1 Hakorinte 14
14
Yitapa yoghupumbi ya piterera mandimi ghagho
1Mu kon̂otwedhe ruhakitho. Mu toghorope noyitapa yaMupepo ene thikuma, mukupumba. 2Munu yu ghana kughamba mumandimi, mbadi ghana kughamba nawanu ene naNyambi. Noyofotji temba yu ghokumutjwathana, yoyishi paMupepo ghana kughamba yokunda. 3Mupumbi ghana kupumbera hanu no kughamba man̂ando ghokutenda mudhimu no kuwatjokedha no kuwahengaghura. 4Oyu ghokughamba mandimi, thinda ghana kukutanaritha. Ene yu ghana kupumba, mbunga ghana kutanaritha. 5Ame na haka shemwa eshi, mwahe ngo mu kone kughamba mandimi. Ghuhunga ngo mu pumbe ndani. Mukakupumba ne mukuru kupiterera wa ha ghamba mandimi no kughapathurura eshi gha kone kutendera po mbunga.
6Ene pano, mwayendhange, ngeshi ha niya kukwenu no kughamba mumandimi, thighamwena munye keho sho ni mu yuvithe, oku mbadi na kughamba nenu, ngambi muyihokora, ngambi muyidimuka, ngambi muyipumba, ngambi mbadi payihonga?
7Karo kemo thika di ya kara yishika yishiwana moyo eshi mbadi wa kutapa mughuma, yira kashiya endi thivandjero, ngepi di sho gha dimuke munu eshi, thinye tho hana kushika pakashiya ngambi pathivandjero?
8No ngeshi dipori ha di tapa mbudhi dhokudhira kuyuvitha, yidye yu mbo gha kona kukuroghithera muyita? 9Kemo dyo ya kara kukwenu namwe karo. Ngeshi ha mu ghamba mumandimi man̂ando ghokudhira kutjwathana, munu munye mbo gha dimuka eshi yinye yina kughamba? Ngeshi kemo ne mumupepo muna kughambera! 10Po hadi wa ha dimuka eshi, mangatji mandimi pano pakaye. No kehe dhi mbadi dha pira mapathwerero. 11Ene ngeshi mbadi na dimuka ndimi, mbadi mbo tu kuyuva noyu ghana kudhighamba. 12Kuwenu namwe karo kemo. Ngeshi ngo mu kon̂otwedhe kuyitapa yaMupepo, mu kon̂otwedhe koyi ya tanaritha mbunga eshi, namwe mukuneghe mo.
13Yodigho, oyu ghokughamba mandimi, gha rapere thitapa thokughapathurura. 14Yoyishi ngeshi ha ni raperera mumandimi, mudhimu wange nagho ghuna kuraperera. Maghano ghange ne mbadiko. 15Ngepi sho yi kare keho? Eshi na kona kuraperera nomudhimu ene karo nomaghano. Nomudhimu ni mbere fuma dhaFumu, ene nomaghano karo kemo. 16Yoyishi ngeshi ha ghu tendi ndapero dhomatumero nomudhimu, ngepi di sho gha kone ghumweya yu ghadi po pandapero dhoye dhomatumero kughamba eshi: “Amen”? Yoyishi mbadi ghana kuyitjwathana ye yi ghuna kughamba. 17Ndapero dhoye dhomatumero, kemo dhihunga, ene mbadi dhina kutanaritha hamweya.
18Na kutumera Nyambi eshi, na ghambire yingi mumandimi kupiterera mwe mwamweya. 19Ene mumakonganeno ghombunga, na haka kughamba man̂ando kwoko nomaghano ghange eshi, ni kone karo kuhonga hamweya, mbadi yira noman̂ando diyovi.
20Mwayendhange, mwa kara mwanuke mumaghano, ene mu kare hanuke mumaghuyi, ho mu kare mwakuru mumaghano ghenu. 21Mumuragho yapwa kutjanga eshi, Fumu ghana kughamba ngeno:
“Nomandimi ghamweya nomiromo
dhawanumaghana,
mbo ni ghamba nodiko di,
no karo mbadi mbo ha ni tegherera.”
22Kemo yighamba yomandimi, thidimukitho thawakakudhira kutawa, kadi thawakakutawa. Karo kemo, yipumba ne yawakakutawa kadi yawakakudhira kutawa.
23Ngeshi mbunga dhodhihe ha dhi kukongwedha, no ngo ha ghambe mumandimi, ko kuwengenena hakanunda, ngambi hakakudhira kutawa, mbadi sha ninge eshi, mwaghundumuka ndi? 24Karo wahe ha pumbi, ko kuwengenena hakanunda ngambi hakakudhira kutawa, hana kumunongonona wahe, no ghana kukwera thinda. 25Yinu yoghudhindo yomumutjima wendi yina kushwagha. No ghana kwiya gha tongamene pamanwi ghendi, gha kanderere kwaNyambi no kunongonona thitunumeho eshi: “Shemwa Nyambi ne nenu ghadi!”
Yikara mwene yomumbunga
26Ngepi ne keho di sho yikare mwayendhange? Roruhe ngeshi ku muna kongana pofotji, kehe yu gha kara kehe pano nothitapa thokutapa, mupisalemi, mahongero, yihokora, ndimi, nomapathwerero ghadho. Mu koneke yoyiheya yi eshi, yikare matanaritho ghombunga. 27Kumandimi kukona kukara hanu hawadi ngambi hahatu hokughamba, kehe yu norufo rwendi no pa kone kukara yofotji ghokughapathurura. 28Ngeshi yu ghokukona kupathurura, pa kare mukakughamba mandimi ngeshi naye po, gha porere pamakonganeno ghombunga, ho gha ghambe naNyambi thinda pithendi vene.
29Kwawaporofeta, ha kona kughamba hawadi ngambi hahatu, no hamweya ha kone kutetera yi ghana kughamba. 30Ene ngeshi yu ghadi po ne ya mu hokokera yihokora, gha kone kuporera. 31Mwa kona kupumba mwahe, ene yofotji yofotji eshi ha kuhongere po wahe no kuwatjokedha. 32Muporofeta gha kara nongcamu kumudhimu wendi. 33Nyambi ne mbadi ghothivunganyi, ene murongeki no ghothiraro. Thika di ya kara mumambungakriste ghomahe. 34Hakamadi ha kona karo kuporera pamakonganeno ghenu. Yoyishi mbadi ha wa fundhwera eshi ha ghambe mumbunga dhoyikarera. Ha tawe karo thika di wa ghamba muragho. 35Ngeshi ku hana haka kudimuka thinu, ha kone kwipura hatutughuru wawo kumaghumbo. Yoyishi mbadi ya rogha kwamukamadi eshi gha ghambe muyikarera yofuma. 36N̂ando dhaNyambi ne kukwenu dha tundire ndi? Endi pithenu dheyerire?
37Ngeshi ha ghayara ghumweya eshi aye ne muporofeta endi gha wana thitapa thimweya kwaMupepo, gha kone kudimuka eshi eyi na kutjanga kukwenu ne yiraghura yaFumu. 38Ene ngeshi mbadi ghana yidimuka, naNyambi naye mbadi mbo gha mu dimuka karo. 39Yodigho, mwayendhange, mu toghorope mukupumba no mwa shinga eshi, ha ghamba mandimi. 40Yoyiheya yiyende thiwana mughuhunga no yirongame.
Currently Selected:
1 Hakorinte 14: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
