sa kole tana Karisito i Jisu.

2Na leta api sa lao tao Timote, ao qu vei na qua koburu qa roroqu vivitigigo.

Na vairoqu vaialona, na vairoqu vaitokai beto na bule tana Tamasa na Tamada beto na Karisito i Jisu na oda Bangara mi somana tamu.

Na Vavara Paranga Jongana Beto Na Paranga Vaivaneqi

3Ara qa paranga jongana lao tana Tamasa isa qa vatarasaennia na monana liosona, qai vei ira na qua tite pa moa. Ko qake koroto gigaligo ara pana qua vavara na rane na bongi sao totonai qa paranga jongana lao tana. 4Qake mumania ara sa na oni kolo matamu ao ko sa vei sa qa nyorogua dogoro vivitigigo ko ma boka tavapugelenia ara sa na qera qau. 5Qake mumania ara sa na rarange sosotona sa isongia perangana na mua tite qoqoele i Loisi beto na tinamu i Iunisi, beto ko kopira qa gigila vatalea ara sa qu isongia ao sa na rarange isa.

6Ko sa vei sa qa korapa poja ligunigo sao ko mu sutungu vavuvurungia sa na vaivana tana Tamasa qu isongia ao totonai qa vaoponigo na limaqu ara. 7Ura na Tamasa nake gagala vaivapangongoro sa vanigita, goto isa tu na gagala sa vanigita na neqi, na vairoqu beto na roroqu mauruna.

8Ko sa vei sa muke pogoso kekeania sa na vavakatona na veveina na oda Bangara beto na veveiqu ara qa tapiu talenia sisa. Goto mu somana gosororia pana neqi tana Tamasa sira na tapata qa gosoro taleniria na nongoro jongana ara. 9Na Tamasa isa sa alogita beto sa kukugita sa gita ko ta toania na toa liosona sau. Ko nake oda roiti jongadi sa sa alonigita na Tamasa gita goto pana ona nyorogua mekana beto na ona roroqu vaialona tu na Tamasa sa taqe taalo sa gita. Ko tonai tu sa oqoro podalai na totoso sa vanigita isa tana Karisito Jisu sa na roroqu vaialona isa. 10Ba kopira na roroqu vaialona isa sa sa tadogoro vakabere pana bola votu lame tana oda inaalo, na Karisito Jisu. Ko na Karisito Jisu sa tei valovea tu sa na mate beto sa vadogoro vakaberenigita pana nongoro jongana sa na toa kepore vinabetona. 11Ko na nongoro jongana tugu api sa qa tavilenia na tinoni tarae, na tinoni tagarunuqu beto na tinoni vaivagigalai sara. 12Ko sa vei sa qa gosoro taleni vitigi tugu vei. Ba ara qake keania sa vei isa, ura qa gigila vataleaqua ara sa isa qa rangea beto ko ara qa gigila vatalea sa isa sa boka kopu vasarea tinganai mina kamua na rane bebetona sa isa qa rangenia isa ko mi kopunia.#1.12 Na kipa paranga <<isa qa rangenia isa ko mi kopunia>> mina boka tapeluku <<isa sa rangenisiu ara ko mana kopunia>>

13Mu doro tutiria sira na paranga tuvisidi qu nongoroniria taqu, beto mu togasa gu pana rarange beto na vairoqu qu isongia tonai qu isongia na Karisito Jisu. 14Mu kopu vasarenia pana neqi tana Gagala Tabuna sa kole tadagita sa na isisongo jongana qu tarangenia ko muna kopunia.

15Ao qu gigilaimua sa ira doru pa Esia, vevei ira Puqelasi beto i Hemoqenesi, sa qai gabala vapelenisiu sara. 16Na Bangara mi vania na vairoqu vaitokai sa na tatamana ti Onesiporosi, ura soku totoso sa isa sa sa vamanotosiu ara beto sake keania isa sa na veveina ara qa tapiu. 17Goto totonai sa kamu paro pa Romu sa sa nyaqo tututisiu tu tinganai vei neqa, tinganai ko sa batisiu tu. 18Na Bangara mi vabatinia nona vairoqu vaitokai na rane bebeto sisa. Ira na roiti sa vaitokainiria pa Episasi isa sa ao ba qu tei gigila vataleamua tu.

Currently Selected:

2 Timote 1: LGA

Highlight

Copy

Compare