Joshua 8
8
Musi wa Ai atenda kugukamu
1Ndienu, Bambu Sapanga ampwagila Joshua, “Gwijogopa, wala wiihola, gwaajukua bakomana ngondu baku boti nzendania nabu bukulapula musi gwa Ai, ndaba bambu nkolongu juku Ai numbei mu maboku gaku pamu na bandu baki na musi gwaki ni mipaka jaki. 2Mwaguhalabana musi wa Ai pamu na bambu nkolongu waki ngati emuguhalabana musi wa Yeliku pamu na bambu nkolongu waki. Mali gaki ni mipugu jemwajikamula jibia mali gino. Nnzenda mukugulapula musi kuhumi upandi gumunyuma.”
3Enu, Joshua jwaboka pamu na baakomana ngondu baki boti kujenda kugusambuli musi uku Ai. Jwahagula baakomana ngondu baabii na makili elupu selasini na kwaatuma ikilu. 4Joshua jwaapwagila ana, “Nzoanya sapi, mmbanganya mwagujobalia musi kuhumi upandi guku nyuma. Mwiijenda kutali na musi, ila mwiibia mwijiandi kukomana kipindi soti. 5Nepani, pamu na baakomana ngondu, twaguhegalia musi. Ebipita kunza bandu kuhika kukomana na twepani ngati ebatenda pu utumbuli, twepani twiitenda kwaatila. 6Nabombi biendalia kutubengana mbaka pabibiya kutali na musi gwabu, ndaba biholalia butubengini ngati ebutubenga pu utumbuli. Twepani twaaleka butubengana. 7Ndenu, mmbanganya mwipitila kuhumi hoku komwajobiki nu kugukamu musi, ndaba Bambu Sapanga, Sapanga wino, ampekia mbanganya musi hogu. 8Emwagukamula musi mwagujosa mwotu, mwiihenga ngati Bambu Sapanga eandagalakia. Haga ndi malagalaki ginu gamwiipwata.” 9Enu, Joshua jwaatuma ajenda pandu pukujobale, na bombi batama upandi wa kolijingi lyoba wa musi uku Ai pikilanda ja musi wa Ai na Beteli. Lakini Joshua ikilu jela jwagoni ku likambi la Aizalaeli.
10Joshua jwajumuka pulukela ngani, jombi na aseja buku Izilaeli baalonguliya bandu kujenda ku Ai. 11Baakomana ngondu boti bajalongana nabu bahika pambipi na musi we hogu nukutama upandi uku kazikazini, papuje labii ligomba pikilanda musi wa Ai. 12Ndienu jabia jwaajukwi akomana ngondu ngati elufu nhwanu elahe, nakwaabeka ajoba pikilanda ja musi wa Beteli na Ai, upandi golijingi lyoba wa musi wa Ai. 13Nsambi nkolongu gwa baakomana ngondu wabia ujiandi kukomana ngondu upandi wa kazikazini ja musi na babahigalia babeka upandi golijingi lyoba gwa musi. Lakini ikilu heji Joshua jwagonila kuligomba.
14Bambu nkolongu wa musi gwa Ai ejabona hela, jombi na bandu boti ba musi hogu bajenda nyata pulukela namangani, ili kuketangana na Aizilaeli kukomana nabu pandu puhele ukujenda ku ligomba la losi luku Yoludani. Lakini ngase jamanyiki musi waki agujobali kuhuma kunyuma. 15Ndienu, Joshua pamu na bandu bajabi naku bilihenga ngati atenda kusindwa, batumbuliya kulihenga ngati atila kukelabuka munyuma palongi jabu kujenda kulungwenza. 16Akomana ngondu boti baatama mmusi uku Ai bakemana pamu kwapwata Aizalaeli na pababia ampwatali Joshua bajenda nukuleka musi wabu kutali. 17Nga mundu jokapi jojwahigali mmusi gwa Ai wala ku Beteli jwanga kwaapwata Aizalaeli. Ndienu buguleka musi wabu nntopu na kwaapwata Aizilaeli.
18Ndi Bambu Sapanga ampwagila Joshua, “Tondabiya nkoa waku gogubii mu kuboku jaku langia kumusi wa Ai ndaba musi hogu isinugubeka mu maboku gaku.” Joshua jwalangia nkoha waki mmusi wa Ai. 19Joshua ejalangia pe nkoha gwaki kumusi gwa Ai kola, nsambi wa bandu gogwajobali upandi golijingi lyoba gwapita nukujingi mmusi, bugukamula musi nukujosa mwotu. 20Ndienu, akomana ngondu buku Ai ebalinga munyuma, babona lihoi kuhuma kumusi likwela mbaka kunani. Nabombi ngase babi nu uwesu gukutila kujenda upandi gwokape, Aizalaeli bababia atili ku lungwenza baang'anambuki nakwaabenga babia atenda kwaabenga bala. 21Joshua na Aizalaeli boti ebabona nsambi wa bandu gogwajobalia gugukamwi musi, ni lihoi likwela kunani, akomana ngondu baang'anambukia nu kutumbuli kwaasambuli bandu buku Ai. 22Aizilaeli babahigali ku musi batenda kupita, lakini bandu boti buku Ai babiya ayongulitiwi na Aizalaeli na bombi batenda kwaakoma, ngajojwahigalile, 23ila pe bambu nkolongu jwa musi wa Ai ankamula koni jubi mwomi nukupeleka kwaka Joshua.
24Aizalaeli pabajomula kwaakoma bandu boti ba musi gwa Ai bababii kulungwenza kobabia baabenga, bakelubuka ku musi wa Ai na kwaakoma bandu boti babahigali homu. 25Bandu boti babaakomiki mu lisoba heli, akanalomi na akambomba babia ngati elufu komi na abeli elehe. 26Joshua ngase jwaahulwi kuboku kwaki kojabi jukamwi nkoha kulangi ku musi wa Ai mbaka pajaakoma bandu boti ba musi wa Ai. 27Aizalaeli biikamula inyama yu kupugwa na mali pe ngati Bambu Sapanga eandagalakia Joshua. 28Enu, Joshua jugutinia musi gwa Ai kwa mwotu nu kuguhenga gubia ling'oba mbaka lelenu. 29Ndienu bambu nkolongu juku Ai buntonga nkoa nukugujemeka mbaka pakamii. Lakini lyoba elatumbulia kujingi, Joshua jwalagalakiya aguhulua ntuhi kuhuma mu nkongu nu kuguleke pi litanga la musi ndi alundika lilundu likolongu la malibu panani ju ntui we hogu, lilundu le heli libii mbaka lelenu.
Joshua jaakomboke bandu lilaganu
30Ndienu, Joshua ansengila mesa jukupiki matambiku Bambu Sapanga, Sapanga jwa Aizalaeli mu kitombi sa Ebali. 31Musa ntumisi guka Bambu Sapanga ngati ejwalagalakia Aizalaeli. Joshua jasenga sukupwata ngati eaandiki mwikitabu sa malagalaki gaka Musa kubanga Mesa jukupiki matambiku asenga sukutumi malibu ganga kuhongo, wala kuguswa sindu sokapi si kisoma soma. Panani ja mesa jukupikii matambiku heji ampikia Bambu Sapanga matambiku gu kutinii ni litambiku lukutama ku lukwali. 32Na hoku, koni Aizilaeli boti atenda kunndingali, Joshua jwaandika malagalaki gaka Musa panani ja malibu. 33Aizalaeli boti pamu na akakilongosi babu, aseja na batemu na ageni boti bababi pikilanda jabu, bajema kila upandi pambipi ni Lisanduku li Lilaganu laka Bambu Sapanga palongi jaka agolu Alawi bababia atotwi Lisanduku li Lilaganu laka Bambu Sapanga. Bangi bajema kwi kitombi sa Gelizimu na bangi kabee bajema kwi kitombi sa Ebali, ngati Musa ntumisi jwaka Bambu Sapanga, ejalagalakia pu utumbuli namuna Aizilaeli ebipengaliwa. 34Ndienu, Joshua jwaasomila malagalaki goti, kupengalewa na yaambamba ngati eiandikwi mu kitabu sa malagalaki. 35Ngase labii lilobi lejaalagalakia Musa lelule Joshua ngase julisomike palongi ja Aizalaeli, koni abii akambomba na bana na ageni baatamika pamu nabu.
Currently Selected:
Joshua 8: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
