2 पतरस 1
1
नमस्कार
1शमौन पतरस चे तरफु जको ईशु मसीह चा दास छै ते प्रेरित छै, हा चिठ्ठी वां लौका चे नांवे जेह्णे अम्चे नरीकार ते उद्धारकर्ता ईशु मसीह ची धार्मिकता चे जरिये अम्चे आलीकर ब़ोहत कीमती विश्वास गेहला।
2नरीकारा ची ओर ते अम्चे प्रभु ईशु ची पिछाण चे जरिये अनुग्रह ते शान्ति तम्चे मां घणी सारी बधती जाओ।
नरीकारा ने अम्हानु सब कोच्छ ङिले
3आपणे जीवन चे वास्ते ते नरीकारा ची सेवा चे वास्ते जको कोच्छ अम्हानु चाही छै, आपणी ईश्वरीय सामर्थ चे जरिये ओणे अम्हानु सब कोच्छ ङिले। कांकि अम्ही ओनु जाणु, जेह्णे आपणी धार्मिकता ते महिमा ची वजह अम्हानु हकारले। 4जाये जरिये ओणे अम्हानु बेशकीमती ते ब़ोहत ही बङे वायदे ङिले कि यांचे जरिये तम्ही वे सड़ाहट कनु छुटती कर जको संसारा मां बुरी अभिलाषा कनु हुवे ईश्वरीय सुभाव चे भईवाल हुती जावा।
5ऐवास्ते तम्ही पुरी लगन लारे यतन करते रिहा कि तम्चा विश्वासा नु बधा सग़ा, विश्वासा उपर सदगुण, सदगुणा उपर समझ, 6ते समझ उपर संयम ते संयम उपर धीरज ते धीरज उपर भग़ती। 7ते भग़ती उपर भाईचारा, ते भाईचारे चे प्रेम मां बधते जावा। 8कांकि अगर ये बाता तम्चे मां मोजुद रिहे ते बधतीया जाये तां, तम्हानु अम्चे प्रभु ईशु मसीह ची पिछाण मां कामयाब ते फलवन्त हुते जावा। 9कांकि जाये मां ये बाता कोनी, ओ अन्धा छै, ते धुंधले ङेखे, ओ आपणे भांसले पापा कनु धुपती कर शोद्ध हुवणे भूलती गेला।
10ऐ वजह कनु हे माये भऊ, ईशु चे हकारले आले, ते चुणले आले ते पक्के करले आले तां तम्ही कोशिस करते रिहा, कांकि इसड़े करने लारे तम्ही कङी वी ठोकर नी खावा। 11बल्कि यूं करती तम्ही अम्चे प्रभु ते उद्धारकर्ता ईशु मसीह चे अनन्त राज़ मां बङे कद्दरा लारे स्वागत करला जई।
पतरस चा आखरी समय
12ऐवास्ते तम्ही ये बाता जाणा, ते जको सच्चा वचन तम्हानु मिड़ला आला छै, ओचे मां बणले रिहा, तां वी मैं तम्हानु यां बाता चा चैता ङिवाणे वास्ते सदा तियार रिही। 13मैं ईं आपणे वास्ते ठीक समझे, कि जब-तक मैं ऐ शरीरा चे डेरे मां छै, तब तक तम्हानु चैता ङिवाती कर उभारता रिही। 14कांकि ईं जाणे, कि माये डेरे चे ढाणे चा समय जल्दी आणे आला छै जिंवे कि अम्चे प्रभु ईशु मसीह ने माये उपर उजागर करला। 15ऐवास्ते मैं ओ हर-हेक इसड़ा जत्तन करी, कि माये मरती जाणे चे बाद तम्ही यां सारीया बाता नु सदा चैते कर सग़ा।
अम्ही मसीह ची महिमा चे दर्शन करले
16कांकि जिसे बेले अम्ही तम्हानु आपणे प्रभु ईशु मसीह ची ताकत चा, ते आवणे चा समाचार ङिला हुता तां वे चतराई लारे घड़लीया आलीया कहाणीया चा सहारा कोनी गेला हुता। बल्कि अम्ही तां आप ही खौद्द ओची महानता चे ग़वाह छिऊं। 17#मत्ती 17:1–5; मरकु 9:2–7; लूक 9:28–35कांकि जब ओणे नरीकार ब़ा कनु कद्दर, ते महिमा गेहली ते वे प्रतापमय महिमा महु हा अवाज आली, “हा माया प्यारा पूत छै, जाये कनु मैं खौश छै।” 18जिसे बेले अम्ही ओचे लारे पवित्र पहाड़ा उपर हुते ते स्वर्ग़ा महु हा वाणी आते सुणली।
19ते अम्चे कनु जको भविष्यवक्ता चा वचन छै, ओ ये घटना लारे पक्का साबित हुला, तम्ही ईं आच्छे करा कि ईं समझती कर ध्यान ङिया। ओ हेक ङीवा छै, जको वे अन्धारे जग़हा मां सोज़ले ङिता रिहे, जब तक पुरा ना फटे बल्ति तक सवेले चा तारा तम्चे दिला मां ना चमकती खड़ा हो। 20पर सबकनु बङी बात हा छै कि तम्ही जाणती गिहा कि पवित्रशास्त्र ची कुई वी भविष्यवाणी बन्दे चे आपणे विचारा लारे ना हुवी। 21कांकि कुई वी भविष्यवाणी बन्दे ची मर्जी लारे कङी वी कोनी हुली। पर भग़त जन पवित्र आत्मा चे जरिये उभारले जाणे तक नरीकारा ची ओर कनु ब़ोलते।
Currently Selected:
2 पतरस 1: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
