Malɨkɔ 6
6
Ɓombi ɓɔ Najalɛtɨ ɓɔyaɔ Yeso
1Ɨyɛ ndʉ Yeso a꞉ngwa ananɨ aɓio-ɔɔ, ɔ꞉tɔwa tɨa anɔ Najalɛtɨ, andaɓʉ andei, nɔ, ɓakpata ngʉɓangɔ ɓɔ꞉mʉkpata kʉ inani. 2Tɨa akɔ ɓisi ɓɔ nuhomuo ngʉɓɔ Ɓayuda, ɔ꞉pʉnga apanɨa ɓombi amati ɔ ɨkáá yɔ nɨta. Yaka ngɨyɛnɛnɨ, yɔ꞉mbangɨa ɓombi ɓaɓomu ngʉɓa ɓa꞉ɓio ananɨ ta mbangɨa. Ɓɔ꞉ɓokwono ɓɔ: «Agbʉka-sɨ ɨyɔ nɨmbɨmbɨanaka yɛta ɨja ngɨyɛɓɔ gbanɨ? Anɨ akɛ a꞉minjo ɨyɔ angu ɔngɔ? Anɨ a꞉minjo angu akɔkɨa yaka yɛta imbangɛ ɨpɛ ɓanɨ nɔ lɨkɔndɔ ngɨlangɔ ingainga? 3Ambɨ ndɨ-sɨ ɨyɔ akɛ, akyɔkɨa tɛa yɔ haa maɓau? Ambɨ ndɨ ta mwana ɔ Malɨa, nɔ manye atɨ Yakɔɓɔ, nɔ Yɔsɛ, nɔ Yuda nɔ Simoni? Ɓamanye ngʉɓa ɓeɓoi ɓangɔmʉ ndɨ ta ɨhɔ nesu aka? Yaka ngɨyɛ ɓa꞉napɨa-ɔɔ báya ngɨyeɓo akʉʉ ɔ Yeso nɔ majɛjɛ, yakwa ɓanɨ.» 4Kʉdɔ, Yeso ɔ꞉ɓusigio ɓɔ: «Ɨgbɛ yɔ Asɔɓɨɨ ɓaɨbibiso bibisoni. Yakamɛngana, andaɓʉ, nɔ amati ɔ ɨfananja ngɨangɔ, pɔ akɔ ufini ngʉangɔ ɓɔ kpɛ, ɓamɨna ta ɓʉtʉʉ.» 5Kʉdɔ, Yeso a꞉kwananamʉ akɨa yaka yɛta imbangɛ pɔ mɛngana aɨkʉmbʉ ngɨyɛnɛnɨ. Yakamɛngana, a꞉napɨa jɛnɛ tɨta lɨkɔndɔ akʉʉ mukpekpe yɔ ɓombi ɓɔ ɓakaɓu, nɔ, ɔ꞉ɓuheiso. 6Janga báya ngɨyeɓo, ya꞉mʉkyaka kyakanɨ.
Yeso ɔtʉmɔ ɓatitima tɛkɛɓɛ nɔ ɓapɨnɨ
Ɨyɔ, ɛ꞉sɨnganaka ta aninjo mapanʉ akɔ lɨkʉmbʉ ngɨlɛ la tinetine ananɨ. 7Kʉdɔ, Yeso ɛ꞉soko ɓatitima ngʉɓangɔ tɛkɛɓɛ nɔ ɓapɨnɨ, nɔ, ɔ꞉pʉnga naɓɔ atʉmaka ɓapɨnɨ ɓapɨnɨ. Nɔ, ɔ꞉ɓinjo angu ɔ chweiso mɨtɨma yɔ madu. 8Ɔ꞉ɓinjo ʉpanʉ ɓɔ: «Nátɨsɨkamʉ ɨkyɛmʉ pɔ mɛngana, pɔ idyo, pɔ sakɨ, pɔ gʉtʉ pɔ ɓagyɛgyɛ amati ɔ kʉgba ngɨyeno. Yakamɛngana, a꞉ɓʉsɨa ɓɔ ɓiɓotono ta nɔ mitupo ngɨyeɓo.» 9Ɔ꞉ɓʉmatɨa ɓata ɓɔ: «Pɛpɛ lɨkpakʉ, nálɨpɛnɨa pɛnɨanɨ, yakamɛngana, nátɨpɛnɨamʉ lɨpʉkʉ lɔ sɛsʉ ɗepini ɗepini.» 10Ga ɨyɔ ɓata naɓɔ kʉ ɓɔ: «Nɔ́ɓɔyeni akɔ ɨkʉmbʉ, ɓieni ta aɨkáá ngɨyɛ ɓanɨtɛtɛa-ɔɔ, akɔɓɔya aka nángwa-ɔɔ akɔ ʉmʉa ngʉwɔnanɨ. 11Akɔ ʉmʉa ngʉa ɓa꞊ngɔnɨtɛtɨamʉ-ɔɔ, pɔ anʉka yaka ngɨyeno, pɛɨ ngɨa náchwɛa-ɔɔ, ɓɛndakeni iɓungu yɔ mɨtɨndɨ ngɨyeno naɓɔ anɨmbiiso ɓɔ ɓɔkɨɔ ɓɨɓɨ.»
12Kʉdɔ, ɓa꞉sa akɔɓɨakɨa Ɨsaʉ yɔ Asɔɓɨɨ ɓɔ ɓombi ɓɨnacho mɨtɨma! 13Ɓa꞉chwɛiso ɓombi ɓaja mɨtɨma yɔ madu, ɓɔ꞉ɗɛa ɓombi ɓɔ ɓakaɓu ɓaja umbundo, nɔ, ɓɔ꞉ɓuheiso.
Ɓɔwɔ Yɔanɛ ngɨa a꞉tiɓatiso
14Awɨa ngɨyɔ Yeso a꞉ɓio anɨsa tɨta nɨsa, kʉɓanɨ, ngama Hɛlɔdɛ ɔ꞉tɔka ɨyɔ ɨsaʉ yɔngɔ. Ɓombi akɔsugo ga Yɔanɨ ngɨa a꞉tɨɓatiso akɛ, a꞉jʉkana pɛ akɔ ingwo. Kʉ ananɨ ɛ꞉nɨanɨa pɛ-ɔɔ nɔ ʉpanʉ wɔ kɨa yaka yɛta ɨmbangɛ. 15Ɓombi ngaɓɔmɔ ɓa꞉ɓisugo ga a ɨgbɛ Ɛlɨa, ɓɔmɔ ɓata ga, a ta ɨgbɛ kʉndʉ magbɛ ngakɔmɔ. 16Yakamɛngana, ɨyɛ Hɛlɔdɛ ɔ꞉ka yaka ngɨyɛnɛnɨ, ga ɨyɔ ɓɔ: «Nyɔɔ, ta Yɔanɨ ngɨa ɨmɨ na꞉titio pɔngɔ ɓɔ, ɓʉmukio mʉtʉ, ɨyananɨ a꞉jʉkana pɛ akɔ ingwo!»
17-18Ingwo ngɨyɛ Yɔanɨ ya꞉pʉnganakɨa ɓɔ: ɨyɔ Hɛlɔdɛ, a꞉sɨka Hɛlɔdɨa ngɨakɛ, a꞉ɓio moi ɔ manye Filipo. Kʉdɔ, Yɔanɛ, a꞉musigio Hɛlɔdɛ aɓʉmba ɓɔ: «Yɔsisekiomʉ ʉwɛ, asɨka moi ɔ mwana ɔ anʉ pɔ bele!» Kʉɓanɨ, Hɛlɔdɛ ɔ꞉titio ɓɔ ɓɨmʉfa Yɔanɛ, nɔ, ɓɔ꞉mʉmaya aboloko, nɔ, ɓɔ꞉mʉnga nɔ ɓaselegeni. 19Hɛlɔdɨa ɔ꞉huo nɔ ʉnganga ɓɔ kyɛɛ akʉʉ ɔ Yɔanɛ. Nɔ, ɔ꞉pʉnga nayɔ asagɨa ga amʉwa ta asini. Yakamɛngana, sɔkɔmʉ ɨna ɨngbaa yɔngɔ. 20Ɨnadɔ, Hɛlɔdɛ a꞉tɨkumo Yɔanɨ nɔgbɛ, dɔ a꞉ɓio anɨmbɨa ɓɔ, a mombi ata ngbingbii nɔ kʉ tu. Kʉ ananɨ, a꞉ɓio-ɔɔ nayɔ ta apɛmakɨa. Ɔ꞉keni jɛnɛ Yɔanɛ ayaka, ɔ꞉potio mbambanio nɔ ʉɓá. Yakamɛngana, yaka yɔngɔ, yɔ꞉ɓio nayɔ kʉ anɨkataa.
21Ɓisi mʉngana, Hɛlɔdɛ a꞉dyiso ʉmbɔ akɔtunguo nɔtanɨa ngɨangɔ. Ɛ꞉soko ɓafandɔngɔ, nɔ ɓangama ɓɔ ɓasʉda kʉ nɔ ɓangama ɓɔ ɨkʉmbʉ yɔ Galilaya. 22Kʉdɔ, ga gwa ata moi ngɨyɔ Hɛlɔdɨa ga buu akɔ ɨmbaa. Ɔ꞉jo ʉmbɔ ɓɔ ku ku ku, nɔ, ɔ꞉ɓundo atɨ ɨsɛ, nɔ ɓombi ɓaɓomu ngʉɓa ɓa꞉ɓio ananɨ akɔ ɨda yɔ ʉmbɔ ta ɓundo. Kʉdɔ, ngama Hɛlɔdɛ a꞉ɓio nayɔ ɓɔ: «Wɔkʉndɔ ɓɔ nɨnakwa nɔ ɨmanɨ, mwana asɛmɨ? Ɨkyɛmʉ iɓomu ngɨyɛ wa꞊nɛta, na꞊nenjo injoni.» 23Hɛlɔdɛ ɔ꞉kio silika apɛɨ ɔ mwana angɔ ngɨananɨ ata moi ɓɔ: «Manja ta ndʉ ɓaba, na꞊nenjo ɨkyɛmʉ iɓomu ngɨyɛ wa꞊nɛta, gʉtʉ yɔɓieni ta ʉgbaa wɔ ɨkʉmbʉ ngɨyɛsɛmɨ iti.» 24Gwa ata moi ɔ꞉chwɛa ga puu, nɔ, ɔ꞉sa agbʉka inye, ga ɨyɔ nayɔ ɓɔ: «Ɨna, nɨta ɨmanɨ?» Ga inye nayɔ aka ɓɔ: «Ɨta ta mʉtʉ wɔ Yɔanɨ ngɨa a꞉tɨɓatiso.» 25Kʉɓanɨ, gwa ata moi, ɔ꞉tɔa ta gagaa atɨ ngama Hɛlɔdɛ, ga ɨyɔ ɓɔ: «Ta ɨtakɨtakɨ ngɨyɛ, nakʉnda ɓɔ anenjo mʉtʉ wɔ Yɔanɨ ngɨa a꞉tɨɓatiso amatɨ ɔ sanɨ aka.» 26Yaka ngɨyɛnɛnɨ, yɔ꞉mudyiso ngama ikoko, dɔ, ndɨ a꞉ɓio ɔkieni silika kioni apɛɨ ɔ ɓabika, ya꞉ɓio tii ɓata adaa ngɨa amʉtatɨa-ɔɔ. 27Kʉ gagaa ngɨananɨ, ga ngama nɔ sʉda mʉngana ɓɔ, ɨsa nɔ, ɨka nɔ mʉtʉ wɔ Yɔanɛ. Kʉdɔ, sʉda a꞉sa akɔ ɨkáá yɔ boloko, ga ɨyɔ nɔ Yɔanɨ mʉtʉ ɓɔ gbo, 28nɔ, ɛ꞉ka nawɔ amati ɔ sanɨ, nɔ, ɔ꞉minjo gwa ata moi, ɨyɔ gwa ata moi ɔ꞉tɔminjo tɨa kʉ inye. 29Anʉka ɓanɨ, ɓakpata ngʉɓɔ Yɔanɨ ɓɛ꞉ka asɨka ndʉtʉ yɔ Yɔanɨ, nɔ, ɓɔ꞉sa nayɔ akɔhʉna.
Yeso ɔdyakakiso ɓombi ɓaja
30Ɨyɛ ndʉ ɓatitima ɓa꞉tɔa aki Yeso a꞉ɓʉtʉma-ɛɛ, ɓɔ꞉kungwonio anɔ ambamba angɔ ga kuu. Kʉdɔ, ɓɔ꞉mɨnjekio masaʉ kɔ yaka ngɨyɛ ɓa꞉kɨa, nɔ, ɨyɛ ɓa꞉ɨpanɨa. 31Ɓombi ɓaja ɓa꞉ɓio anɨka atɨ Yeso nɔ tɔwa, sɔkɔmʉ pɔ adaa ngɨa ɨyɔ, nɔ ɓatitima, ɓadya-ɔɔ ɓata mwana ɨkyɛmʉ. Kʉdɔ, ga Yeso nɔ ɓakpata ɓɔ: «Ikeni, tiseni-sɨ ta isu, akɔ ʉmʉa ngʉwa ɓombi ɓangɔɓiomʉ-ɛɛ, tɔhomuono gʉtʉ-sɨ ta bele.» 32Kʉdɔ, ɓɔ꞉ɗeto amati ɔ ɨngbɔɔ yɛta ɨja, ahata anɨsa, akɔ ʉmʉa ngʉwa aki ɓombi ɓangɔmʉ-ɛɛ. 33Aka ɓa꞉ɓio-ɔɔ anɨngwɨa kyɛnda, ɓombi ɓaja ɓɔ꞉ɓɨna nɔ ɓɔ꞉ɓɨmbɨa ta ɨmbɨanɨ. Kʉdɔ, anɨngwa akɔ ɓagʉlʉ ɓaɓomu, ɓombi ɓɔ꞉pʉnga bangʉ, nɔ mɨtɨndɨ, nɔ, ɓɔ꞉ɓʉnagaaka ta nagaaka.
34Ngbinga ngɨa a꞉ɓio-ɔɔ achwɛa akɔ ɨngbɔɔ ɓɔ, ɔ꞉tɛna ɓata ta ambaja ɔ ɓombi ngʉɓɔnanɨ ɓɔ hʉtɛɛ. Kʉdɔ, yɔ꞉mukiso ta ikoko anɨna ɓɔ ɓombi ngʉɓɔnanɨ, ɓa꞉ɓio ndʉ ɓakɔndɔlɔ ngʉɓa ɓangɔmʉ nɔ mʉpɛmakɨa. Ɔ꞉pʉnga naɓɔ tɨta ninjo mapanʉ maja. 35Anɨna ɓɔ angbinga ɔ꞉chanɔ tɨa chananɨ, ɓakpata ɓɛ꞉ka nayɔ asigio ɓɔ: «Ʉmʉa ngʉwa ta-ɔɔ aka, ya musungati, nɔ, ɓisi ɓeyo tɨa iyoni. 36Titio ɓombi ɓɔ ɓɨnanjana, iɗo ambɔ ɓɨ꞊sa akayanakɨa ɨkyɛmʉ yɛta ɨdyɛ, aɓandei, nɔ, alɨkʉmbʉ ngɨlɛ la tinetine aka.» 37Yakamɛngana, ɨyɔ ɔ꞉ɓutosio ɓɔ: «Inu ɓakwɔɓɔngɔ, ɓinjeni pɨ ɨkyɛmʉ yɛta ɨdyɛ! Ga ɨɓɔ nayɔ ɓɔ: ‹Tɨsa ndɨ naɓɔ akɔkaya mɨkatɨ nɔ ɓagyɛgyɛ lɨmɨa ɗepini#6:37 ɓagyɛgyɛ lɨmɨa ɗepini: ya mʉkaya wɔ tɛa yɔ makwaa lɨmɨa ɗɛpini, ɨyɛ ya mʉkaya wɔ tɛa yɔ mayi mɛɗɨanɛka, naɓɔ akɔdyakakiso?›» 38Ɔ꞉ɓutosio ɓɔ: «Inu, ná-sɨ nɔ mɨkatɨ ɨpɨtanɨ? Seni-sɨ akanga.» Ɨyɛ ndʉ, ɓa꞉ɓɔkwonokiso, ga ɨɓɔ nayɔ ɓɔ: «Ta mɨkatɨ ɓɔkʉ, nɔ sipe ɓepini ɓɔ kpekele.»
39Kʉdɔ, ɔ꞉titio ɓɔ ɓiwolokiso ɓombi ɓaɓomu ananɨ akɔ lanja, akɔ mababa di di di. 40Ɓɔ꞉kungwonokio akɔ mababa ta ɓanɨ, ɓɔmɔ mɨya mʉngana, ɓɔmɔ ɓatɛkɛɓɛ ɓɔkʉ. 41Ga Yeso nɔ mɨkatɨ ɓɔkʉ, nɔ sipe ɓepini ngɨyɛnɛnɨ ɓɔ tʉɓa, ɔ꞉kanga mesu akʉʉ ɔ ɓisi, nɔ ɛ꞉ta, nayɔ akɔkiokio. Mbise ɔngɔ, ɔ꞉ɓunjoko mɨkatɨ, ɔ꞉ɨnjekio ɓakpata ngʉɓangɔ ga ja ja, ɓɔ ɓɨpakɨa ɓombi. Ɓɔ꞉pakɨa ɓombi ɓaɓomu, nɔ, ɓɔkɨa akɔ sipe ɓepini kʉɓanɨ. 42Kʉdɔ, ɓombi ɓaɓomu, ɓɔ꞉dyakaka, nɔ, ɓɔ꞉motoo. 43Mbise ɔngɔ, ɓakpata ɓɔ꞉mɔmaka ligbiti lɔ mɨkatɨ nɔ sipe ngɨyɛ ya꞉tukoo, lɔ꞉huoko litumo tɛkɛɓɛ nɔ ɗepini. 44Ɨnadɔ, Ɓombi ngʉɓa ɓa꞉dya mɨkatɨ, ɓa꞉ɓio ɓague ahʉyakɨa ɛlɔfʉ ɓɔkʉ.
Yeso ɔkyɛndakɔ akʉʉ ɔ mipo
45Ta gagaa ambise ngɨananɨ, Yeso e꞉njo ɓakpata ʉpanʉ, ɓɔ ɓiɗeto amati ɔ ɨngbɔɔ, nɔ, tapʉa amondu ɔ ipuu, nɔ ʉgbaa mesu akɔ gʉlʉ ngɨa eno ɓɔ Bɛtɛsaida. Ngbinga ngɨa ɨyɔ, a꞉tukoo-ɔɔ-sɨ ta aninjo ambaja ɔ ɓombi kyɛnda. 46Ɨyɛ ndʉ a꞉ɓinjo kyɛnda ɓanɨ, ɔ꞉sa ɨyɔ tɨa akʉʉ ɔ ɨkpangba, anɨta. 47Ɨpasɨ ya꞉ɓʉgbʉka tɨa ɓɔ, ɓakpata ɓɔɓieni nɔ ɨngbɔɔ tɨta ati ɔ ipuu ngɨyɛnɛnɨ. Tɨta Yeso nangana akɛ, a꞉ɓio ɓɔ ɔtukoeni amuyi. 48Tɨa ananɨ, Yeso ɛ꞉na ɓɔ mahuo ka꞉ɓio atɔa nɔ ɓanɔmbise, kʉdɔ, ɛ꞉mbɨa ɓɔ ɨngbɔɔ yangɔɓio sɨasɨa akɔ ɓakpata ngʉɓangɔ akɔpuo. Yeso ɔ꞉pʉnga naɓɔ akpata, tɨa tinetine angbinga ngɨa ɓakɔɓɔ ɓa꞉natɨa-ɔɔ, ɨyɔ akyɛndaka tɨta akʉʉ ɔ mipo ɓɔ pa pa pa. Ɔ꞉tɔɓufeyoko, nɔ, ɔ꞉hata naɓɔ anagaaka. 49Ndʉ ɓa꞉mɨna akyɛndaka tɨa akʉʉ ɔ mipo ɓanɨ, ɨɓɔ, akɔyongo ga ɓɛ꞉nɔ abɨɨ ɔ mombi, ga ɨɓɔ nachokoo ɓe! 50Ɨɓɔ ɓaɓomu, ɓa꞉mɨna ta ɨnanɨ, nɔ, ɓɔ꞉kwa ʉɓá. Ta gagaa ngɨananɨ, ga ɨyɔ naɓɔ ɓɔ: «Faneni mʉtɨma! Nátɨkwenimʉ ʉɓá, ta ɨmɨ ananɨ!»
51Mbise ɔngɔ, ɨyɔ, ɔ꞉ɗeto ta amati ɔ ɨngbɔɔ ndʉ aka ɓɔ, ga mahuo ta ɓɔ pisi. Yaka ngɨyɛnɛnɨ, yɔ꞉ɓʉmbangɨa nɔgbɛ akɔchana. 52Ta ingono, ɨɓɔ, ɓa꞉ɓio ɓɔ ɓangɔpemisenimʉ yaka yɛta ɨmbangɛ ngɨyɛ Yeso akɨa akʉʉ ɔ mɨkatɨ. Kʉdɔ, mɨtɨma ngɨyeɓo, ya꞉ɓio tɨta ɓʉmʉ apemiso yaka.
Yeso ɔheiso ɓombi anɔ Gɛnɛjalɛtɨ
53Ɨyɛ ndʉ ɓa꞉tapʉa, ɓɔ꞉fɔma ɨngbɔɔ, ga ɨɓɔ akɔ ihoi yɔ Gɛnɛjalɛtɨ ɓɔ buu. 54Ɨɓɔ, anujo aɨngbɔɔ ta nujo ɓɔ, ɓombi ɓɔ꞉mɨmbɨa Yeso ta gagaa. 55Kʉdɔ, ɓombi ɓa꞉ɓio ananjana akɔ lindu lɔ lihoi tɨta liɓomu ɓɔ sɛ. Alɨda liɓomu ngɨlɛ Yeso a꞉tɨkɨa-ɔɔ, ɓombi ɓɔ꞉pʉnga nayɔ anɨkɨa nɔ ɓombi ɓɔ ɓakaɓu akʉʉ ɔ ɓakalagba. 56Ɓa꞉ɓio akwaakiso ɓombi ɓɔ ɓakaɓu akɔ libamu, aɓamʉa ɓaɓomu ngʉɓa Yeso a꞉ɓichana-ɔɔ, yiɓio amati ɔ lɨkʉmbʉ, pɔ ɓagʉlʉ, ga pɔ mɨgyɛndɔ. Ɓombi ɓɔ꞉mʉndɨanɨa ɓɔ, ɓɨ꞉mupoto gʉtʉ ta ʉgbaa wɔ ɨpʉkʉ ngɨangɔ. Ɨɓɔ, ɓaɓomu ngʉɓa ɓa꞉mupoto, ɓɔ꞉hɛa gbɛgbɛ ta ananɨ.
Currently Selected:
Malɨkɔ 6: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
