1 Jọn 5

Minini Tamuno Tụwọ Ma Ḅụ

1Mininiḅọ gonyẹ́ gonyẹ́ ḅẹ́ Jizọs ori anịị n Pulo pa Sịbị Saraḅọ, anịḅọ ma anịị Tamuno Tụwọ, Daḅọ ma ḅẹlẹma ḅọ gonyẹ́ gonyẹ́ pịghị ọ Tụwọ ḅẹ́lẹ́mabẹm. 2Wa ḅọ́rọ́ Tamuno ḅẹlẹma nḅẹḅẹ́ sị ori ólóghó koko, mị ḅara ma wa nimibẹm ḅẹ́ wamịnị Tamuno ma awọ. 3Wámịna Tamuno ḅẹlẹma dughoarị ḅẹ́ wamịnị ori ólóghó ma kokoarị. Ori ólóghó pịghị opuma wámịna ḅụ ikugha, 4ḅẹ́ Tamuno tụwọ sọmáaḅọ gonyẹ́ gonyẹ́ tuminikiri ma sọḅasọḅam. Wámịna minini anị mịẹsị wamịnị ine tuminikiri ma sọḅaarị nyẹ. 5Tụọ ine tuminikiri ma Sọ́ḅa bẹ? Anịị mininiḅọ ngéré ḅẹ́ Jizọs anị Tamuno Tụwọ.

Jizọs Krais Onyésẹ̄ḅọ

6Jizọs Krais anịị ori mingi sara mingi ma na ori fịị ọmbịnyẹ́ pa ḅoḅọ. O mingi ḅụ ngéré ḅogha, kụ́ma mingi ma na ọmbịnyẹ́ ma na, Tẹ́mẹ́ ma pịghị dugho pághámaarị ḅẹẹ mịma karakárányẹ tegó Tẹ́mẹ́ ma karakáram. 7Tẹ́rẹ́apụ anị onyẹ́sẹ nyẹ: 8Tẹ́mẹ́ ma, mingi ma, na ọmbịnyẹ́ ma na, mịná tẹ́rẹ́ ma gbẹ́rẹ́ dugho págháma nyẹ nyánam. 9Wa túminị́ dugho págháma nyẹ mininim, kụ́ma Tamuno dugho págháma nyẹ ma kụrọḅam, tegó mịma anịị Tamuno dugho págháma nyẹ ọ Tụwọ gbolomanyẹ. 10Anịgo Tamuno Tụwọ ma ḅụ mininiḅọ gonyẹ́ gonyẹ́ mịị dugho págháma nyẹ ma nyánam nna tẹ́mẹ́bie, kụ́ma Tamuno mininighaapụ ọ pa epeletiḅọ sọmam, tegó na nnị mininigha Tamuno dughonyẹ ọ Tụwọ ḅụ. 11Dugho págháma nyẹ ma anịị: ḅẹ́ Tamuno gbámásó duma pa wa pịrịmam, mịị duma ma ọ Tụwọ bie anịị anị pịghị fịnịnyẹ. 12Tụwọ ma nyánáḅọ gonyẹ́ gonyẹ́ mịị duma ma nyánam; Tamuno Tụwọ ma nyánághaḅọ duma nyanagha.

Kunema Againma

13A mịị diri ma gịẹ ọ pịrịarị, ọ mịnị Tamuno Tụwọ ma ẹ́rẹ́ ḅụ mininiapụ ḅẹ́, ọ nimi bẹ ḅará ḅẹ́ ọ gbámásó duma nyánam. 14Mịị wa nyáná tẹ́mẹ́kụ́rọ wamịnị Tamuno fịnị ngaa ḅoarị sa ḅẹ́, ọ tọ́ọ kọ́rọ́ma sị wa binyẹ gonyẹ́ gonyẹ́ ọ pa wa pịrịbẹm. 15Ọ wa náa nam wamịnị ọ ḅara nyẹ bi sa gonyẹ́ gonyẹ́, wa pịghị nimiḅara ma ḅẹ́ mịma karakárányẹ, wa pịghị nimim ḅẹ́ wa binyẹ gonyẹ́ gonyẹ́ ọ pa wa pịrịpịrịm.

16Ḅọ́rọ́ kị́nị́ amịna mị́naḅọ árị, siinyẹ mịẹ, kụ́ma mị siinyẹ ma fịị dighiḅogha, anị ibim ị Tamuno tẹ́ghẹ̄ n ḅọ pịrị, ine duma pa nḅọ pịrịbẹḅọ. Mịma gbolomaapụ anịị nna sii n dighi mú fịị bie suughaapụ kụ́ma fịị dighiḅọ bẹ sii imi, a ḅẹgha ḅẹ́ ị Tamuno ma tẹ́ghẹ̄ anịma gbólómanyẹ. 17Irima nyẹ gonyẹ́ gonyẹ́ anị sii, kuma sii imi tumḅọ dighi mú fịị bie suabịgha nyẹ.

18Wa nimim ḅẹ́ Tamuno Tụwọ sọmaaḅọ gonyẹ́ gonyẹ́ sámámgba siinyẹ mịẹ mịẹbịgha, Tamuno Tụwọ ma n kokowarịarị, sii tumḅọ ma sọ ine nyẹ pa n lámábịgha. 19Wa nimim ḅẹ́ wamịnị Tamuno awọ, tuminikiri gbọrụ ma sọ sii tumḅọ ma sughubie imi. 20Wa pịghị nimim ḅẹ́ Tamuno Tụwọ ma ḅomam sị akanyaḅo pa wa pịrịmam, si wa karakárá Tamuno ma nimi, wa karakárá Tamuno ma na gbẹ́rẹ́ḅụ ḅụ imii ọ Tụwọ Jizọs Krais ma na gbẹ́rẹ́ḅụ ḅụ imi. Mịị karakárá Tamuno ma, mịị pịghị duma gbámásó. 21Ị́yẹ́ ibi awọ ọmịnị ọḅụ fóofóoma n kárá tamuno ḅụ.

Currently Selected:

1 Jọn 5: IBY

Highlight

Copy

Compare