Malɨkɔ 7
7
Gbali ngɨyɔ Ɓayuda
1Tɨa ɓisi mʉngana, Ɓafalisayɔ, ɨhɔ nɔ mikpekpe yɔ ɓapananakɨa ɓɔ mapanʉ ngʉɓa, ɓa꞉ngwa anɔ Yelusalɛma, ɓɛ꞉ka akungwonio anambamba ɔ Yeso. 2Ɓɔ꞉tɛna nganangana ɔ ɓakpata ngʉɓangɔ, adyakaka nɔ lɨkɔndɔ lɨta mʉsʉgʉ, ɨsɨ yɔngɔ ɓɔ sɔkɔmʉ lɨgyaɓɛ, akpatanakɨa nɔ gbali ngɨyeɓo. 3Ɨnadɔ, ɨɓɔ Ɓafalisayɔ nɔ Ɓayuda ɓaɓomu, ɓa꞉ɓikpata gbali ngɨa ɓɛsɛ ɓeɓo ɓa꞉sɨa, nɔ kɛkɛɛ. Kʉɓanɨ, ɓangɔkwanana jɛnɛ dyakaka, pɛɨ ɔ gyaɓana lɨkɔndɔ ta ɓɔ ngwa. 4Ɓɔ꞉tɔweni jɛnɛ asɔkɔ, pɛɨ ngɨa ɓadyakaka-ɔɔ, ɓɔchana-sɨ ta ɨngbaa akɔ mʉgyaɓa. Ɓa꞉ɓio ɓata kʉ nɔ ɓakɔkɔ ngaɓɔmɔ ɓaja, akpatanakɨa ta nɔ gbali ngɨananɨ eɓo, ndʉ mʉgyaɓa wɔ mapata, nɔ ɓakpɛngʉ, nɔ lɨkɔchɔ ngɨlɛ ɓa꞉lɨkɨa nɔ mako.
5Kʉdɔ, Ɓafalisayɔ nɔ ɓapananakɨa ɓɔ mapanʉ ɓa꞉muɓokuo ɓɔ: «Ɓakpata ngʉɓɔsɔɔ ɓakɔdyakaka nɔ lɨkɔndɔ mʉsʉgʉ dɔtanɨ? Ɨyɛnɛnɨ, ya di nɔ gbali ngɨa ɓakuku ɓa꞉tɨsɨa nayɔ.» 6Yeso ɔ꞉ɓutosio ɓɔ: «Hoo inu ɓague! Ná ɓombi ɓɔ pɛtanaka. Ambɔ kʉdɔ ɨgbɛ Isaya a꞉tɛndakɨa jɛnɛ akʉʉ eno ɓɔ:
‹Ɨfananja ngɨyɛ, ɓakyɔnabibiso ɨmɨ ta nɔ monu.
Yakamɛngana, amɨtɨma ngɨyeɓo, ɓangɔmʉ tinene nɛmi pɔ bele!
7Ya ta ɓʉtʉʉ asugo ɓɔ, ɓanɛmɨ akɔbibiso,
dɔ, yaka ngɨyɛ ɓapanɨa,
ya ta mapanʉ kɔ ɓombi.›
8Ná꞉sɨa pɛpɛ mapanʉ ngʉkɔ Asɔɓɨɨ, nɔ, nɔ́꞉tɔsɨka tɨa gbali ngɨyɔ ɓombi.» 9Ga Yeso ɓata naɓɔ kʉ ɓɔ: «Yanenu anɨkataa agiso mapanʉ kɔ Asɔɓɨɨ tɨta giso, nɔ, némaiso tɨta gbali ngɨyeno. 10Dɔ, Musa a꞉sugo ɓɔ: ‹Kumo atɨ atɔ nɔ anʉ.› Ɔ꞉tɔsugo ɓata kʉ ɓɔ: ‹Mombi ɔgbangeni ɨsɛ ga pɔ inye, ɓɨmʉwa, ta nɨwa.› 11Yakamɛngana, inu, nákɔpanɨa ɓɔ: ‹Mombi ɔsigieni ɨsɛ, pɔ inye ɓɔ: Ɨkyɛmʉ ngɨyɛ nɔsisekio pɛngɛ nɨnasalɨa nayɔ ya ta Kɔlɔbanɛ.› Ɨsɨ yɔngɔ ɓɔ apɛpɛ akɔ Asɔɓɨɨ. 12Kʉdɔ, inu, námusigio tɨta ga atɨsalɨa tii ɓata atɨ inye nɔ ɨsɛ pɔ bele. 13Kʉɓanɨ, inu, nákɔboliso ʉpanʉ wɔ Asɔɓɨɨ tɨa nɔ gbali ngɨa nánayɔ apanɨa. Nɔ, ná ɓata kʉ akɨa yaka yɛta gbaɨ gbaɨ ngayɛmɔ ɨja, kʉndʉ ɨyɛnɛnɨ.»
Ɨkyɛmʉ ngɨyɛ yakiiso mombi mʉsʉgʉ
14Yeso ɛ꞉soko ɓata ambaja ɔ ɓombi, ga ɨyɔ naɓɔ ɓɔ: «Inu ɓaɓomu, anɔkeni iɗo, nɔ, nɔ́pemiso ta pemisoo. 15Ɨkyɛmʉ yangɔmʉ pɔ mɛngana, ɨyɛ yanɨngwa aɓei ɔ mombi, yɛka yɔtɔkumonio amati angɔ, nɔ, yɔmukiiso mʉsʉgʉ apɛɨ ɔ Asɔɓɨɨ. Yakamɛngana, ta ɨkyɛmʉ ngɨyɛ yachwɛa amati ɔ mombi, ayɛ yamukiiso mʉsʉgʉ. 16[Mombi ngɨa anɔ machwei anʉka, ʉka!]»
17Ndʉ, ɓa꞉tɔwa andei, ɨɓɔ tɨa ɗu nɔ ambaja ɔ ɓombi, kʉdɔ, ɓatitima ɓɔ꞉mɨta ɓɔ ɨɓʉngakɨa ɨsɨ yɔ yaka ngɨyɛnɛnɨ. 18Ga ɨyɔ naɓɔ ɓɔ: «Ɨnɛ! Ambɔ inu ná gɔ ɓata kʉ amati ɔ ɓujangijangi ngʉɓaɓɛ? Nángɔ ndɨ anɨmbɨa ɓɔ ɨkyɛmʉ pɔ mɛngana ngɨyɛ yangwa aɓei, nɔ, yɔkumonio amati ɔ mombi, yangɔkwananamʉ pɔ bele nayɔ akiiso mʉsʉgʉ? 19Dɔ ɨkyɛmʉ iɓomu ngɨyɛnɛnɨ, yangɔkumoniomʉ amati ɔ mʉtɨma, yakamɛngana, amati ɔ ɓʉa, mbise ɔngɔ, yɔtɔchwɛa tɨa kʉ chwɛa. Yeso a꞉ɓio ananɨ akʉnda asugo ɓɔ: ‹Idyo yɔ ɔpɛ, yangɔmʉ.›
20Ɔ꞉matɨa ɓata naɓɔ asigio ɓɔ: ‹Ta ɨkyɛmʉ ngɨyɛ yakyɔchwɛa amati ɔ mʉtɨma wɔ mombi, ayɛ, yakwanana nayɔ akiiso mʉsʉgʉ. 21Dɔ amati ɔ mʉtɨma wɔ mombi, itungwiyo yɛta ɓɨɓɨ iɓomu yakyɔchwɛa, ngbanga ndʉ kɨa muso, ndiɓo, maa ɓombi, 22kɨa ɓuso, mʉsasa wɔ lɨkyɛmʉ, ɓʉɗɛa, ɓufili, ɓʉjangwɛ, imi, sɛaka Asɔɓɨɨ pɔ ɓombi, aɗia, nɔ ɓujangijangi. 23Migbo yɔ yaka ngɨyɛnɛnɨ iɓomu, yakyɔchwɛa ta amati ɔ mombi, nɔ, yɔmʉkɨa aɓio mʉsʉgʉ apɛɨ ɔ Asɔɓɨɨ.›»
Báya ngɨyɔ muto Ɓagiliki
24Ɨyɛ ndʉ atɨ Yeso ɓa꞉ngwa ananɨ, ɓɔ꞉sa tɨa akɔ ihoi yɔ Tilo. Ɔ꞉tɔkumonio amati ɔ ɨkáá mɛngana ɓɔ, dɔ, a꞉ɓio ahata ɓɔ mombi atɨmbɨamʉ gɔ-sɨ ɓɔ ananɨ. Yakamɛngana, ya꞉ɓio ta ɓʉkaɨ. 25Moi mʉngana a꞉ɓio nɔ mwana angɔ ata moi nɔ mʉtɨma wɔ idu. Ɨyɛ ɔ꞉ka ɨsaʉ yɔ Yeso, ta gagaa ngɨananɨ, ɛ꞉ka anɨkwa amɨtɨndɨ yangɔ ga kpru. 26Moi ngɨananɨ, a꞉ɓiomʉ muto ɔ Ɓayuda. A꞉ɓio ingainga muto Ɓafɔɨnɨkɨa amati ɔ ɨkʉmbʉ yɔ Sulia. Ɔ꞉mɨta ɓɔ ichweiso ɓaka mwana angɔ mʉtɨma wɔ idu. 27Yakamɛngana, ga Yeso nayɔ ɓɔ: «Sɨa ɓana ɓimotoo-sɨ, dɔ yangɔmʉ iɗo asɨka idyo yɔ ɓana, nɔ, wɔɨgisio tɨa ɓɛmva.» 28Moi ɔ꞉mutosio ɓɔ: «Yaɓanɨ, Makwasɛmɨ, yakamɛngana, ɓɛmva ɓadya kʉɔ mikinyo yɔ idyo ngɨyɛ yaɓwanakɨa ɓana ɛsɨ ɔ gbɔ́gbɔ.» 29Kʉdɔ, Yeso a꞉ɓio nayɔ ɓɔ: «Wɔsugo yaka yɛta iɗo. Sa, dɔ mʉtɨma wɔ idu wɔ꞉mʉchwɛɔ mwana asɔɔ, chwɛanɨ.» 30Ɨyɛ, moi ngɨananɨ, a꞉tɔa andɔngɔ, a꞉tɔgbʉka mwana angɔ tɨta ɓakwaɛ ɓɔ pisii, nɔ, mʉtɨma wɔ idu wɔ꞉mʉchwɛeni tɨa kʉ chwɛanɨ.
Yeso ɔheiso ijangi
31Ɨyɛ ndʉ Yeso a꞉ngwa ananɨ anɔ Tilo, ɔ꞉chana tɨa anɔ Sɨdɔna. A꞉tɔwa ɨngbaa tɨa nɔ ʉgbaa mesu aipuu ngɨyɔ Galilaya, akɔchana ihoi yɔ Dekapoli. 32Inani, ɓɔ꞉tɔmɨkɨa nɔ ijangi machwei madɨkpɛ, nɔ puo monu ta puo. Ɓɔ꞉mʉndɨanɨa ɓɔ ɨmʉnapɨa ɓaka nɔ ɨkɔndɔ. 33Kʉdɔ, a꞉ngwa nayɔ ananɨ ati ɔ ambaja ɔ ɓombi, ɔ꞉kɛla nayɔ anɔ ambamba ɓɔ, ɔ꞉mʉmaya ɓakpɛngbɛ amachwei, ɔ꞉toko maɗaʉ, nɔ ɔ꞉muɓoto ʉɗaɗa ngʉangɔ nɔ maɗaʉ ngʉkɔnanɨ. 34Mbise ɔngɔ, ɔ꞉tɨna ɓajwa akʉʉ ɔ ɓisi, ɔ꞉homuo ga fuka. Ga ɨyɔ ɓɔ: «Ɛfata!» gananɨa-ʉ! 35Ta gagaa ngɨananɨ, ga machwei nɔ ijangi ngɨyɛnɛnɨ ɓɔ ga, ga ʉɗaɗa nayɔ ɓɔ paa, ga ɨyɔ moni ɓɔ fwa! 36Yeso ɔ꞉ɓʉgbɛma ɓɔ ɓatɨngakɨamʉ mombi yaka ngɨyɛnɛnɨ pɔ mʉngana. Ɔ꞉ɓʉgbɛmeni jɛnɛ ɓanɨ, ambɔ ɔtitio tɨa ɓɔ ɓisa apanja ɨsaʉ yɔngɔ tɨa nɔgbɛ achana. 37Yaka iɓomu ngɨyɛ a꞉kɨa, ya꞉mbangɨa ɓombi ta ɓaɓomu. Ɓɔ꞉sugo ga: «Akɨa yaka iɓomu ta manjanja! Akɔheiso kʉ nɔ ɓombi ngʉɓa ɓa꞉dɨkpa machwei, nɔ, lijangi apʉnga yaka.»
Currently Selected:
Malɨkɔ 7: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
