Joshua 2
2
Joshua jwaatuma bandu bukulaluki majambu ku Yeliku
1Enu, Joshua mwana jwaka Nuni, jwaatuma bandu abeli kwa sili kuhuma ku Shitimu bajenda kulaluki majambu gunndema gola, bakalalukiya ngani kumusi uku Yeliku. Batenda kujenda, bahika mu nyumba jaka mmbomba nselati joakema Lahabu, bagonila momu.
2Bambu nkolongu juku musi uku Yeliku bumpwagila, akanalomi buku Izilaeli ajingi mumusi ikilu jalelenu ili kulaluki majambu gu nndema goni. 3Bambu nkolongu juku Yeliku jwaatuma bandu kwaka Lahabu, nukumpwagi. “Waapia kunza bandu bahikiki nnyumba jaku ndaba ahikiki kulaluki majambu gu nndema gwoti.”
4Lakini, mmbomba jola jwabia jwaahihiki bandu abeli bala. Enu, jwaapwagila bandu bajwaatumiki bala, “Sakaka bandu haba bahikiki kwane, lakini nepani ngasemanyiki ahumiki kwako. 5Kipindi sukujigi litanga la musi, palajingala lwihii, bandu haba batenda kubokane, kobajenda ngasenukumanye. Mwapwata kanyata pangi mbaka mwaakamu.” 6Lakini Lahabu jwabia jwaakwelisi kunhagaa bandu baalaluki majambu gu nndema bala nakwaahia mu makenda ga mapei gabatandiki kunhaga je kola. 7Enu, bandu bajwaatumiki bambu nkolongu bala baapwata kupete indela yeijenda ku mitandu ja Yoludani. Apalapala ebaboka mu musi, litanga la musi latenda kupungwa. 8Kabula bandu baalaluki majambu gu nndema bala ngaseagoni ikilu, Lahabu jwaajendila kunhagaa, 9jwaapwagila, “Nepani manyiki kuba Bambu Sapanga ampekii nndema gongo, na twe lutukamwi lujogopu ndaba jinu na bandu boti bunndema gongo atei kulepatuka ndaba jinu mmbanganya. 10Ndaba tujogwini Bambu Sapanga ejwagahenga masi gunhanga nkolongu gwa Shamu gajoma pamwahuma nndema guku Misili, na emwaatendi aka bambu akolongu abeli Aamoli bababi upandi golipiti lyoba uku Yoludani, jomunkema Sihoni na Ogu babube mwaakoma tipitipi. 11Etajogwana tu majambu haga, twatenda kulepetuka ndaba jinu mwanganya na twajomukania makili tipitipi. Henu sajenu manyiki Bambu Sapanga, Sapanga wino, ndi Sapanga ju kunani na pai punndema! 12Enu, mpepa nnapila nepani kwilihina laka Bambu Sapanga, kubanga musindendila gaamboni nepani na aka alongu bango, ngati enunhengi gaamboni mwanganya kabee nnangia nginyuli ana ngiti nhenga sakaka. 13Nnagila kubanga mwaahokua atati bangu na anyongo bangu, aka alombu na aka ahasa bango naka alongu boti! Mwatuleka tukuwaje.”
14Bandu bala bajibua, “Sapanga jutukoma ana ngatuhengi setupwagani! Ana nga wampwagi mundu jokapi kupete sili jitu, Bambu Sapanga ejwatupekia nndema gongo, twagutendila kwa waamboni na su kuhobaleka.”
15Enu, Lahabu jwaahulua bandu bala kulugoji kupete pilindilisa, ndaba nyumba jaki jwasengiki pambipi nu lumatu lwa musi gwa Yeliku. 16Jwaapwagila, “Nzendania mu nndema gwiitombi mukajoba ili babumpwata bankole. Mwitamania koko masoba matatu, mbaka babumpwata pabikuba akelabwiki pa musi, ndienu mwijendania.” 17Bandu bala bunnzibua, “Twiihenga ngati etulapani. 18Patwagutukaliya nndema waku goni wiihenga ana, wiikonga lugoji lukeli londone mu lindilisa legutuhulukia. Gwaaleta kwaku atati baku na akamabu baku na akalombu baku na akalongu baku boti ba atati baku. 19Lakini mundu jwokapi anajupitiki kunza ja nyumba jaku ngatuhusiki nu kuwa kwaki. Lakini ngati mundu jwokapi jojibia nkati ja nyumba jaku anaanhumisi pe, likosa lukukomwa kwaki twitotula twepani. 20Lakini anagumpwagi mundu jokapi lihengu litu ale, kulapa kotulapani kwibiya kuhogwiki.” 21Najombi jwaapwagila, “Nyetaki, kubia ngati empwagiki.”
Ndienu jwaaleka aboka, na bombi batenda kuboka. Najwombi jwakonga lugoji lukeli lola mu lindilisa.
22Bandu baalaluki majambu gu nndema bala baboka bajenda kukitombi nukulijoba. Batama kola masoba matatu mbaka babaataputa bala pabakelubuka ku musi guku Yeliku, baada jakwataputa nu kusindwa kwa bona. 23Enu bandu baalaluki majambu gu nndema abeli bala bahelala kuhuma kukitombi, balobuka losi nukunzendee Joshua mwana waka Nuni na basimulia goti gagaapatiki. 24Bumpwagila Joshua, “Sakaka Bambu Sapanga jutupeki twepani nndema goni gwoti, ndaba bandu boti bunndema gola butujogopa twepani.”
Currently Selected:
Joshua 2: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
