Malɨkɔ 9
9
1Yeso ɔ꞉ɓusigio ɓata kʉ ɓɔ: «Ta ingono, nanenu asigio ɓɔ ati eno ɓombi ngʉɓa náɓɛmaakɛ aka, yanɔ ɓombi ngʉɓa ɓa꞊ngɔsiomʉ, pɛɨ ɨɓɔ, anɨna Ɓʉngama ngʉɓa Asɔɓɨɨ anɨka nɔ angu.»
Yeso ɔmbambakɔ ɓɔ ngbɛkɛngbɛkɛ
2Ambise ɔ makwaa mɛɗɨa, Yeso ɔ꞉sɨka atɨ Pɛtɛlɔ, nɔ Yakɔɓɔ, nɔ Yɔanɨ, nɔ, ɔ꞉ɗeto naɓɔ akʉʉ ɔ ɨkpangba mɛngana yɛta ikongo ɓɔ. Ɓa꞉ɓio inani ta ɨyɔ naɓɔ. Kʉdɔ, ɔ꞉natana tɨa kʉ di, gbɛgbɛ ta ananɨ apɛɨ ɔ eɓo. 3Lɨpʉkʉ ngɨlangɔ lɛ꞉ka tɨa tu nɔgbɛ, nɔ jɛa ɓɔ ngbɛkɛngbɛkɛ. Mombi pɔ mʉngana akɔ dɔdɔ, angɔkwananamʉ anacho lɨpʉkʉ aɓio tu ɓanɨ. 4Atɨ Ɛlɨa nɔ Musa ɓɔ꞉ɓʉchwɛanɨa ga ngbaiii, ɨɓɔ ayakanaka nɔ atɨ Yeso.
5Ga Pɛtɛlɔ nɔ Yeso ɓɔ: «Mʉpananakɨa, ambɔ tiɓio gɔ pɛngɛ tɨta aka. Tɛ꞊maiso ɓangbaangbaa ɓaatʉ, mʉngana akɔ ʉwɛ, mʉngana akɔ Musa, nɔ mʉngana akɔ Ɛlɨa.» 6A꞉sugo ɓanɨ, dɔ, a꞉ɓiomʉ anɨmbɨa ɓɔ asugo tanɨ. Ɨɓɔ, ɓatitima ɓaatʉ ɓaɓomu ɓɔ꞉kwa ʉɓá nɔgbɛ. 7Kʉdɔ, ɨkʉɓa yɔ ɓisi mɛngana yɔ꞉ɓɨkɨa ga wɛɛ, nɔ igoɓi yɔngɔ yɔ꞉ɓukuto ga yuu. Iso mɛngana yɔ꞉chwɛanɨa inani amati ɔ ɨkʉɓa yɔngɔ asugo ɓɔ: «Mwana ngɨasɛmɨ wɔ ɓʉkʉnda ɨyakɛ, mʉkeni ɨyɔ!» 8Ta gagaa ngɨananɨ, ɓatitima akɔkanga anambamba eɓo ɓɔ, sɔkɔ tii ɓata ɓɛ꞉na mombi nga kɔmɔ, ɓɛ꞉na tɨta Yeso nangana ati eɓo. 9Ɨyɛ ndʉ ɓa꞉ɓio tɨa anujo ɨkpangba, ga Yeso naɓɔ ɓɔ: «Kpɔ kpɔ kpɔ, nátɨsigiomʉ mombi pɔ mʉngana yaka ngɨyɛnɛnɨ nɔ́꞉ɨnɔ, akɔɓɔya sinani ta aka ɨmɨ, mwana ngɨyɔ Mombi, na꞊jʉkana sina-ɔɔ akɔ ingwo ati ɔ mɨnda.» 10Ɨɓɔ, ɓatitima ɓa꞉pɛmakɨa ʉpanʉ ngʉwɔnanɨ ta pɛmakɨanɨ, yakamɛngana, ɓɛ꞉sɨnganaka yakanaka ati eɓo ɓɔ: «Wɔkeni-sɨ ɓɔ jʉkana akɔ ingwo ambɔ tanɨ?»
Ɓɔɓokuo Yeso yaka akʉʉ ɨgbɛ Ɛlɨa
11Mbise ɔngɔ, ɓakpata ɓɔ꞉ɓokuo Yeso ɓɔ: «Dɔtanɨ, ɓapananakɨa ɓɔ mapanʉ ɓakyɔsugo suo ɓɔ Ɛlɨa akɛ a꞊pʉnga-sɨ tɔwa?» 12Ɔ꞉ɓutosio ɓɔ: «Iii, Ɛlɨa a꞊pʉnga-sɨ ɨyɔ anɨka ta ɓanɨ, nɔ nɨmaiso yaka iɓomu. Yakamɛngana, dɔtanɨ-sɨ tɨa, ɓa꞉tɛndakɨa ɓata-ɔɔ ɓɔ Mwana ngɨyɔ Mombi a꞊dya sina ikoko nɔgbɛ, nɔ ɓɔ꞊mʉyapakiso? 13Yakamɛngana, Ɨmɨ, nanenu animbiiso ɓɔ Ɛlɨa a꞉tɔa pɔngɔ tɔanɨ, nɔ ɓɔ꞉mʉkyananaka ta ndʉ aka mɨtɨma ngɨyeɓo ya꞉baya-ɔɔ, kʉndʉ aka Mabii ka꞉tɛndanakɨa-ɔɔ akʉʉ angɔ.»
Yeso ɔheiso mwana ɔ mʉtɨma wɔ idu
14Ɨyɛ ndʉ, ɓa꞉ɓɔya aka ɓakpata ngʉɓɔmɔ ɓa꞉ɓio-ɔɔ, ɓɔ꞉tɛna ambaja ɔ ɓombi ata mʉja, ɔ꞉ɓukungueni ɓɔ kuu. Ɓa꞉ɓio atosonokio yaka nɔ ɓapananakɨa ɓɔ mapanʉ. 15Ɨɓɔ anɨna ta Yeso ɓɔ, yɔ꞉ɓʉmbangɨa ta mbangɨa. Ta gagaa ngɨananɨ, ambaja ɔ ɓombi ɔ꞉mʉtɛtɨa ga hɨtɔɔ, nayɔ akɔɓokuo. 16Yeso ɔ꞉ɓokuo ɓakpata ngʉɓangɔ ɓɔ: «Nákɔtosonokio monu naɓɔ akʉʉ ɔ ɨmanɨ?» 17Mombi mʉngana ati ɔ ambaja ngɨananɨ, ɔ꞉mutosio ɓɔ: «Mʉpananakɨa! Na꞉nɛkɨa pɛ nɔ mukpekpe wɔ mwana ata gue ngɨasɛmɨ, dɔ, anɔ mʉtɨma wɔ idu amati angɔ, ɨyɛ ya꞉mʉgbaiso ɓɔ woo. 18Mʉtɨma wɔ idu ngʉwɔnanɨ, wɔmundeni aka tɨa ʉndanɨ, wɔmugboso ɛsɨ ɓɔ kpru, ga lihuu nayɔ amonu ɓɔ fʉtʉ fʉtʉ, ɔkɛtana menu njɨkɨ, nɔ, nʉmaka ɓɔ ke ke ke. Nɛ꞉ta pɛ ɓakpata ngʉɓɔsɔɔ ɓɔ ɓɨmʉchweiso ɓaka mʉtɨma wɔ idu ngʉwɔnanɨ, yakamɛngana, yɔ꞉ɓʉkyaka ta kyaka.» 19Ga Yeso naɓɔ ɓɔ: «Inu, ʉmbɛkɛ wɔ janga báya! Na꞊ɓio ɓata ɨhɔ nenu amati ɔ angbinga mʉpɨtanɨ? Nanɨpɛakɨa ɓata amati angbinga mʉpɨtanɨ? Ikeni nɔ mwana ngɨananɨ iyani.» 20Kʉdɔ, ɓɔ꞉mɨkɨa nayɔ. Ɨyɛ ta mwana a꞉mɨna Yeso ɓɔ, mʉtɨma wɔ idu ngʉwɔnanɨ wɔ꞉mʉjʉkʉa tɨa nɔgbɛ, ga ɨyɔ ɛsɨ ɓɔ kpru. Nɔ, ɔ꞉pʉnga kpungbonoko, ga lihuu nayɔ amonu ɓɔ fʉtʉ fʉtʉ. 21Yeso ɔ꞉muɓokuo ɨsɛ ɔ mwana ɓɔ: «Ɨkyɛmʉ ngɨyɛ, ya꞉mʉpʉnga pɔngɔ-sɨ angbinga nga ino tanɨ?» Ɨsɛ ɔ mwana ɔ꞉mutosio ɓɔ: «Anɨngwa ta aɨɓwana. 22Idu ngɨyɛnɛnɨ, ya꞉kyɔmukwisiso yɔmɔ amati ɔ dyaa, yɔmɔ amati ɔ mipo, tinene ɓɔ yɨmʉwa ta nɨwa. Wɔɓieni adaa ngɨa wakɨa-ɔɔ ɨkyɛmʉ, atɨnɨa ɓaka ikoko, nɔ wɔtɨsalɨa!» 23Ga Yeso nayɔ ɓɔ: «Wɔsugo-sɨ ɓɔ wɔɓieni adaa ngɨa wakɨa-ɔɔ ɨkyɛmʉ, dɔtanɨ? Akɔ mombi ngɨa anɔ báya akɔ Asɔɓɨɨ, yaka ngɨyɛ yamʉkyaka yangɔmʉ.» 24Ta gagaa ngɨananɨ, ɨsɛ ɔ mwana ɔ꞉tʉɓɨa ɓɔ: «Nɔbáyɔ! Yakamɛngana, anɛkɨa pɨ isingo, dɔ, báya ya bele!»
25Ɨyɛ Yeso ɛ꞉na ambaja ɔ ɓombi naɓɔ anɨkɨa ɓɔ hɨtɔɔ, ɔ꞉nyakɨa mʉtɨma wɔ idu ga nyaka nyaka: «Ʉwɛ, ɨkyɛmʉ yɔ mʉtɨma wɔ idu ngʉwa wakyɔgbaiso, nɔ, dɨkpa machwei-a! Ya ʉpanʉ! Chwɛa amati wɔ mwana ngɨa, nɔ, watɨtɔa sina ɓata pɔ tɔwa!» 26Idu yɔ꞉natɨa ɓɔ waa waa, yɔ꞉mʉjʉkʉa mwana ɓɔ jʉkʉ jʉkʉ, nɔ yɔmʉchwɛa ga puu. Ga mwana ta ɓɔ chwɨ ndʉ mʉnda. Ɓombi ɓɔ꞉sugo ga ɔkio ɓaka mʉtɨma tɨta kioni. 27Yakamɛngana, Yeso ɔ꞉mʉfa ɨkɔndɔ nɔ ɔ꞉mimaiso, ga mwana ta ɓɔ gba.
28Ngbinga ngɨa Yeso a꞉tɔwa-ɔɔ tɨa andei, nɔ ɨyɔ tɨta nɔ ɓakpata ngʉɓangɔ, ɓɔ꞉muɓokuo ɓɔ: «Idu ngɨyɛnɛnɨ, yɔ꞉tɨkyakɔ pɛngɛ-sɨ isu akɔchweiso, dɔtanɨ?» 29Yeso ɔ꞉ɓutosio ɓɔ: «Ɨkananja yɔ mʉtɨma wɔ idu ngʉwɔnanɨ, wangɔchwɛamʉ ɓʉtʉʉ, yɔɓienimʉ ta ɨngbaa akɔnɨta Asɔɓɨɨ.»
Yeso ɔɓɨanɨɔ ɓata ingwo nɔ jʉkana ngɨyangɔ akɔ ingwo
30Ɨyɛ ndʉ ɓa꞉ngwa ananɨ, ɓɔ꞉pʉnga achɨla ihoi yɔ Galilaya. Yeso a꞉ɓiomʉ akʉnda ɓɔ ɓombi ɓɨmbɨa. 31Dɔ, a꞉ɓio-sɨ apanɨa tɨta ɓakpata ngʉɓangɔ ingainga. Ga ɨyɔ naɓɔ ɓɔ: «Ɓombi ɓanɨsa nemɨ agaba, ɨmɨ Mwana ngɨyɔ mombi, alɨkɔndɔ lɔ ɓombi. Ɓa꞊binawa, yakamɛngana, ambise ɔ makwaa kaatʉ, na꞊jʉkana akɔ ingwo jʉkananɨ.» 32Yakamɛngana, ɓakpata ɓa꞉pemisomʉ ɨsɨ yɔ yaka ngɨyɛnɛnɨ, nɔ, ɓɔ꞉ɓio kʉ akumo nayɔ akɔɓokuo.
Anɨ a mombi ata mʉja anagaaka ɓangɛ
33Kʉdɔ, atɨ Yeso ɓa꞉ɓɔya anɔ Kapalanaumu. Ngbinga ngɨa ɓa꞉kumonio-ɔɔ ambɛnɨ, Yeso ɔ꞉ɓokuo ɓakpata ɓɔ: «Akɔ yaka yɛmanɨ pɨ ɨyɛ nɔ́꞉ɓio-ɔɔ ayakana anɔ ɨngbaa ɓanɨ?» 34Yakamɛngana, ɓɔ꞉gbaa ta ɓɔ woo. Dɔ, ɓa꞉ɓio ayakana, akʉnda nɨmbɨa ɓɔ anɨ a mombi ata mʉja ati eɓo. 35Kʉdɔ, Yeso a꞉wolo ga jikomu, ɛ꞉soko ɓatitima tɛkɛɓɛ nɔ ɓapɨnɨ ngʉɓɔnanɨ, ga ɨyɔ naɓɔ ɓɔ: «Mombi ngɨa akʉnda aɓio mombi ɔ pɛɨ, ɔkwananɔ aɓio ndʉ mombi ɔ mbise ati ɔ ɓangɛ ɓaɓomu, nɔ kʉ baya ɔ ɓombi ɓaɓomu.» 36Yeso ɔ꞉sɨka mwana ata bele, nɔ, ɔ꞉mimaiso ati eɓo ga gba. Mbise ɔngɔ, ɔ꞉mʉnaputo, nɔ, ɔ꞉ɓusigio ɓɔ: 37«Mombi muɓomu ngɨa atɛtɨa mwana ndʉ ɨya, aino yɛsɛmɨ, ambɔ ɔnatɛtɨɔ ta ɨmɨ ɓɔ kpɛ. Nɔ mombi muɓomu ngɨa anemɨ atɛtɨa, angɔmʉ nɛmɨ atɛtɨa ta ɨmɨ, yakamɛngana, atɛtɨa kʉ nɔ mombi ngɨa a꞉natʉma ɨmɨ.»
Anɨ anɔ ʉgbaa ngʉwɔ Yeso
38Ga Yɔanɨ nɔ Yeso ɓɔ: «Mʉpananakɨa, tɛ꞉nɔ pɛngɛ mombi mʉngana aki, akɔchweiso mɨtɨma yɔ madu akɔ ino yɛsɔɔ. Isu, tɔ꞉ɓio akʉnda nayɔ akɔgbɛmɨa, dɔ, angɔmʉ ɨhɔ nesu.» 39Yeso ɔ꞉ɓutosio ɓɔ: «Nátɨmʉgbɛmɨenimʉ, dɔ, mombi pɔ mʉngana angɔkwananamʉ akɨa yaka yɛta ɨmbangɛ akɔ ino yɛsɛmɨ, mbise ɔngɔ, ɔ꞉pʉnga ɓata kʉ nɛmɨ ayakanakɨa. 40Yasugo ɓɔ, mombi ngɨa angɔmʉ mʉyaa weso, anɔ ʉgbaa ngʉweso. 41Nɔ mombi muɓomu ngɨa anenu aninjo ʉpata wɔ mipo kɔta mamwɛ, dɔ, ná ɓombi ɓɔ Klisito, nanenu anʉngɨa ingono, a꞊ngɔjangamʉ mʉkaya pɔ janga.
Yeso enjo mapanʉ akʉʉ nɨkwa aɓʉɓɨɓɨ
42Yakamɛngana, ndʉ mombi akwisiso mʉngana ɔ ɓana ngʉɓa, ɓa꞉nabaya ɨmɨ aɓɛ, yɔsisekio gɔ pɛngɛ nayɔ anʉnga ngyɛngyɛ aɨmɨyɔ ɓɔ dɔɔ, nɔ, ɓɔmugiso amati ɔ ipuu yɛta ɨja ga kyoo. 43Ɨkɔndɔ ngɨyɛsɔɔ yɔnatʉmeni aɓʉɓɨɓɨ, ikio pɨ ta kio. Dɔ, ya gɔ pɛngɛ iɗo anɨsa akɔ uɓei ngʉwɔ ingono, ʉwɛ, nɔ ɨkɔndɔ mɛngana. Sɔkɔmʉ ʉwɛ, apɛmakɨa lɨkɔndɔ ɗepini, nɔ, ɓɔnagiso nalɔ aʉmʉwa ngʉwa aki dyaa ya-ɛɛ, amati ɔ mago nɔ mago.#9:43 dyaa pɔ ɓɔ nɔ mɨyakɨa nga yɛmɔ ya ɓɔ Gehena [ 44Aki ɓakute ɓangɔdʉkamʉ-ɛɛ, nɔ aki dyaa, yangeboniomʉ-ɛɛ.] 45Mʉtɨndɨ ngʉwɔsɔɔ wɔnatʉmeni aɓʉɓɨɓɨ, ukio ta kio. Dɔ, ya gɔ pɛngɛ iɗo nɔwɛ anɨsa akɔ uɓei ngʉwɔ ingono mʉtɨndɨ mʉngana. Sɔkɔmʉ ʉwɛ, apɛmakɨa mɨtɨndɨ ɓepini, nɔ, ɓɔnagiso tɨa aʉmʉa, ngʉwa aki dyaa ya-ɛɛ amati ɔ mago nɔ mago. [ 46Inani, ɓakute ɓangɔdʉkamʉ-ɛɛ, nɔ dyaa yangebonio sina kʉ ɓanɨ.] 47Yɔɓieni ɓɔ isó ngɨyɛsɔɔ, yanɔwɛ akwisiso aɓʉɓɨɓɨ, ɨchweiso ta chwɛiso. Ya gɔ pɛngɛ nɔ ɨjangɨa akɔ ʉwɛ, akumonio akɔ Ɓʉngama ngʉɓa Asɔɓɨɨ, wɔɓieni nɔ isó mɛngana, sɔkɔmʉ ɓɔ ɓɨnagiso amati ɔ dyaa yɔ mago nɔ mago, wɔɓieni nɔ mesu kapɨnɨ. 48Inani, ɓakute ɓangɔdʉkamʉ-ɛɛ, nɔ, dyaa yangebonio sina kʉ ɓanɨ. 49Dɔ mombi muɓomu, ɓa꞊muto sina nɔ dyaa, ngbanga ndʉ ɨyɛ ɓagbɨnya-ɔɔ mukwe akɔ makayaɓʉ. 50Mukwe ka ɨkyɛmʉ yɛta tɨpɨ, yakamɛngana, kɔngweni ɓʉtɨpɨ ɓɔngɔ, ɓakʉtambana ɓata tɨa nɔ ɨmanɨ? Inu ɓakwɔɓɔngɔ, ɓieni-sɨ nɔ mukwe amati eno, nɔ, nɔ́ɓio kʉ nɔ majɨɔ nɔ ɓombi ɓaɓomu.»
Currently Selected:
Malɨkɔ 9: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
