3 Jọn 1
1
Sịbịpị
1Irị Jọn sẹnịḅọ ma anịị mị diri ma gịẹ ọ fịrịmaḅọ.
A gịẹ pa ị́yẹ́ ibi nangwọ Gayọs, a karakárá ḅara pa ḅẹlẹma ḅọ fịrịmam.
2Ị́yẹ́ ibi nangwọ, a tẹ́ghẹ̄m ḅẹ́ nyẹ gonyẹ́ gonyẹ́ ị nana loghuloghu ị pịghị oju kụrọ ḅụ fịnị, a nimiḅara ḅụ ḅẹ́ tẹ́mẹ́ju ịḅụ kụrọm. 3Anị opuma ibieḅẹ́lẹ́mam jẹ́ mininiapụ ḅo dugho sa, ị karakárá ma ḅụ sẹ́kụrọ ḅara, ị pa pịghị sámámgba karakáráma ḅụ asọ nwángịarị ḅara. 4Mịma nẹ́ngịma bieḅẹlẹ ofori a ḅo náa sa ḅẹ́ ị́yẹ́ awọ karakáráma ḅụ asọ nwángịarị.
5Ị́yẹ́ ibi nangwọ, ịrị opuma kụ́rọsẹm ị nwángị Krais ọḅụduaapụ pịrịarị fịrị, karakárányẹ ḅẹ́ nna ḅụ jẹ́apụ igoniapụ ị fịnịngaa. 6Nnị ị́yẹ́ ḅẹlẹma dugho págháma mịnga fịnị Tamuno kubiri ogbo ma pịrịmam. Páisisi ḅárásua n pịrị sị nnị muarịnyẹ ma mú anị Tamuno ma ḅụ́ḅẹlẹḅara. 7Nnị muarịnyẹ ma muarị Krais fịrị ma gosi, ḅárásua pịrị daákịgha ḅụ mininighaapụ ma ḅarabie. 8Anịgo wamịnị mininiapụ ḅárásua mịị túminị́ ma pịrị na ibim, wamịnị nnị na fịrịnwangị karakárá ma pịrịbẹ ḅárá.
Diyotirifes Na Demetirọs
9A gbulu ábálálá gịẹ Tamuno kubiri ogbo ma fịrịmam kụ́ma Diyotirifes dọghụḅọ bẹ ọ sịbịdaa n pịrịm, biri pa ị́yẹ́ dughonyẹ náa dọghụgha. 10A ḅo sa, anịsa, a pa o biekórómabẹm ọ mịẹmáa nyẹ mamgba, ọ tọ́rụ́kịrịkị́rị́ ḅara pa wa dughosima ḅara na pịghị o dugho iruonyẹ! Anịma o furobịgha, mịnaapụ ma ḅo sa sọ ori n dakórómagha, n dakóróma dọghụapụ ori n kikim pịghị n deepágháma Tamuno kubiri ogbo ma bie.
11Ị́yẹ́ ibi nangwọḅọ, Gayọs siiamịẹnyẹ daa nyẹ mịẹma, kụ́ma ibinyẹ daa nyẹ mịẹ. Ibinyẹ mịẹarịḅọ gonyẹ́ gonyẹ́ Tamuno ju saghịḅom. Siinyẹ mịẹarịḅọ gonyẹ́ gonyẹ́ na Tamuno nimigha. 12Kị́nị́mamgba Demetirọs ibi dughoarị, karakárá ma so ọ ḅụ ibi dughoarị, wamịnị so ọ ḅụ ibi dughom, ọ pịghị nimim ḅẹ́ wámịna dugho págháma nyẹ ma karakárányẹ.
Kunema Sịbịpị
13A tọgha nyẹ nyánam a dugho ọ pịrịbẹnyẹ, kụ́ma a dugho dọghụgha ábálálá gịẹnyẹ na ábálálá gịẹ ḅuruma ḅụ. 14Ḅọlọgha sa ḅụ a ị́yẹ́ árịbẹm, anịsa wa tọ́rụ́ na tọ́rụ́ na ḅụ ẹ́gẹ́rẹ́bẹm. 15Diin ọmịnị na fịnịị.
Ọmịna nangwọapụ mamgba fịrịmam ḅẹ́ a obii. Ḅara na nangwọapụ ma gbẹ́rẹ́ḅọ gbẹ́rẹ́ḅọ bii.
Currently Selected:
3 Jọn 1: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation