1 Hakorinte 15
15
Muvumbukero waKristusi
1Mwayendhange, ame kuvurukitha na kumuvurukitha mbudhi dhodhiwa, edhi na mu yuvithire no dhi mwa tamburire no mu mwa tanarera. 2Pambudhi dhodhiwa po mwa wanena karo maghamweno ngeshi ku muna tanarera kumbudhi thika di na dhi yuvithire kukwenu. Ngeshi mwa kakatera kuyimweya, nyara‐nyara mwa tawire.
3Thinu thothikuru thi na mu tongwerire no thi na wanine me karo ne thino: Kristusi gha fererire maharwero ghetu, thika di ha yitjanga. 4Aye ha mu vumbekire no mudiyuwa dyoghuhatu, gha vumbukire thika di ha yitjanga. 5Popo gha hokokire kwaKefasi, munyima kwawadikumi nohawadi. 6No munyima gha hokokire karo kwawayendhetu kupiterera mathere kwoko, hamweya hopapawo ne hafa. Ene thingi thawo shime hayumi. 7Munyima gha hokokire kwaJakobusi no munyima kwawapostoli waheya.
8Paghuhura gha ni hokokerire name karo. Ame ha shamurukire mughunhwere. 9Ame, nomumbiru wawapostoli, no mbadi na fumana eshi, ha ni toye eshi nomupostoli. Yoyishi, na kutha‐kuthire mbunga dhaNyambi. 10Ene pan̂eke dhaNyambi, na kara thika di nidi non̂eke dhendi dhokukwange, mbadi dha karire nyara‐nyara. Ene, na rughanine thikuma kupiterera wahe. Karo ne kadi yame, ene n̂eke dhaNyambi dhi dha kara nange. 11Keho pano ne yame ndi, endi wodiwo — eyi ne yo twa yuvithire no yi mwa tawire.
Muvumbukero wawafu
12Ngeshi ha tu yuvitha eshi Kristusi ne gha vumbukire mwawafu. Ngepi di ha kona kughayara hamweya hopapenu eshi, mbadiko muvumbukero wawafu? 13Ngeshi mbadiko muvumbukero wawafu, ngo kuninga, eshi, naye Kristusi mbadi gha vumbukire. 14No ngo ngeshi Jesusi ne mbadi gha vumbikire, yiyaghura yetu ne gno ya nyara‐nyara, matawero ghenu nagho ngo gha nyara‐nyara. 15Karo ngo yi kare eshi, atwe ne mbango twa nongonona kwaNyambi. Yoyi twa nongwenena Nyambi eshi, gha tumunine Kristusi. 16Ngeshi ngo yaghushemwa eshi, hafu ne mbadi mba wa tumuna, naKristusi naye mbadi gha tumukire. 17Ngeshi mbadi tumuna hafu, naKristusi naye mbadimba gha tumukire. 18Karo no ngo wahe wa ha fire mwaKristusi, ngo ha yongara. 19Ngeshi ngo tu kurupere mumoyo ghuno mwaKristusi, ngo n̂anyi tu nyande thikuma kupiterera waheya.
20Ene pano, Kristusi ne ghapwa kutumuna mwawafu, no yomukakutanga mwawafu. 21Thika di kweyire kufa kwamunu, dyo weyire muvumbukero wawafu nagho karo kwamunu. 22Kenge di ha kunungire wahe mukufa naAdami, kemo dyo mbo ha tumuka wahe mwaKristusi. 23Ene gha kara po makurando: Mukakutanga ne Kristusi. Keho pamwiyero waKristusi ne, wowa ha karire Hendi. 24Munyima mbo gha neya mahurero, apa mbo gha tapa ghufumu kwaNyambi ghoWihe. Ngeshi ku ghana mana kuhanyaghura po yikara nomarawero ghomahe nomangcamu. 25Gha kona kuraghura yira Fumu kate mbo gha mu withere Wihe han̂ore dhendi. 26Mukan̂ore ghoghuhura yu mba hanyaghura ne kufa. 27Yapwa kutjanga eshi: “Yoyihe gha yi mu withera Ye.” Ene ngeshi Yitjanga ha yiningi eshi, Kristusi gha witha yoyihe, yaghushemwenena eshi, ha mu pongora ko Wihe. 28No ngeshi mbo gha withe Mwana yoyi he, Naye mbo ghana kutapa kwaWihe yu gha mu withera yoyihe. Eshi kemo mbo gha kara Nyambi muyoyihe.
29No ngeshi hafu ne mbadi mbapwa kutumuna, yinye yi hana kushanena hanu eshi ha yoghe hafu? Nye yi hana kuyoghithera hafu? 30Natwe karo nye tuna kukutapera mu kehe nako kumaghukukutu? 31Mu kehe diyuwa mumaghukukutu na karanga me ghokufa. Shemwa mwayendhange, eyi no ne yaghushemwa shemwa, thika di mwa ni kurupera mwaKristus Jesusi ghoHekudyetu. 32Ngeshi ngo na rwire muno muEfesusi yira munu ghokufa nyara‐nyara noyiyama. Nye keho yi na wanine po? No ngeshi hafu ne mbadi mba wa tumuna,
“Tu dye ne keho no tu nwe,
yoyishi peghundha twa kufa!”
33Mwa kuyongaritha shime: “Yighamba yoyimango ya shinya yikara mwene.” 34Mu kuthighure no mwaharura shime: Hamweya hopapenu ha pira madimukero ghokwaNyambi. Eyi na kuyighambera yi, kukumufitha honyi.
Muvumbukero ghoyirama
35Ene ghumweya gha kona kwipura eshi: Ngepi di ha tumunanga hafu? Rudhi munye royirama ru mbo ha wana? 36Agha ne mepwero ghomayero! Eyi ghuna kukuna, mbadi wa kupara, ngeshi mbadi yina fu pakutanga. 37No eyi ghuna kukuna, mbadi ghuna kuyikuna muthishwi thokughutho yira dimbuto dyotumbi dyonyara‐nyara, ngambi di kare dyotumbi endi dyothinu thimweya. 38Ene Nyambi gha yipanga thishwi thika di gha yihima. Kehe dimbuto ghana kudipa Ye thishwi thadyo.
39Nyama dhoyinu yoyiyumi, mbadi dha kurikanya pofotji. Poghadi makutjakero pakatji konyama dhawanu, dhoyiyama, dhoyinyunyi no dhothi.
40Pa kara yirama yomuwiru no pamuve. Kutwedhima koyirama yomuwiru, mbadi pofotji noyirama yopamuve. 41Kutwedhima kodiyuwa, mbadi pofotji yira kokaghonda no konungwedhi. Karo kutwedhima kodinungwedhi dimweya, kwakutjaka nomanungwedhi ghamweya.
42Kemo dyo wa kara nagho muvumbukero wawafu: kukuna mumayowero, no kutumuna mukupira mayowero, 43kukuna mudishamu, no kutumuna mughuwa, kukuna mughukashu, ene kutumuna mungcamu. 44Yirama vene ha kunanga, kutumuna yirama yomudhimu. Yoyi pa kara yirama vene, yo pa karera karo yirama yomudhimu. 45Kemo yapwa kutjanga karo eshi: “Munu ghokutanga Adami, gha karire munu ghomuyumi.” Adami ghoghuhura, gha pirukire Mupepo ghokuparitha. 46Mudhimu mbadi wa tanganga kushwagha, yirama ya tanganga. Munyima ndani mudhimu. 47Munu ghokutanga ne kumuve gha tundire, aye ne yorukungu. Munu ghoghuwadi ne mudiwiru gha tundire. 48Thika di gha karire munu rukungu, kemo karo dyo ha kara hanu rukungu. No thika di gha kara munu ghomudiwiru, kemo karo dya kara hanu homudiwiru. 49Thika di twa kara thishwi thomunu pamuve, dyo mbo tu kara karo thishwi thomudiwiru.
50Eyi na kuninga mwayendhange ne yino: nyama nomanyinga, mbadi ya kona kuyerana kughufumu waNyambi. Karo yomayowero, mbadi ya kona kuyora yokupira mayowero.
51Mu mone, ame ne kudimukitha na kumudimukitha yothithithatero: Mbadi mbo tu fa twahe, ene twahe mbo tuna kuthitaghura. 52Padipori dyoghuhura, mbo yina kara kapupi kamanana muvindjwera, yoyishi dipori mbo dina hataghuka, nawafu mbana tumuka yira mbadi ha yowa no mbo tuna thitunuka. 53Yoyishi mayowero gha, mbo ghana pu kushupeka no kupira mayowero no ghufu mbo ghuna pu kushupeka no kupira ghufu. 54No apa mbo yipwa kushupeka mayowero no kupira mayowero, no ghufu no kupira ghufu, ho mbo dhipwe kurikanyitha edhi ha tjanga eshi:
“Kufa kuna dhongonoka,
mawithero ne ghana kara po.”
55“Kufa, kupi mawithero ghoye?
Kufa, kupi runonga roye?”
56Runonga rokufa ne maharwero, no maharwero ne gha wana ngcamu kumuragho. 57Ene matumero kwaNyambi eshi, gha tupa mawithero paHekudyetu Jesus Kristusi.
58Yodigho mwayendhange homwahakwa, mu tanare kadi wa kukunyunga‐nyunga, roruhe kuvura muyirughana yaFumu. Yoyi mwa dimuka eshi, ghutoghoro wenu ghoyirughana yokukarera Fumu, mbadi wa nyara‐nyara.
Currently Selected:
1 Hakorinte 15: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
