Joshua 4
4
Malibu komi na mabeli gukukombukela
1Bandu boti buku Izilaeli pabajomula kuloboka losi lwa Yoludani, Bambu Sapanga ampwagila Joshua, 2“Nhagula akanalomi komi na abeli kuhuma mu kila likabila la Aizalaeli, kila likabila jupita mundu jumwa. 3Gwaalagalakia ana, ‘Nzukua malibu komi na gabeli kuhuma pikilanda ja losi lwa Yoludani, kuhuma paajemiki aka agolu. Mugajukua malibu haga, mkagabeka pandu pamwakagonila lelenu.’ ”
4Ndipala Joshua jwaakema akanalomi komi na abeli bala babahagwi kati ja Aizalaeli, kila likabila mundu jumu, 5jwaapwagila, “Mwililongulia Lisanduku li Lilaganu laka Bambu Sapanga, Sapanga wino, nzenda mbaka pikilanda ja losi Yoludani, kila jumu wino jutotula lilibu pilibega laki, lilibu limu ndaba ja kila likabila la Aizalaeli. 6Malibu haga gabia sindu sukutukombuke kwitu twepani na bana binu pabandalukia masoba gagahika, ‘Boo, malibu aga gabi na mana boo kwino?’ 7Mbanganya mwaapwagila, ‘Lisanduku li Lilaganu laka Bambu Sapanga palabii bilipetesa kulosi lwa Yoludani, masi ga losi holu gatenda kujema ngaseganyikike!’ Henu malibu ganga gibiya ukombuke kwa Aizalaeli masoba ganga na mwisu.”
8Akanalomi bala bahenga ngati ejaalagalakia Joshua, bajukua malibu komi na mabeli kuhuma pikilanda ja losi lwa Yoludani, lilibu limu ndaba ji likabila la Aizilaeli, ngati Bambu Sapanga eandagalakiya Joshua, bajenda naku mbaka ku makambi gabu nukugatola pala. 9Kabee Joshua jajukua malibu gangi komi na mabeli nu kugajemeka pikilanda ja losi lwa Yoludani, pandu payajemiki yaji yaka agolu babatotwi Lisanduku li Lilaganu. Malibu haga gabi hoku mbaka lelenu.
10Akagolu bala babatotwi Lisanduku li Lilaganu, bajemiki pikilanda ja losi lwa Yoludani mbaka bandu pabajomula kuhenga kila sindu sesuse Bambu Sapanga anndagalakia Joshua jwaapwagila bandu. Joshua jwahenga goti gaandagalakia Musa na bandu balombuka nyata kwii ja losi, 11bandu boti pababia alobwiki, akagolu bala baatotwi Lisanduku li Lilaganu laka Bambu Sapanga baalonguliya bandu boti. 12Akanalomi bi likabila la Lubeni ni likabila la Gadi na nusu ji likabila laka Manase baalongulia alongu babu Aizalaeli koni abi na hindu yabu yukukomane, ngati ejaalagalakia Musa. 13Akanalomi elupu alubaini baabi na hindu yukukomane ngondu koni aliandii kukomana ngondu koni abii pamu na Bambu Sapanga bajenda ku ligomba la musi gwa Yeliku. 14Mwilisoba heli Bambu Sapanga anhenga Joshua jubiya mundu nkolongu kwa Aizalaeli boti, nabombi bunntendila isima Joshua masoba gaki goti ngati ebunhengila isima Musa.
15Ndienu, Bambu Sapanga ampwagila Joshua, 16“Gwaalagalakia agolu batotwi Lisanduku li Lilaganu, apita ndosi ja Yoludani.” 17Enu, Joshua jaalagalakia akagolu bala kupwaga, “Mpitania nndosi ja Yoludani.” 18Akagolu bala babatotwi Lisanduku li Lilaganu laka Bambu Sapanga pabapita pikilanda ja losi lwa Yoludani, nukukanyati mu nkenga gwa losi na masi gatumbuliya kunyika nu kutwele kabee ngati pakwatumbulia. 19Aizalaeli balobuka losi lwa Yoludani mu lisoba la komi la mwei gu kutumbuli, babeka kambi ku musi gwa Giligali, upandi golipita lyoba uku musi uku Yeliku. 20Joshua jwahimika malibu komi na gabeli gala ku Giligali gababia ajukwi kuhuma kulosi lwa Yoludani. 21Ndienu Joshua jwaapwagila Aizalaeli, “Bana bino ana andaluki masoba gagahika, ‘Boo, malibu aga gabi na mana boo kwino?’ 22Mwaapwagila ana, ‘Bandu buku Izilaeli balobuka losi lwa Yoludani pandu pajomu.’” 23Mwaapwagila, “Bambu Sapanga, Sapanga wino, jugajomisa masi ga losi lwa Yoludani ndaba jino mbaka mwawesa kuloboka, ngati ejajomisa nhanga uku Shamu ndaba jitu. 24Bambu Sapanga jwahenga hela ili bandu boti bunndema gwoti amanya Bambu Sapanga jubi na makili. Nanamu mu nndumbalia Bambu Sapanga, Sapanga wino masoba ganga na mwisu.”
Currently Selected:
Joshua 4: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
