Joshua 6
6
Aizalaeli bugukamu musi uku Yeliku
1Matanga gu kujingali musi gwa Yeliku babia bagajigi ili Aizalaeli biijingi. Nga mundu jojwawesa kujingi wala kupita kunza ja musi gwe hogu. 2Ndienu Bambu Sapanga apwagila Joshua, “Lingaliya! Nepani nagubeka musi gwa Yeliku pamu na bambu nkolongu wa musi hogu na akaalonda baki babii na makili mu maboku gaku. 3Gweapa na akomana ngondu baabi na hindu yukukomane mwaboti mwiyonguluta mala jimu kila lisoba nhenga hela kwa masoba sita. 4Wibia na akagolu saba kila jumu jutotula imbata jaki ji linyelu li likondoo likambaku, biilongulia palongi Lisanduku li Lilaganu. Mulisoba la saba mwiiyongulata musi hogu mala saba koni akagolu ajemba imbata yabu. 5Pabiipula imbata heyi kwa sauti ngolongu ngani na emwijogwana pe kekelele heyi, bandu boti biijamalia nakanopi nu lumatu lwa musi lwiabuka pai. Ndienu bandu baku bagukamula musi hogu kila mundu pandu pajujemiki.”
6Enu Joshua, mwana waka Nuni jwaakema aka agolu na kwaapwagila, “Mwilitotula Lisanduku li Lilaganu na akagolu saba atotula imbata saba yi likondoo likambaku, alongulia palongi ji lisanduku heli.” 7Joshua jwaalagalakia bandu, “Henu nzendania kulongo muguyonguluta musi, na bandu baabii na hindu yukukomane bililongulia Lisanduku li Lilaganu laka Bambu Sapanga.”
8Joshua hejwajomula kwaalagalakia bandu, akaagolu saba bala bababi ni imbata saba ya manyelu ga makondoo makambaku bajenda palongi jaka Bambu Sapanga, koni apula imbata ni Lisanduku laka Bambu Sapanga laapwata kunnyuma. 9Akomana ngondu bababi na hindu yukukomane baalongulia akaagolu bala babube bajemba imbata na akomana ngondu bangi babia munyuma ji Lisanduku heli, koni aendale kupula imbata. 10Lakini Joshua jwaalagalakia bandu, “Mwiipega keleli, wala mwiipwaga sokapi, mbaka lisoba lenampwagila mpega keleli, ndi pamwiipega keleli.” 11Enu Joshua jwaalagalakia bandu bala ayongulata musi mala jimu kila lisoba koni atotwi Lisanduku li Lilaganu laka Bambu Sapanga nu kulikelebuka kugone mu makambi ikilu.
12Joshua jwajumuka lukela ngani lisoba lelapwata nabombi akaagolu batotula Lisanduku li Lilaganu laka Bambu Sapanga. 13Akaagolu saba bala bababi ni imbata saba ya makondoo makambaku balonguliya palongi ji Lisanduku laka Bambu Sapanga koni apula imbata sanga kukotoka. Akomana ngondu bababii na hindu yukukomane baalonguliya aka agolu bababia ni imbata na bandu bangi babia apwata kunyuma bilipwata Lisanduku na agolu baka Sapanga baendalia kupula imbata yabu. 14Lisoba la pili bayonguluta musi hogu mala jimu, nukukelabuka ku makambi gabu. Bahenga hela kwa masoba sita. 15Lisoba la saba, bajumuka pulukela ngani, lakini lisoba heli buguyonguluta musi hogu mala saba kwa namuna ajelaje. Labiya lisoba heli pena lebuguyongulata musi hogu mala saba. 16Pabayonguluta mala ja saba, agolu ebabiya ajembiki imbata, Joshua jwaalagalakia bandu kupwaga, “Nzamaliya ndaba Bambu Sapanga ampeki nndema ago! 17Musi ago pamu na kila sindu sekibii momu yiikomika ndaba biibekiki palongi jaka Bambu Sapanga kuba litambiku. Lakini Lahabu mmbomba nngoni jola, ndi jotwandeka pamu na boti bajubii nabu mu nyumba jaki ndaba jwahia bandu bitu ba ahikiki kulaluki majambu mu nndema goni. 18Lakini mwiijuku sindu sokapi sebikibekiki palongi jaka Sapanga ili kukikoma ndaba ana nzukwii mwalihenga likambi loti la Ahebulania kuba litambiku lukutini nahela gibiya mang'aliku. 19Lakini madini goti ga feza na zahabu na hindu ya shaba na isomasoma ndi ya sapi, kwaka Bambu Sapanga, enu mwiibeka mwikikoku kuba mali gaka Bambu Sapanga.”
20Agolu bapula imbata na bandu pabajowania bakema kwa sauti, mimatu ja musi jatenda kuabuka. Apalapa bandu boka bugujendila musi gola na bandu boti bugukamula musi gola. 21Ndienu bakoma ku upanga kila sindu sesabii mu musi je homu yani akanalomi na akambomba na akakombu na aseja na ng'ombi na makondoo na maponda.
22Joshua jwaapwagila bandu abeli baalaluki bala babugulalukiya nndema hogu. “Nzendania mbaka nnyumba juku nselati jola, mukundeta mmbomba jola na akaalongu baki boti ngati emundapila.” 23Enu, akakombu baalaluki bala batenda kujenda, andeta Lahabu na atati baki na amabu baki na akalongu baki na bandu boti babunhyongulata, baabeka kunza ja kambi ja Aizalaeli. 24Ndienu, bugujosa mwotu musi gwoti gwa Yeliku na kila sindu sesabii kasolu pe madini ga feza na zahabu na hindu ya shaba na yiki somasoma, heyi biibeka mwikikoku sa nyumba jaka Bambu Sapanga. 25Lakini nselati Lahabu pamu na bandu boti bu nnyumba ja atati baki, Joshua jwaaleka koni abii bomi. Lahabu jatama pamu na Aizalaeli mbaka lelenu, ndaba jwahiiki bandu baalaluki bala babube Joshua jwatuma kugulaluki musi gwa Yeliku.
26Masoba gala Joshua jwaalakaliya palongi ja bandu kupwaga, “Mundu jokapi jojwiisenga kabe musi gwa Yeliku, jupata yambamba kuhuma kwaka Bambu Sapanga,
Jokapi jojibeka nsingi gwa musi gongo, mwana waki ju utumbuli jwiitendakuwa.
Jokapi jojisenga litanga la musi hogu, mwana mundu jwa mwisu jwitenda kuwa.”
27Enu, Bambu Sapanga jwabia pamu na Joshua na bandu boti bababia pambipi na Joshua batenda kummanya.
Currently Selected:
Joshua 6: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
