2 पतरस 2

कूड़ी शिक्षा सिखावणे आले गुरु

1जिंवे करती वां लौका मां कूड़े भविष्यवक्‍ता हुते यूं करती तम्चे मां वी कूड़े गुरु हुवे, जको नाश करने आले पखण्ड ची लुकती लुकती शुरुआत करे ते ओ स्वामी जेह्णे वानु मोल गेहले ओचा इन्कार करे ते आपणे आप नु जल्दी विनाश मां नाखे। 2ब़ोहत सारे वांचे आलीकर लोचपण करे जाई वजह कनु सच्‍चाई चे मार्ग़ ची निन्दा करली जई। 3वे लोभ ची वजह कनु बाता घड़ती कर तम्हानु आपणे फायदे चा जरिया बणावे, ते जको ङण्ड ची आज्ञा वांचे उपर हुती चुकली ओचे आणे मां देर कोनी वांचा विनाश कङी ऊंघी ना।

4कांकि नरीकारा ने वां स्वर्ग़दूता नु जेह्णे पाप करला नी छोड़ले, पर वानु पताल मां भेज़ती कर अन्धे कुण्डा मां नाखती ङिले कि न्यां चे ङिओ तक वे बन्द रिहो।

5ते नरीकारा ने पुराणे युगा चे संसारा नु वी कोनी छोड़ले बल्कि भग़तीहीन संसारा उपर महा जल प्रलय भेज़ला, पर धार्मिकता चे प्रचारक नूह समेत आठ जणा नु बचाती गेले।

6ते नरीकारा ने सदोम ते अमोरा चे शहरा नु इसड़ा ङण्ड ङिला, कि वानु भसम करती माटी मां मिलाती ङिले कि वे आणे आले अधर्मी लौका वास्ते हेक मिसाल बणो। 7पर ओणे धर्मी लूत नु जको अधर्मीया चे अशुद्ध चाल-चलन कनु ब़ोहत ङुखी हुता छुटकारा ङिला। 8कांकि ओ धर्मी लूत वांचे आधे मां रेहता हुला ते वांचे अधर्म चे कामा नु ङेखती ङेखती कर ते सुणती-सुणती कर हर हेक ङिओ आपणे सच्‍चे दिला नु ङुखी करता।

9यूं करती प्रभु भग़ता नु परीक्षा महु काढ़ती गेहणे ते अधर्मीया नु न्यां चे ङिओ तक ङण्ड ची हालती मां राखणे जाणे। 10नरीकार खास करती वानु ङण्ड ङिये जको अशुद्ध अभिलाषा चे भांसु शरीर चे अनुसार चली ते प्रभु ची सामर्थ नु तोच्छ जाणी। वे ढीठ छी, ते हठी छी, ते ऊंचे ओहदे आला नु बुरे-भले केहणे कनु ना ङरी। 11तां वी स्वर्ग़दूत जको ताकत ते सामर्थ मां वाकनु बङे छी, प्रभु चे सामणे वानु बुरे-भले केहती कर दोष ना लावी।

12पर ईं लौक बेवकूफ ढौरा आलीकर छी जको ब़झणे वास्ते ते रुसणे वास्ते पैदा हुले ते जिसीया बाता नु जाणी ही ना, वांचे बारे मां ङुजा नु बुरे-भले किही, वे आपणी सड़ाहट मां आप ही सड़ती जाये। 13ङुजा चे बुरे करने चे बदले वांचे ही बुरे हुवी। वानु ङिओ ङुपाहर भोग़ विलास करने भले लाग़े। ईं कलंक ते दोष छै जिसे बेले वे तम्चे लारे खई-पी तां आपणे तरफु प्रेम भोज़ करती भोग़ विलास करी। 14वांचीया आंखीया मां व्यभिचार बसला आला छै ते पाप करले बगैर आलीकर ना सग़ी वे चंचल मना आला नु बकाती गिही वांचे मना नु लोभ करने ची आदत हुली भिली वे श्राप ची ऊलाद्ध छी।

15वे सिधे मार्ग़ा कनु भटकती गेले ते बोर चे पूत बिलामा चे मार्ग़ा उपर टुरती पले ओनु हराम ची कमाई लारे प्रेम हुता। 16पर ओचे अपराध चे बारे मां उलाहणा ङिला गेला इठे तक कि गूंगी गाहड़ो ने बन्दा ची ब़ोली लारे ओ भविष्यवक्‍ता नु ओचे बावलेपन कनु रोकले।

17ये बन्दी धोक्‍केबाज अन्धे खुऊ ते अन्धारी चे उङारले आले बदल आलीकर छी, वांचे वास्ते घौर अन्धकार ठहराले गेले। 18वे बेकार घमण्ड चा बाता करती करती लोचपण चे कामा लारे, वां लौका नु शरीरिक इच्छा लारे फसाती गिही, जको भटकले आला महु हमा निकली ही पले। 19वे वानु आजाद करने चा वायदा तां करी पर आप ही सड़ाहट चे गुलाम छी, कांकि जको बन्दे जाकनु हारती गेले, ऊं ओचे गुलाम बणती जाये।

20जब वे प्रभु ते उद्धारकर्ता ईशु मसीह ची पिछाण चे जरिये संसारा ची कई तरह ची अशोद्धता कनु बचती निकलो, ते बल्ति वांचे मां फसती कर हारती गेले, तां वांची दशा पेहली कनु वी बुरी हुती गेली छै। 21कांकि धर्म चे मार्ग़ ना जाणने ही वांचे वास्ते ऐचे कनु भले हुवीया कि ओनु जाणती कर वे पवित्र आज्ञा कनु फिरती जईया जको वानु ङिली गेलती, ओनु जाणती कर मुँह फेरती गिही। 22वांचे लारे तां यूंही घटले जिंवे कि वा सच्‍चीया कहाणीया मां केहले गेले, “कुत्ता जिठे उल्टी करे ओ आपणी उल्टी सनु पुठा चाह्‍ला जाये।” ते, “हेक झूलाली आली सुअरी वी चिकड़ा मां लेट मारणे चे वास्ते बल्ति पुठी चाह्‍ली जाये।”

Currently Selected:

2 पतरस 2: ODR

Highlight

Copy

Compare