Levitikọs 24
24
Vbene A Ya Gbe Aro Ghe Avbe Ukpa He
(Ẹksọdọs 27:20-21)
1E Nọyaẹnmwa keghi tama e Mosis. 2Ne ọ tama ivbi Izrẹl ne iran viọ ofigbọn ọliv ne a ma gua ne ọ wa maa sẹ ne ọ gha re ọghe ukpa ne ọ rre Owa Ukpon Ile. Ne a miẹn ehe na gie ukpa gha baa vbe ne ẹ i na dọyọ. 3Ẹdẹgbegbe vbe ota ọre Errọn gha ya gha ru ẹe, ọ ghi gie iran gha baa hinrin yasẹ owiẹ. Vbe odaro e Nọyaẹnmwa vbe iyeke ukpọn onurho ne ọ rre odaro Ẹkpẹti Ile ne ọ rre Ehe Nọhuansẹ Ehia. A ghi da emwamwa na yi ẹdẹdẹmwẹdẹ.
4Errọn ghi gha gbe aro ghe avbe ukpa ni rre uhunmwu erhan ọmukpa ọghe igoru na a ma gua, ọ ghi miẹn wẹ ọ wa baa ẹghẹ hia vbe odaro e Nọyaẹnmwa.
Ebrẹd Ne A ya Zẹ Ọhẹ Gie Osa
5U ghi mwa irhuarhua uwan enẹ yan ugie ne u ya ru ududu ebrẹd iweva. 6U ghi mwamwa ebrẹd nii ye uviẹn eva vbe uhunmwu eteburu ne a ya igoru ne a ma gua rhu vbe odaro e Nọyaẹnmwa, ehan vbe uviẹn ọkpọkpa. 7U ghi rhie eturari yan ọkpọkpa vbe uviẹn nii ne a ya zihana izẹọhẹ evbare gie Nọyaẹnmwa, ne ọ mudia ye ihe ebrẹd nii. 8Vbe Ẹdẹ ikẹtin hia ọre a gha ya gha rhie ebrẹd na ye odaro Nọyaẹnmwa ẹdẹdẹmwẹdẹ ne a ya gha mu eyan ọghe ivbi Izrẹl sẹ. 9Errọn kevbe ivbi uniẹn ọnrẹn ọre ọ yan ebrẹd nii, iran ghi vbe gha rri ọe vbe ehe ne ọ huanrẹn rhunmwuda, ehe ne ọ mobọ huan vbe evbare nii ne a ya zẹ ọhẹ gie Nọyaẹnmwa ne avbe ohẹn ọre ọna khin.
Irri Oya Ne Ẹ I Re Ọghe Ẹkpe
10Okpia ọkpa ne iye ẹe re ovbi Izrẹl, erha e keghi re ovbi Igipt ke ghi lele ivbi Izrẹl ladian, ẹzọ keghi sunu ne irẹn kevbe ovbi Izrẹl ọkpa vbe agọ. 11(Iye ọmwa nii keghi re Sielomit ne ovbi Dibri ne ọ ke ẹwae Dan rre) vbe uwu ẹzọ nii okpia nii ke ghi tie ihẹn ne Nọyaẹnmwa, iran keghi mu ẹẹn bu e Mosis gha khian. 12Rẹn keghi rhie ẹre ne emwa da yi, ọ na gha khẹ ẹghẹ ne Nọyaẹnmwa gha ya tama irẹn vbe ne a gha ru ẹe hẹ.
13E Nọyaẹnmwa keghi tama e Mosis wẹẹ, 14“Rhie ọmwa nii hin uwu agọ rre. Emwa ni họẹn vbe ọ tie ihẹn hia ghi viọ obọ yan ẹre uhunmwu ne iran ya sẹ osẹe wẹ ọ rrie abe, iyeke ọnii, emwa hia ghi koko filo okuta gbe ẹe rua. 15Iyeke ọnii, u ghi tama ivbi Izrẹl wẹẹ ọmwa ne ọ rhirhi tie ihẹn ne Osa, uhunmwu ọ ra ya yọ, 16a ghi gbe ẹe rua. Ovbi Izrẹl ra orhunmwuyẹn ne ọ tie ihẹn ne Osa, te emwa hia gha filo okuta gbe ẹe rua.
17“Ọmwa ne ọ de izigha, a ghi gbe ẹe rua. 18Ọmwa ne ọ vbe gbe emwirri ọmwa ọvbehe, ọ ghi mu ọvbehe ye ọre. Vbene a ru ẹe ọrọre wẹ uhunmwu a ya ha osa uhunmwu.
19“Ọmwaikọmwa gha kuan ọmwa ọvbehe egbe vbene ọ rhirhi ru ẹe hẹ, a ghi vbe ru irẹn re. 20Rẹn gha bun ẹre ugboloko, a ghi vbe bun ọghọe ọkpa, ọ gha wọlọ ẹre aro fua, a ghi vbe wọlọ irẹn aro ọkpa fua, ọ gha kpan akọn ọkpa fua, a ghi vbe kpan irẹn ọkpa fua. Emwi. ikuan egbe ne ọmwa ru ọmwa ọvbehe re, a ghi vbe ru irẹn ẹre ha osa. 21Ọmwa ne ọ gbe aranmwẹ rua, ọ ghi mu ye ihe ẹre, sokpan ọmwa ne ọ gbe ọmwa ran, a ghi vbe gbe ẹe rua. 22Te uhi na dekan uwa hia, ivbi Izrẹl, kevbe avbe orhunmwuyẹn ni rre ehe ne uwa ye rhunmwuda, mẹ ọ re Nọyaẹnmwa Osanobua ruẹ.”
23E Mosis ghi gu ivbi Izrẹl guan nẹ, iran keghi rhie ọmwa nii hin ore agọ rre, iran keghi filo okuta gbe ẹe rua vbe odẹ vbenian, ivbi Izrẹl keghi ru vbene Nọyaẹnmwa tama e Mosis.
Currently Selected:
Levitikọs 24: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
