Levitikọs 21
21
Uhuanmwẹ Avbe Ohẹn
1E Nọyaẹnmwa keghi tama e Mosis ne ọ tama avbe ohẹn Errọn wẹẹ, “Ne ohẹn rhọkpa ghẹ ya viọ awua gie egbe ẹre vbe ne ọ gha na gha gu emwa mwẹ obọ vbe irorinmwi vbe ọtiọnrẹn a wu. 2Sokpan a ma wẹ iye ẹe nọ, ra erha ẹe, ra ovbi ẹre ne okpia ra ne okhuo, ra ọtiọnrẹn ne okpia. 3Ra ọtiọnrẹn ne okhuo ne ọ ma he rọnmwẹ ọdọ ne ọ guẹe rre owa. 4Ọ ghẹ ya mu awua vbe egbe avbe orruan rẹn vbe ekpa orọnmwẹ ọnrẹn.
5“Ohẹn rhọkpa ghẹ khiokhio ehe rhọkpa vbe eto ne uhunmwu ẹnrẹn ra ne ọ gia ẹtu ẹre, ra ne ọ ya emwi vinnọ egbe ẹre ne ọ ya rhie maa ighẹ te irẹn khiẹ. 6Ọ kere ne ọ gha re ne ọ huanrẹn ne ọ ghẹ fa eni mwẹ uan. Ọ ya evbare zẹ ọhẹ mẹ rhunmwuda ọnii, ọ kere ne ọ huan. 7Ohẹn ghẹ rhie okhuo ne ọ ka re ebabotu rọnmwẹ ra okhuo ne ọ rẹn okpia nẹ ra okhuo ne ọ kpao sẹ ọdọ ẹre rae, ọmwa ne ọ huanrẹn rẹn khin. 8Ọ kere ne emwa hia rẹn ohẹn ye ọmwa ne ọ huanrẹn rhunmwuda rẹn ọ ya evbare zẹ ọhẹ mẹ. Mẹ ọ re Nọyaẹnmwa ọmwa ne ọ huanrẹn mẹ khin, mẹ ọ re ọ vbe ya emwa mwẹ khian ne ọ huanrẹn. 9Ovbi ohẹn gha khian ebabotu, te ọ fa erha ẹe rua, a ghi ya erhẹn giẹn ọnrẹn uan ne ọ wu.
10“Ogie Ohẹn, a nọnọ ori ye ọre uhunmwu nẹ, a na vbe ya ẹe fi ohan, ne ọ gha yọ ẹwu ohẹn, wẹ ne ọ ghẹ sẹ eto ẹre rae vbe ne a i na salọ ẹe ra ne ọ sọ ukpọn rẹn uan ne ọ ya rhie maa ighẹ te irẹn khiẹ. 11-12A ya ẹe fi ohan mẹ nẹ, wẹ ne ọ ghẹ ghi mu awua ye egbe ẹre, ra ne ọ mu awua gha die uwu Owa Ukpọn mwẹ ne ọ huanrẹn vbene ọ gha na la owa ne orinmwi ye, ọ re ọghe erha ẹe nọ ra iye ẹe nọ. 13Okhuo nọ ma he rẹn okpia ọre ọ gha rhie rọnmwẹ. 14Ẹ i re ẹgbẹe, okhuo ne a khu nẹ ra ne ọ ka re ebabotu. Okhuo ne ọ ma he rẹn okpia vbe uwu avbe emwa ẹvbo ẹre ọ re ọ gha rhie rọnmwẹ. 15Deghẹ ẹ i re rriọ, a ghi do miẹn wẹ ivbi ẹre ne ọ te kei ne ọ gha re nihuanrẹn ghi do gha re ne awua gue. Mẹ ọrọre Nọyaẹnmwa, mẹ vbe hannọ ọẹn ye otọ nẹ zẹ vbe Ogiohẹn.”
16E Nọyaẹnmwa keghi tama e Mosis 17ne ọ tama Errọn wẹẹ, “A ghẹ gie ne egbe ma gba na vbe uwu ivbi uẹ zẹ ọhẹ evbare gun mwẹ. A ghi da uhi na yi rhinrin ẹdẹdẹmwẹdẹ.
18“A ghẹ gie ọmwaikọmwa ne egbe ma gba na zọ ese na, a ghẹ gie arhuaro, arọe, ne ọ kunse ra ne ọ mwẹ okan. 19Ra ne obọ ra owẹ ọre rọrọe. 20Ne ọ suke ra ni re akpo ra ne ọ khuọnmwi emianmwẹ aro ra ikpakpa egbe ra deghẹ ẹ i tie okhuo. 21A ghẹ gie ivbi uniẹn Errọn ne ohẹn ne egbe ma gba na zẹ ọhẹ evbare mẹ. 22Ọmwa vberriọ sẹtin rri evbare ne a ya zẹ ọhẹ mẹ kevbe evbare izẹọhẹ ne ọ huanrẹn kevbe izẹọhẹ evbare ne ọ huanrẹn ẹsẹse. 23Sokpan a ghẹ gie ẹe sikẹ ukpọn onurho nọhuanrẹn ni rre ne ọ sikẹ aka, rhunmwuda mẹ ọ re Nọyaẹnmwa, mẹ ọ re ọ vbe ya iran khian nihuanrẹn.”
24Ena ọre ẹmwẹ ne Mosis tama Errọn, ivbi Errọn kevbe ivbi Izrẹl hia.
Currently Selected:
Levitikọs 21: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
