Levitikọs 20
20
Ikhi Ne A Rria Ye Iyin Ehọ
1E Nọyan keghi tama e Mosis, 2ne ọ tama ivbi Izrẹl wẹẹ, “Ọmwaikọmwa vbe uwu uwa ra vbe avbe orhunmwuyẹn ni rre uwu uwa ne ọ rhirhi rhie vbe ivbi ẹre ne a ya ru ẹbọ Milkọm, emwa hia ghi filo okuta gbe ẹe rua. 3Rhunmwuda ọ rhie vbe avbe ivbi ẹre ne Milkọm, ọ keghi mu awua ye Owa Ukpọn mwẹ ne ọ huanrẹn, ọ kevbe fa emwi mwẹ ne ọ huanrẹn uan. I gha mu aro da ẹre, I i ghi ra vbe ka ẹe ba avbe emwa mwẹ. 4Sokpan a deghẹ emwa nii ma ka emwi ne ọmwa nii ru yọ, i ghẹ iran ma gbe ẹe rua, 5mẹ gha tobọmwẹ mu aro da ọmwa nii ke ẹe kevbe ẹgbẹe ọre hia kevbe iran ni yegbe ba ẹre vbe uyinmwẹ a i gie a mu ẹtin yan ne ọ yin ghe mwẹ ne ọ na ya gha gho Milkọm. Mẹ i ghi ra vbe ka iran ba emwa mwẹ.
6“De ghẹ ọmwaikọmwa yo ọghe iran ni gu avbe eniwu nẹ guan, I gha mu aro da ẹre, mẹ i ghi ra vbe ka ẹe ba emwa mwẹ. 7Wa da egbe uwa yi vbe ne ọ huanrẹn rhunmwuda mẹ ọ re Nọyaẹnmwa Osanobua rua. 8Wa gha ya uhi mwẹ ru emwi rhunmwuda mẹ ọ re Nọyaẹnmwa mẹ ọ re ọ vbe ya uwa khian ne ọ huanrẹn.”
9E Nọyaẹnmwa keghi mu avbe emwamwa na ye otọ: “Ọmwaikọmwa ne ọ tie ihẹn ne erha ẹe ra iye ẹe, a ghi gbe ẹe rua, obọ ẹre ọre emwi ne ọ gbe ẹe ke rre. 10Omwa gha gu amwẹ ovbi Izrẹl ru oghẹ, a ghi gbele irẹn vbe okhuo nii uan. 11Ọmwa ne ọ gu amwẹ erha ẹe ru emwi ọdọ vbe amwẹ, te ọ yagha erha ẹe, a ghi gbele irẹn vbe okhuo nii uan. Obọ iran ọre emwi ne ọ gbele iran ke rre. 12Ọmwa gha gu ovbi amwẹ ọnrẹn ru emwi oghẹ, a ghi gbele iran eveva a. Iran do ẹki ovbukhọ. Obọ iran ọ re emwi ne ọ gbele iran ke rre.
13“A deghẹ okpia gu okpia ru emwi oghẹ, a i ghẹru iran ru, a ghi gbele iran eveva ua, obọ iran ọ re emwi ne ọ gbele iran ke rre. 14A deghẹ ọmwa rhie okhuo kevbe iye ẹe rọnmwẹ, a ghi giẹn iran eheha vbe erhẹn rhunmwuda emwi efaa ne iran ru, a ghẹ gie a miẹn egbe emwi vberriọ vbe uwu ẹbu uwa. 15Deghẹ okpia gu aranmwẹ oha ru emwi ọdọ vbe amwẹ, a ghi gbe ẹe rua ke ẹe kevbe aranmwẹ oha nii. 16Deghẹ okhuo te gha hia ne ọ gu aranmwẹ oha ru emwi, a ghi gbe ẹe rua ke ẹe kevbe aranmwẹ oha nii. Obọ iran ọ re uwu ne ọ gbele iran ke rre. 17A deghẹ okpia rhie ovbiye ẹe ne okhuo ra ovbi erha ẹe ne okhuo rọnmwẹ, a ghi fa iran an ne agbọn vbe ẹrinmwi miẹn, a ghi khulo iran hin ẹbu emwa rre. Ọ gu ọtiọnrẹn nokhuo ru emwi, te ọ kere ne ọ rri oya ne ọ khẹ ke ẹe. 18A deghẹ okpia gu okhuo ru emwi vbe ẹghẹ ne ọ na mu obọ mwẹ, a ghi khulo iran eva hin uwu ẹbu emwa rre rhunmwuda, iran rra uhi ne a gbẹn ye emwi ne awua ye.
19“A deghẹ okpia gu ovbiye erha ẹe ru emwi, iran eveva ghi gba rri oya ye uyimwẹ ovbukhọ iran. 20A deghẹ okpia gu amwẹ ovbi erha erha ẹe ru emwi, te ọ yagha ovbi erha erha ẹe nii, rẹn kevbe okhuo nii ghi gba rri oya yọ, ne ọ gha miẹn ọmọ biẹ i rre uwu iran eveva. 21A deghẹ okpia rhie amwẹ ọtiọnrẹn rọnmwẹ, iran i miẹn ọmọ biẹ, awua ọre ọmwa nii ru, te ọ vbe yagha ọtiọnrẹn.”
22E Nọyaẹnmwa keghi kha wẹẹ, “Rhie uhi mwẹ mwẹ, ke iyi mwẹ, ne otọe Kenan ne I viọ uwa rrie ghẹ zẹ uwa owẹ. 23Wa ghẹ rhie uyinmwẹ emwa nigẹbọ ne I mẹ ra khulo kua ne uwa miẹn ehe na la otọ iran. Te egbe emwi dan ne iran ru wa wọ mwẹ. 24Sokpan mẹ ve uwa otọ esiesi ne ọ maa emwi okọ na nẹ, ne ọ gha re ọghe uwa, I gha rhie ẹre ne uwa. Mẹ ọ re Nọyaẹnmwa Osanobua uwa. Te I hannọ uwa ladian hin uwu avbe ẹvbo nekpa rre. 25Rhunmwuda ọnii nian, wa ghi rẹn alughaẹn ne ọ rre ẹkpo aranmwẹ kevbe ahianmwẹ ne ẹ i mwẹ awua kevbe ni mwẹ awua. Wa ghẹ rri avbe aranmwẹ ra ahianmwẹ awua. Mẹ ta ẹe wẹ awua rre iran, de ghẹ wẹ ghi rri ọe, iran ghi mu awua nuẹn. 26Wa gha re emwa ni huanrẹn ni re ọghomwẹ ọkpa rhunmwuda, mẹ ne Osanobua ne ọ re Nọyaẹnmwa, te ime huanrẹn. Te I hannọ uwa hin uwu ẹvbo nekpa rre ne uwa do wa gha re ọghomwẹ.
27“Okpia ra okhuo ne ọ rhirhi ya gualọ otọ emwi vbe obọ orhiọn ọmwa ne ọ wu nẹ, a ghi filo okuta gbe ẹe rua. Ọmwa ne ọ rhirhi ru emwi vbenian, obọ ẹre ọre uwu ne ọ gbe ẹe ke rre.”
Currently Selected:
Levitikọs 20: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
