Malɨkɔ 3

Yeso ɔheiso mombi akɔ ɓisi ɓɔ nuhomuo

1Yeso a꞉kumonio ɓata kʉ amati ɔ ɨkáá yɔ nɨta. Inani, ya꞉ɓio nɔ mombi mʉngana, ngɨa ɨkɔndɔ ya꞉muwo. 2Ɓombi ngʉɓa ɓa꞉ɓio ananɨ, ɓɔ꞉pʉnga kanga Yeso ɓɔ ngba ngba ngba, anɨna ɓɔ aheiso ndɨ mombi ngɨananɨ aɓisi ɓɔ nuhomuo heisoo. Ɨɓɔ, ɓa꞉ɓio ahata ɓɔ ɓa꞊napɨa Yeso nɔ mʉkɔmbʉ nɔ ɨngbaa nga yino tanɨ. 3Ga Yeso nɔ mombi ngɨa ɨkɔndɔ ya꞉muwo ɓɔ: «Ha gue, ɨmaa ɓɔ gba, ananɨ ati ɔ ɓombi.» 4Kʉdɔ, ɔ꞉ɓuɓokuo tɨa ɓɔ: «Amati ɔ mapanʉ ngʉkeso, yabayanɨa ndɨ bayanɨanɨ akɔkɨa yaka yɛta iɗo, pɔ ɓʉɓɨɓɨ akɔ ɓisi ɓɔ nuhomuo, ga pɔ akɔheiso mombi, pɔ nayɔ anɨwa?» Ɓague ɓɔ꞉gbaa ta ɓɔ woo. 5Kʉdɔ, Yeso ɔ꞉ɓʉkanga nɔ ajwa ata ɓɨɓɨ, ɔ꞉dya ikoko nɔgbɛ amʉtɨma, akɔnɨna ɓɔ ɓangɔmʉ akʉnda báya amati ɔ mɨtɨma ngɨyeɓo pɔ bele. Mbise ɔngɔ, Yeso ɔ꞉musigio ɓɔ: «Ha gue, yomo ɨkɔndɔ.» Ɔ꞉yomo ɨkɔndɔ ga gɔ, nɔ, yɔ꞉mʉhɛa ta hɛa. 6Ta gagaa ngɨananɨ, Ɓafalisayɔ ɓɔ꞉chwɛa inani amati ɔ ɨkáá yɔ nɨta, nɔ, ɓɔ꞉sa amɔmanakɨa ɨhɔ nɔ ɓombi ɓɔ ɨtandɛ ngɨyɔ ngama Hɛlɔdɛ#3:6 pɔ ɓɔ Hɛlɔdɛ Atɨpasɨ. Ɓa꞉sa asingekio idimi yɔ nɨwa Yeso.

Ambaja ɔ ɓombi ɛkɔ akpata Yeso

7Yeso ɨhɔ nɔ ɓakpata ngʉɓangɔ ɓɔ꞉ngwa ananɨ anɨsa nɔ ʉgbaa mesu aipuu ngɨyɛ yɛta ɨja. Ambaja ɔ ɓombi ata mʉja ambise angɔ tɨa hooo, anɨngwa alihoi di di di ndʉ anɔ Galilaya, nɔ anɔ Yudɛa. 8Ɓombi nga ɓɔmɔ ɓaja ɓa꞉ngwa anɔ Yelusalɛma, nɔ anɔ Idumaya, nɔ alihoi ngɨlɛ la amondu wɔ Yɔlɔdanɨ, nɔ amutii wɔ Tilo, nɔ Sɨdɔna. Ambaja ngɨananɨ muɓomu ɛ꞉ka atɨ Yeso, dɔ, ɓɔ꞉ka yaka iɓomu ngɨyɛ a꞉ɓio akɨa. 9Kʉdɔ, Yeso ɛ꞉ta ɓakpata nayɔ anɨkɨa nɔ mwana ɔ ɨngbɔɔ, dɔ, ambaja ngɨananɨ atɨmutitomʉ. 10Ya꞉ɓio ɓanɨ dɔ, a꞉heiso ɓombi ɓaja, kʉdɔ, ɓombi ɓɔ ɓakaɓu ngaɓɔmɔ ɓaɓomu ɓɔ꞉hata nɔ angu, ɓɔ ɓɨmʉpoto gɔ gʉtʉ ta poto. 11Ɓombi ɓɔ mɨtɨma yɔ madu ɓɔ꞉mɨnɛni jɛnɛ, ɓɔ꞉gbʉkʉmɨa nɔ mau apɛɨ angɔ, nɔ, ɓɔ꞉pʉnga nachokoo asugo ɓɔ: «Ʉwɛ, wa mwana ngɨa Asɔɓɨɨ!» 12Yakamɛngana, ɔ꞉ɓʉgbɛma nɔ angu ɓɔ ɓatɨpanjamʉ ɨsaʉ yangɔ.

Yeso ɔchwɔ ɓatitima tɛkɛɓɛ nɔ ɓapɨnɨ

13Mbise ngɨananɨ, Yeso ɔ꞉ɗeto akʉʉ ɔ ɨkpangba, nɔ e꞉soko ɓombi ngʉɓa a꞉ɓio akʉnda naɓɔ anɨchwa. Ɓombi ngʉɓɔnanɨ ɓɔ꞉mɨsɨnganɨa tɨa kʉ tinene. 14Kʉdɔ, a꞉tɔchwa ɓombi tɛkɛɓɛ nɔ ɓapɨnɨ ati eɓo, akɔɓio ndʉ ɓatitima ɓangɔ, ʉɓa ɓa꞊ɓio ngbinga muɓomu tɨta ɨhɔ nayɔ. Nɔ, ɔ꞉ɓʉtʉma aɓɨakɨa ɓombi Ɨsaʉ yɛta Iɗo, 15nɔ, ɔ꞉ɓinjo angu akɔchwɛiso mɨtɨma yɔ madu. 16Mano kɔ ɓatitima tɛkɛɓɛ nɔ ɓapɨnɨ ngʉɓa a꞉ɓʉchwa ka ɓɔ: Simoni ngɨa Yeso a꞉mʉsʉa ino kʉ ɓɔ Pɛtɛlɔ. 17Yɔtɛka ananɨ tɨa, atɨ Yakɔɓɔ ɨɓɔ nɔ manye Yɔanɨ, ɓana ɓɔ Jɛbɛdayɔ, ʉɓa Yeso a꞉ɓʉsʉa ino yɔ ɨndambʉ ɓɔ «Bɔanelege» nɔ igiliki ɨsɨ yɔngɔ ɓɔ ɓana ɓɔ mungito wɔ ʉgbaa, 18nɔ Andɛlɛa, nɔ Filipo, nɔ Balatɨmayɔ, nɔ Matayɔ, nɔ Tɔma, nɔ Yakɔɓɔ, mwana ɔ Alʉfayɔ nɔ Tadei, nɔ Simoni, ngɨa a꞉tɨhata ɨpandasɨ akɔ ihoi ngɨangɔ, 19nɔ Yuda Ɨsɨkalɨɔta, ɨya a꞉ɓio anɨsa agaba Yeso.

Ɓanduku ɓɔ Yeso ɓahata nayɔ anɨfa

20Ambise ɔngɔ, ɓɔ꞉tɔa andei. Ga ambaja ɔ ɓombi ɓata kwananɨ ga tuu. Ngbinga adaa ngɨa atɨ Yeso, ɨhɔ nɔ ɓakpata, ɓa꞉dya-ɔɔ mwana ɔ ɨkyɛmʉ, sɔkɔ tii.

21Ɨyɛ ɓanduku ɓangɔ ɓɔ꞉ka yaka ngɨyɛnɛnɨ, ɓɔ꞉ngwɨa kyɛnda anɨsa nayɔ asɨka, nɔ, nayɔ atoiso andei, dɔ, ɓa꞉ɓio asugo ga ɔ꞉kwɔ ɓamu.

Ɓɔchwɔ Yeso mʉtɨma wɔ idu

22Ɓapananakɨa ɓɔ mapanʉ ngʉɓa ɓa꞉ngwa anɔ Yelusalɛma, ɓa꞉ɓio ɨɓɔ asugo akʉʉ ɔ Yeso ɓɔ: «Gue ngɨa a꞉kwa pɛ badɨma ngɨyɔ Bɛlɛjɛbʉlɨ#popoko Mat 12:24, nɔ, achweiso mɨtɨma yɔ madu amati ɔ ɓombi dɔ ɨyɔ ingainga a kʉ nɔ angu ɔ ngama ɔ ɓabɨɨ.» 23Kʉdɔ, Yeso ɔ꞉ɓisoko, nɔ, ɔ꞉pʉnga naɓɔ atosio yaka ngɨyɛnɛnɨ ɨngbaa akɔ isisenio ɓɔ: «Nɛna gbanɨ ɓɔ Sɨtanɨ akɔchwɛiso aɓwangɔ Sɨtanɨ amati ɔ mombi? 24Ɓamɨangama ɓɔpʉngeni nagbonyonoko tɨa ati eɓo, ambɔ ɓʉngama ngʉɓeɓo ɓɔmanɔ anɨkwa. 25Ya ndʉ ɓombi ɓɔnagbonyonokeni amati ɔ anja mʉngana, ambɔ anja ngɨyeɓo ɔpanjaɔ. 26Yɔɓieni dɔ tɨa ɓɔ Sɨtanɨ ɔpʉngɔ ɓɛndana kʉ nɔ ɨyɔ makwɔngɔ, ambɔ ɓʉngama ngʉɓangɔ ɓɔnagbonyonoko tɨa nagbonyonokoo. Nɔ ɨyangɔ, yɛpa tɨa kʉndʉ ananɨ. 27Mombi pɔ mʉngana angɔkumoniomʉ amati ɔ ɨkáá yɔ ginda, nɔ, ɔtʉpa lɨkyɛmʉ ngɨlangɔ angɔmʉsangenimʉ ɓɔ kpɛkɛkpɛkɛ. Tɨta ambise ngɨananɨ, ɨyɛ akwanana-ɔɔ tɨa tʉpa lɨkyɛmʉ amati ɔ ɨkáá ngɨangɔ! 28Ɛɛ, na dɔ nenu asigio ta ingono, Asɔɓɨɨ ɛ꞊paakɨa sina ɓombi ɓʉɓɨɓɨ ta ɓuɓomu, gʉtʉ ta lɨsɛya ngɨlɛ ɓa꞉ɓio ɓɔ ɓɔmʉsɛakeni. 29Yakamɛngana, pɛpɛ ta mombi ngɨa asɛaka Mʉtɨma wɔta Tu, ɓa꞊ngɔmɨpaakɨamʉ sina pɔ bele, nɔ, a꞊dya sina mʉkaya wɔ ɓʉɓɨɓɨ ngʉɓangɔ amati mago nɔ mago.» 30Yeso a꞉ɓusigio ɓanɨ, dɔ ɨɓɔ akɛ ɓa꞉pʉnga nayɔ anɨchwa mʉtɨma wɔ idu.

Anɨ akɛ a inye nɔ ɓamanye ɓɔ Yeso

31Kʉdɔ, atɨ inye ɔ Yeso ɨhɔ nɔ ɓamanye ɓɔ꞉tɔɓɔya tɨa kʉ ananɨ, nɔ, ɓɛ꞉maaka ta aɓei ɓɔ. Ɓɔ꞉tʉma mombi nayɔ anisoko. 32Ambaja ɔ ɓombi tɨa kyɔ kyɔ kyɔ, ɓaweleke ananɨ anambamba angɔ. Ga ɨɓɔ nayɔ ɓɔ: «Atɨ anʉ, ɨhɔ nɔ ɓana ɓɔ anʉ ʉɓa ɓanɔwɛ ahata, ɓɛmaakɛ aɓei-a.» 33Yeso ɔ꞉ɓutosio ɓɔ: «Atɨ ɨnaa nɔ ɓana ɓɛnaa ʉɓɔkanɨ?» 34Kʉdɔ, Yeso ɔ꞉kyɛndanakiso ɓajwa akʉʉ ɔ ɓombi ngʉɓɔnanɨ ɓa꞉ɓio ɓɔ ɓɔmʉkungueni. Ga ɨyɔ naɓɔ ɓɔ: «Ɨnaa, nɔ ɓana ɓɛnaa, ya inu ndʉ aka ná-ɔɔ aka, 35Dɔ, ɨnaa nɔ ɓana ɓɔ ɨnaa, ya mombi muɓomu ngɨa akɨa ɓʉkʉnda ngʉɓa Asɔɓɨɨ.»

Currently Selected:

Malɨkɔ 3: buuN

Highlight

Copy

Compare