Joshua 7
7
Mahakau gaka Akani
1Lakini Aizalaeli ngasebabi bukuhobaleka kwa hindu yeapiiki litambiku ili kuikoma ndaba Akani jwajukua hindu yebalagalakiya litambiku ili kuitini. Ndienu inyela yaka Bambu Sapanga yabiya kwa Aizilaeli. Akani jwabia mwana waka Kalimi nsokoo waka Zabudi jojwahumila lukolu lwaka Zela ulikabila laka Yuda.
2Joshua jwaatuma bandu kuhuma ku Yeliku kujenda ku musi gwa Ai, gogwabi pambipi na Beti aveni, upandi golipita lyoba gwa musi wa Beteli. Jwaapwagila, “Nzendania mukalalukiya majambu gu nndema.”
Ndienu bandu bala bajenda nukulaluki majambu gu nndema gola. 3Pababuja kwaka Joshua bapwaga, “Nga lasima kwaatuma bandu boti kwaalapu bandu buku Ai, waatuma bandu elupu ibeli au elupu itatu pena. Waasumbu bandu boti baakomana ngondu kujenda kukomana kola, gola nga musi nkolongo.” 4Enu bandu ngati elupu itatu helahe bajenda kukomana na bandu ba musi wa Ai, lakini bandu ba musi hogu batenda kwaabenga. 5Bandu buku Ai baakoma Aizalaeli selasini na sita nakwaabenga kuhuma kwi litanga la musi mbaka ku Sebalimu, baakoma puhele. Aizalaeli babia nu lujogopu na basoka makili.
6Joshua jwajendula ingobu yaki nukulileke pai palongi ji Lisanduku li Lilaganu laka Bambu Sapanga jwatama pala mbaka pakamii. Nabombi aseja bahenga ahelahela bilijitalia luhombi mu mimutu jabu kulangi abii nu usungu. 7Joshua jwapwaga, “Mwaa Bambu Sapanga! Ndaba jaki gutulobwisi losi lwa Yoludani nukutuleta mu maboku ga bandu buku Amoli ili butukomaje? Nambanga wakatuleka tuigalia pe kwii ja losi lwa Yoludani! 8Mwaa Bambu, mbwaga kike ndaba Aizalaeli baatiliki abaja babo? 9Enu, bandu buku Kanaani pamu na bandu bangi boti bu nndema gongo ebiimanya majambu aga biitenda kutu yongolota nukutuputa tipitipi pu nndema twiibonikana. Boo, enu misi gutenda kike ili kulangi gubii na makili?”
10Bambu Sapanga ampwagila Joshua, “Jumuka! Ndaba jakii gulileki pai anana? 11Aizalaeli atei mahakau, ndaba asindiki kupwata lilaganu lenaalagalaki alikamula. Ajukwi hindu yengi yeyatakiwa kutiniwa, ajibiki nu kupwaaga isoli nu kwiibeka pamu na hindu yabu. 12Ndienu Aizilaeli ngaseawesa kwawesa abaja babu, baatila abaja babu ndaba bilihengiki beni kuba sindu sukutiniwa! Nganikubi pamu nabombi kabete anangasemmbohiki hindu yeibii kati jino yeyapikiwi kutiniwa. 13Enu, jumuka waapwagila bandu alibeka sapi kunndumbali Bambu Sapanga ndaba ji lisoba li kilabu, nepani Bambu Sapanga, Sapanga wabu, Sapanga jwa Aizalaeli, mbwaga ana, ‘Nkati jino ibii hindu yeyapikiwi kutiniwa, ngamwiiwesi kukomana na abaja binu mbaka hindu heyi ibiya ibokiki kati jino!’ 14Pulukela mwaboti mwihika palongi jangu, likabila ku likabila. Likabila leliihaguliwa na Bambu sapanga liijenda kulongi, mwiika lukolu ku lulukoo. Lukolu lolwiihaguliwa na Bambu Sapanga lwijenda palongi kilongu palongi jikilongu. Kikaja senakisagula kiihegalia palongi mundu jumu jumu. 15Mundu jokapi jobanketania na hindu yeabei palongi jaka Sapanga ankoma nu kuntini pa mwotu, jombi pamu na kila na hindu yejubii naku ndaba jusindiki kupwata malaganu gangu nepani Bambu Sapanga nu juhengiki lijambu lihoni ku Aizalaeli.”
16Enu, Joshua jwajumuka pulukela ngani, jwaaleta Aizalaeli boti palongi jaka Bambu Sapanga likabila ku likabila, likabila laka Yuda batenda kulisagu. 17Likabila laka Yuda jilileta palongi jaka Bambu Sapanga lukolu ku lukolu, nu lukolu lwaka Zelahi lwatenda kuluhagu. Kikaja ku kikaja ni kikaja simu saka Zabudi batenda kukihagu. 18Ndienu, Joshua jwiileta ikaja yaka Zabudi palongi jaka Sapanga mundu jumu jumu na Akani mwana waka Kalimi jojabii nsokoo waka Zabudi na mwana uka Zela wi likabila laka Yuda batenda kulihagu. 19Joshua ampwagila Akani, “Gwamwanangu, gupega magoti nu kundumbali Bambu Sapanga, Sapanga wa Aizalaeli, nndumbalia nu gumbwagila gaguhengiki gala na gwinhiya.” 20Akani anzibua, “Hena sakaka hengiki mahakau palongi jaka Bambu Sapanga, Sapanga wa Aizalaeli. Nahela ndi enahengiki, 21enijibona ingobu jimu jaamboni kuhuma ku Babeli, madini ga feza gabia kilu ibeli ni kidogu nu nndaba gwa zahabu gwabia nusu kilu, natokuliya nu kujukuu, nahembi pai mu lihema lango nu kuhiya madini ga feza gabia pai ja hindu yeheyi.”#7:21 Shekeli ndi kipemu seapemila Aebulania.
22Enu, Joshua jwaatuma bandu bala, nabombi bajenda ku lihema laka Akani. Kumbi jwabiya juhiiki mu lihema laki nu madini ga feza gabii pai jaki. 23Biijukua hindu yela kuhuma mu lihema nu kuipeleka kwaka Joshua na bandu boti Aizalaeli, biitanda pai, palongi jaka Bambu Sapanga. 24Ndienu, Joshua pamu na Aizalaeli boti, bunzukua Akani mwana waka Zela bumpelika ku ligomba la mang'aliku, bunzukua pamu na madini ga feza gala na ingobu na zahabu na bana baki akanalomi na bana baki akambomba na ng'ombi yaki na maponda na makondoo gaki ni lihema laki na kila sindu sejabii nasu. 25Joshua anndalukia Akani, “Boo, ndaba jakike gutuleti mang'aliko? Bambu Sapanga jwaguletila mang'aliku lelenu gwamwete.” Aizalaeli boti bundapula Akani ku malibu mbaka kuwa. Ndienu biilapula kwa malibu kikaja saki soti mbaka kuwa na kwaajosa mwotu. 26Ndienu balundika malibu gingipi panani jaki lilundu la malibu gehaga gabi mbaka lelenu na pandu je hapa bapakema ligomba la mang'aliku mbaka lelenu, ndienu inyela jaka Bambu Sapanga jatenda kutulia.
Currently Selected:
Joshua 7: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
