1 पतरस 3

मोणस ते घराआली

1-2 # इफि 5:22; कुलु 3:18 हे घराआलीया तम्ही वी आपणे मुणसा चे वशा मां रिहा। ऐवास्ते कि अगर यांचे महु कुई इसड़े हो जको वचन नु ना मनते हो, तांवी तम्चे भय लारे पवित्र चाल-चलन नु ङेखती कर बिना वचन चे आपणी-आपणी घराआली चे चाल-चलन चे जरिये छिकिती जाओ। 3#1 तीमु 2:9ते तम्चा सिंगार ङिखावटी ना हो, यानिकि माल गूंथणे, ते सोने ची ग़ाहणी, जा तरह तरह ची ओढ़णी घालणी। 4बल्कि तम्चा सिंगार तां तम्चे मना चा भीतरी व्यक्‍तित्व हुवणा चाही छै जको मुलायम ते शान्त चे अविनाशी सुन्दरता लारे मिड़ला आला हो। नरीकारा ची नजरी मां जको ब़ोहत ही कीमती हो।

5कांकि बीतले आले युगा चा वे पवित्र असतरीया आपणे आप नु सजाणे संवारने चा हाओ ही ढंग हुता, जाया उम्मीदा नरीकारा उपर टिकलीया आलीया हुतीया। वे आपणे आपणे मुणसा चे वशा मां रेहतीया। 6उदाहरण चे वास्ते, जिंवे सारा अब्राहम ची आज्ञा मां रेहती ते ओनु आपणा मालिक मनती। ऐवास्ते तम्ही वी अगर भलाई करा, ते कुई वी तरह चे ङर कनु ङरती कर ना रिहा तां विचीया धूवा बणा।

7 # इफि 5:25; कुलु 3:19 यूंही हे घराआले, तम्ही वी समझदारी लारे घराआलीया लारे जीवन बितावा। ते असतरीया नु निर्बल चीज जाणती कर वांचा कद्दर करा, हा समझती कर कि अम्ही ङोनी जीवन चे वरदान चे वारिस छिऊं, जाये कनु तम्चीया प्राथना रुकती ना जाओ।

सच्‍चे कामा वास्ते ङोख भोग़णे

8ऐचा मतलब हा छै कि तम्ही सारे चे सारे हेक मन हुती कर, दयालु, ते भाईचारे ची प्रीति राखणे आले, ते दयावन्त ते नर्म बणा। 9तम्ही बुराई चे बदले मां बुराई ना करा। ते ना गालीया चे बदले गालीया काढ़ा, पर ऐचे बदले आशीष ही ङिया। कांकि तम्ही आशीष चे वारिस हुवणे चे वास्ते हकारले गेले। 10कांकि शास्त्र मां लिखले पले,

“जको कुई जीवन ची इच्छा राखे,

ते आच्छी ङिहें ङेखणे चाहवे,

ऊं आपणी जुबानी नु गन्दिया बाता करने कनु रोकली रिहो।

ते आपणे होठा नु छल चा बाता कनु रोकली रिहो।

11ऊं बुराई चा साथ छोड़ती ङियो, ते भलाई चा ही बाता करो।

ऊं मेल-मिलाप नु सोधो, ते ओचा जत्तन करना चाही छै।

12कांकि प्रभु चीया आंखीया धर्मीया उपर हमेशा लाग़लीया रिही,

ते ओचे कान ओची बिनती चे तरफ लाग़ले रिही। पर प्रभु बुराई करने आला चे विरोध मां रिहे।”

13ते तम्ही अगर भलाई करने मां लाग़ले रिहा तां तम्ची बुराई करने आला बल्ति कूण छै? 14#मत्ती 5:10ते अगर तम्ही भले कामा चे वजह कनु ङोख भोग़ा, ते तम्ही धन्य छिवा। पर वांचे ङराणे कनु ना ङरा ते ना ही घब़रावा। 15पर मसीह नु प्रभु जाणती कर आपणे आपणे मना मां पवित्र समझा, ते जको कुई तम्हा कनु तम्ची आस चे बारे मां कहीं पूछे ते ओनु उत्तर ङेणे चे वास्ते हमेशा तियार रिहा, पर नरमाई ते ङर चे लारे। 16ते आपणे विवेक नु वी शोद्ध राखा, ऐवास्ते कि जिसीया बाता चे बारे मां वे जको मसीह मां तम्चे आच्छे चाल-चलन चा अपमान करी, शर्मसार हो।

17कांकि अगर नरीकारा ची हाओ इच्छा हो, कि तम्ही भलाई करने वास्ते ङोख भोग़ा, तां हा बुराई करने ची बजाय कनु ङोख भोग़णे आच्छे छै।

18कांकि मसीह ने वी अम्चे पापा

चे वास्ते ङोख भोग़ले।

यानिकि ओ बेकसूर हुता।

अम्चे पापा चे वास्ते हेक वारी मरती गेला कि अम्हानु नरीकारा चे गोढु गेहती जाओ।

शरीरा चे जरिये तां ओ मारला गेला,

पर आत्मा चे जरिये जिवाला गेला।

19ओ आत्मा ची स्थिति मां पताल जती कर वा आत्मा नु जको कैद हुतीया वानु मुक्‍ति चा सुसमाचार सुणाला। 20जेह्णे ओ गुजरले समय मां आज्ञा कोनी मनली, जिसे बेले नरीकार नूह चे ङिहां मां सब्र राखती रुकला रेहला, ते ओ जहाज बणे पलता, जाये मां ब़ेसती कर थोड़े लौक यानि सेर्फ आठ जींये पाणीया कनु बचती गेली।

21ते ओही पाणीया ची मिसाल वी यानिकि बपतिस्मा, ईशु मसीह चे जीते हुवणे चे जरिये, हमा तम्हानु बचावे, ओचे कनु शरीरा चे मैल नु दूर करने चा मतलब कोनी छै, पर शोद्ध विवेक लारे नरीकारा चे हाथा मां हुती जाणे चा मतलब छै। 22ओ स्वर्ग़ा मां जती कर नरीकारा चे सज़्ज़े पासु जती कर ब़ेसती रेहला, ते स्वर्ग़दूत ते अधिकारी ते सामर्थी ओचे अधीन मां करती ङिले गेले।

Currently Selected:

1 पतरस 3: ODR

Highlight

Copy

Compare