Joshua 3
3
Aizalaeli aloboka losi luku Yoludani
1Lisoba lelapwata lukela ngani Joshua pamu na bandu boti buku Izalaeli batumbuliya sapwali kuhuma ku Sitimu. Pabahika kulosi luku Yoludani, babeka kambi koni alendale kuloboka kwie. 2Egapeta masoba matatu, akakilongosi bapeta pikilanda ja makambi gala, 3baapwagila bandu, “Pamwalibona Lisanduku li Lilaganu laka Bambu Sapanga, Sapanga winu, atotwi aka agolu babube kibeleku sa Alawi, mpitaninya nu kulipwata. 4Hela ndi emwajimanya indela jukupeta ndaba ngase nhwaiki kupeta hata lisoba limu. Lakini mwiihegalee ngani Lisanduku li Lilaganu, mwibiya munyuma ngati kilumita jimu helahe.”
5Joshua jwaapwagila bandu, “Mwilisapisa ili kujetakewa kunndumbali Bambu Sapanga ndaba kilabu jwiitenda ndonduke pikilanda jino.” 6Ndienu jwaapwagila akaagolu, “Nzukua Lisanduku li lilaganu, nndongulia nalu palongi ja bandu.” Nabombi batola nukulongule nalu palongi ja bandu.
7Bambu Sapanga ampwagila Joshua, “Lelenu, ndumbuli kugulangi kwa bandu kubanga wehapa ukilongosi nkolongu palongi ja bandu boti Aizalaeli ili amanya kubanga ngati enabi pamu na Musa ndi eniibiya pamu na weapa. 8Gwalagalakiya aka agolu haba baatoto Lisanduku li Lilaganu pabiika pa losi ja Yoludani ajema mmasi pulutengu ja losi.”
9Ndienu Joshua jwaapwagila Aizilaeli, “Nhegalia pambipi ili nzogwanakia malobi gaka Bambu Sapanga, Sapanga wino. 10Sakaka Bambu Sapanga jojubii mwomi jaabenga pikilanda jinu, Akanani na Ahiti na Ahivi na Apelishi na Agiligashi na Aamoli na Ayebusi. Nanamu mwiimanya sakaka Sapanga jojubii mwomi jubii pikilanda jinu, 11Lisanduku li Lilaganu laka Bambu ju nndema gwoti, palanndonguliya kuloboka losi lwa Yoludani. 12Henu, nhagula akanalomi komi na abeli kuhuma mu kila likabila ga Aizalaeli, kila likabila jupita mundu jumwa. 13Yaji yaka agolu baatoto Lisanduku li Lilaganu laka Bambu Sapanga, Bambu junndema gwoti, paijingala nkati ja masi ga losi lwa Yoludani, masi ga losi holu giikotuka kunyika. Nagaganyika kuhuma upandi gu kundonda gilundikana pamu ngati kihogo.”
14Enu bandu baboka mu makambi gabu ili kujenda kuloboka losi lwa Yoludani, nabombi aka agolu koni atotwi Lisanduku li lilaganu baalongulia bandu haba. 15Sabiya kipindi sukuhusa na losi lwabiya lutweli ngamaa. Lakini baatotwi Lisanduku li Lilaganu ebajingala pe mu losi lwa Yoludani, 16masi gaganyika kuhuma upandi gukundonda gajema na kuba ngati kihogo gatwelela mbaka kukijiji suku Adamu sesabi pambipi na musi gwa Saletani. Masi gaganyika kujenda kunhanga guku Alaba, goguwe kabee bugukema nhanga gwa mwinyu gajomaliya ngani. Ndienu bandu balobuka kujenda pambipi na musi uku Yeliku. 17Aizalaeli pababia atenda kulomboka, aka agolu bababia atotwi Lisanduku li Lilaganu bajema pandu pajomu pikilanda ja losi lwa Yoludani mbaka bandu boti pabajomula kulomboka.
Currently Selected:
Joshua 3: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
